16
1 Iphe, nemadzụ rịru
l'ọkpoma iya bụ iya bẹ ọ dụru.
Obenu l'ọphu e pfuru l'ọnu bụ
Chipfu bẹ ọ dụru.
2 Iphemiphe, nemadzụ
emekpọo dụebe ree
l'ẹnya nkiya.
Obenu lẹ Chipfu maru iphe,
dụ iya l'uche teke o
meru iya.
3 Woru iphe, bụkpoo iphe,
iimekpọo ememe ye Chipfu
l'ẹka;
hụma l'iphe, bụkpoo iphe,
ị chịru idzu ememe
e-mejeẹpho g'ị chịru iya.
4 Iphemiphe, Chipfu meru
bẹ o meru doberu onwiya;
mbụ je akpaa lẹ ndu
ẹjo-iphe bẹ o meru
doberu eswe eze iphe-ẹhuka.
5 Ndu eku onwophẹ bụkwa
ẹbyi bẹ ẹphe eme
l'ẹnya Chipfu.
Ọphu ịi-makahụkporu bụ
l'a taa hadụ phẹ g'a ta
hụ̀ phẹ ahụ̀hù.
6 Ọo n-yemobu yẹe epfu
ire-lanụ bẹ e gude edoshi
ẹjo-iphe.
Ọ bụru atsụ Chipfu ebvu
emeje g'amadụ te eme
ẹjo-ememe.
7 Teke iphemiphe, nemadzụ
eme dụ Chipfu ree
bẹ oomejechaa mee gẹ
yẹe ndu ọhogu iya dụ
lẹ ree.
8 Ọ kakwa ree l'e nweru
iphe nwanshịi;
a pfụbekwanu ẹka ọto;
eme l'urwu parụ ẹka;
ọ bụru l'ụzo,
apfụduru-ọto bẹ o shi.
9 Iphemiphe, nwoke e-me bụ
l'ime ọkpoma iya bẹ
ọorije iya dobe.
Obenu l'ọo Chipfu emeje gẹ
nzọkpa iya ngụru
angụru.
10 Onye eze bẹ opfu,
shi iya l'ọnu adajẹ g'ozi,
shi Chileke l'ẹka.
Ọphu oogudejedu ọnu iya
pfuswee m'ọ nọdu
ekpe ikpe.
11 Chipfu eele ẹnya g'e
gudeje iphe,
gbaru nụ tụ̀a ẹrwa iphe;
ẹrwa iphe, atụ̀tuduru
l'ụzo ẹregede bẹ dụ
Chipfu ree.
Ọ-nyị-tụ́dúú, nọkota l'ẹda
g'ọ ha bụkota iya
meru iya.
12 Ndu eze bẹ eme ẹjo-iphe
abụjeru ẹbyi;
kẹle onye eze bụ
apfụbekoto bẹ oogudeje
mee g'ọ ngụru angụru.
13 Iphe, adụje ndu eze
ree bụ onye epfu iphe,
pfụru ọto.
Mbụ l'onye epfu iphe,
pfụru nhamụnha bẹ ẹphe
agụbeje ọkpobe iphe.
14 Oke ẹhu-eghu onye eze bụkwa
iphe, ejeru ọnwu ozi.
Obenu l'onye maru iphe
abyanyịje iya.
15 Iphu -tụsahu onye eze;
l'a maru lẹ ndzụ dụ;
mbụ l'ị -tụba onye eze
l'ẹnya bẹ ọ dụje g'ẹka igwe
rwuru erwurwu
k'edze mini ishi-apha.
16 Hụmawaro g'ọ kabe ree
enweru mmamiphe eme
l'enweru mkpọla-ododo.
Mbụ ahọta nkwamẹnya
haa mkpọla-ọchaa.
17 Ụzo, a tụru mkpoli,
ndu pfụberekoto tọru
te eshitajẹkwa ẹka
ẹjo-ememe dụ.
Onye eche ụzo iya nche
bụ ndzụ iya bẹ ooche nche.
18 Eku-onwonye evujeru ụzo;
ọla-l'iswi etso iya.
Teke etu onwonye ẹpha
gbẹshiru;
adarwu alị etsokwaru
iya phọ.
19 Ọ kakwa mma l'ị bụ onye
wozeru onwiya alị;
ị yịru lẹ ndu dụ àgù;
eme l'unu lẹ ndu eku
onwophẹ swị tụko eke iphe,
unu kwatarụ l'ọkwata.
20 Onye angabẹje nchị l'opfu
Chileke bụ k'ọma
anọduje etso iya.
Tẹme onye a gọru ẹhu-ụtso
nụ bẹ ọ bụ;
mbụ onye dakoberu
Chipfu.
21 Ndu maru iphe l'ime obu phẹ
bụ ndu eekuje ndu iphe
edoje ẹnya ree.
Tẹme opfu, atsọ ụtso
lẹ nchị nọdu emeje
g'a ka anwụta iphe.
22 Nkwamẹnya bụ ishi nggele
mini ndzụ l'ẹhu ndu nweru
iya nụ.
Obenu l'abarụ onye-eswe
mba bụkwa iphe-eswe
bẹ ọ bụ.
23 Ọkpoma onye maru iphe
anọduje eche ọnu iya nche.
Tẹme ogbogboromọnu
iya nọdu emeje g'a
nwụta iphe.
24 Opfu, atsọ ụtso lẹ nchị dụ
g'ẹbakala manụ-ẹnwu.
O meje g'ẹhu tsọ nemadzụ
ụtso.
Tẹme ọ nọdu emeje g'ọkpu
gbakerehu l'iphe-ememe,
eme iya nụ.
25 Ọ dụru ụzo, abụjeru:
nemadzụ -nọdu eshi iya
l'ọoburu iya ọkpobe ụzo.
Obenu l'ẹka ụzo ono jeberu
bẹ ọ bụ ụzo ọnwu.
26 Ọo iphe, agụ onye akanya
anọduje ejeru iya ozi.
Ọ bụru ẹgu, agụ iya nụ
anọduje akwaru iya ẹvu.
27 Ẹjo nemadzụ anọduje achị
idzu eme ẹjo-iphe.
Tẹme opfu, shi iya l'ọnu nọdu
adụje g'icheku ọku,
ata rịriri.
28 Onye ẹregede anọduje
akpa opfu.
Tẹme onye asụlasu nọdu
ebukahụje ndu eshishi
ọ̀nyà ike.
29 Onye anọduje eme ndu ọzo
mkpawere bụ edephu bẹ
ọonoduje edephu
nwibe iya;
duru iya shia ụzo,
adụdu ree.
30 Onye ataburu nwibe iya ẹnya
bụkwa ẹregede bẹ ọogba.
Tẹme onye tagbabẹru ọnu
bụru ẹjo-iphe bẹ
ọocho ememe.
31 Aka nka bụ okpu-eze,
dụ biribiri.
Ọ bụru onye ndzụ iya
pfụru ọto bẹ
oorwuje ẹka.
32 Ọ ka ree l'ị bụ onye
atajẹru iphe nshi
eme l'ị bụ onye ka ike
l'ọgu.
Mbụ l'onye esedeje onwiya
kakwa ree;
eme l'onye alwụje ọgu
lwụta Ọha l'ophu.
33 Ido bụ atụtu bẹ aatụje iya.
Obenu l'ọo Chipfu maru iphe,
oo-me.