15
1 Opfu, e pfuru; a tọ
nwẹhu yee ya ọnu eselajẹ
oke ẹhu-eghu azụ.
Obenu l'epfu opfu,
eme ẹhuka akpatajẹ
ọvuma.
2 Ire onye maru iphe
emeje mmamiphe g'ọ dụ
ree k'anụma.
Obenu l'ọnu ọmata bụ iphe,
anọduje alwa iya torotoro
bụ epfu rwoorwoorwoo.
3 Ẹnya Chipfu dzuru ẹkameka;
k'ọphu ọ hụma-dzuru
onyemonye;
mbụ ndu ẹjo-iphe mẹ
ndu ọma.
4 Ire epfu iphe, e-me g'e
wekọrohu bụkwa oshi,
amịje ndzụ gẹ mebyi.
Obenu l'ire ụghoshi etsuje
ndzụ pyaapyaa.
5 Ọo onye-eswe abụjeru;
nna iya -baarụ iya mba;
o too yedu iya ọnu.
Obenu l'onye a hụ̀ru ahụ̀hù;
ahụta iya egoshi l'o
nweru egomunggo.
6 Ụlo onye pfụberekoto bẹ
iphe, vu oke aswa dụ
igwerigwe.
Obenu l'okpoga onye ẹjo-iphe
akpata bẹ l'akpatajẹru
iya opfu.
7 Ogbogboromọnu onye maru
iphe anọduje araka
nkwamẹnya araka.
Obenu l'ọ tọ bụdu g'ọkpoma
dụ ọmata bụ ono.
8 L'ẹnya Chipfu bẹ ngwẹja,
onye ẹjo-iphe egwe
abụjeru iya ẹbyi.
Obenu l'epfupfu, onye obu
iya gụru ìphóró epfu
anụ iya atsọje iya rịkpotoo.
9 Ụzo ndu ẹjo-iphe abụkotajeru
ẹbyi l'iphu Chipfu.
Obenu lẹ ndu eme g'ẹphe
bụru ndu pfụberekoto
bẹ o yeru obu.
10 Ọ kwa chịipfuu bẹ aa-nụ
onye harụ ọkpobe ụzo.
Tẹme onye ọ dụkwanu ashị;
l'aahụ̀ iya ahụ̀hù
l'e-mechakwaa nwụhu.
11 Alị-maa yẹe alị ọla-l'iswi
tụkokwaru gheru ọnu
l'iphu Chipfu.
?Bụ-chia ọkpoma amadụ te
eghedụru ọnu l'iphu iya?
12 Onye mgbọnu te eyejedu
ahụ̀hù aahụ̀ iya obu.
Ọphu o jejedu akpata
ishi l'ibe onye maru iphe.
13 Onye ẹhu atsọ ụtso bẹ
iphu atụsahuje atụsahu.
Obenu l'onye iwe jiru obu;
edejeru yọkoo.
14 Ọkpoma onye iphe edoje
ẹnya ree l'anọduje eme
g'ọ maru iphe.
Obenu l'ọnu onye bụ ọmata
bụ nri iya bẹ bụ eme eswe.
15 Iphe, bụkpoo eswe ndzụ
ndu eje iphe-ẹhuka
abụkotajeeru phẹ phọ
mgburwashị ẹhu.
Obenu l'onye ọkpoma
atụsahuje atụsahu
bẹ tekenteke abụjeru iya
ọbo-iphe.
16 Ọ kakwa ree l'e nweru
ẹku nwanshịi;
a nọdu atsụ Chipfu ebvu;
eme l'ẹku, jiru ẹkameka;
ẹgharashi dụkwanu.
17 Ọ kakwa ree l'iphe, bụ nri,
eeri bụa nwẹba, e yeru l'ophe;
n-yemobu dụkwanu;
eme l'e gburu eswi,
tsụru ẹba ata;
mkpọmashi dụkwanu.
18 Onye obu-ọku akpalije
opfu akpali.
Obenu l'onye atarụ opfu
nshi abyanyịje ụswo
abyanyị.
19 Ụzo onye ẹnyiru eshi
bẹ eegudeje óbvú
tụ-chishia atụ-chishi.
Obenu l'ụzo onye obu iya
gụru ìphóró eshi abụjeru oji,
akwọ tẹretere.
20 Nwata, maru iphe emeje
g'ẹhu tsọ nna iya ụtso.
Obenu l'ọmata ta adụdu iphe,
ọogubeje ne, nwụru iya nụ.
21 Eme eswe atsọje onye enwedu
egomunggo ụtso.
Obenu l'onye iphe edoje ẹnya
ree bụ iphe,
pfụru nhamụnha bẹ oomeje.
22 Iphe, nemadzụ rịru
k'ememe bẹ o to mekọtajekwa
mẹ a -chikoshiduru iya
ọkpobe idzu.
Obenu a -dụ igwe chikoshi
nemadzụ idzu l'o mee iphe,
ọ tụberu.
23 Amadụ bẹ ẹhu atsọje ụtso
mẹ o -yee ọnu l'opfu ree.
Mbụ lẹ-a; l'ọnu, e yeru l'o
rwuberu iya atsọje
rịkpotoo.
24 Ụzo ndzụ anọduje eje ala l'eli
l'eli l'ẹka onye kwarụ
ẹnya nọ.
Ọ bụru iya emeje g'ọ tọ lwa
alị alị larwua alị-maa.
25 Chipfu alashịje ụlo onye
eku onwiya.
Obenu l'okoke alị nwanyị,
ji iya anọedu bẹ ọokpoje
ọkpo-kuu.
26 Ọriri, onye ẹjo-iphe rịru
abụjeru Chipfu ẹjo ẹbyi.
Obenu l'ọphu ndu dụebe
ree rịru atsọje iya ụtso.
27 Onye ụghoro bụepho opfu
bẹ ọonoduje akpa
l'ibe iya.
Obenu l'onye kpọru ụphalazu
ashị bẹ ndzụ a-dụ.
28 Onye pfụberekoto egudeje
ọkpoma iya rịada iphe
oo-pfu arịri tẹme l'o
pfua ya.
Obenu l'ọnu onye ẹjo-iphe
bụ njọ-opfu eshije iya
alwa torotoro.
29 Chipfu nọ ndu ẹjo-iphe
ụzenya.
Obenu l'ọonumaje olu ndu
pfụberekoto m'ẹphe
-pfuru nụ iya.
30 Ẹnya, a tụsaru iphu atụsa
lee emeje g'ẹhu-ụtso
ji ọkpoma.
Tẹme ozi ọma nọdu emeje
g'ọkpu gbashịa ike.
31 Onye ngabẹru nchị lẹ mba,
a barụ iya; mbụ mba
ọphu emeje g'a nọdu
ndzụ bẹ yẹe ndu maru
iphe e-mechaa nọ
l'ọkpoku lanụ.
32 Onye ta adụdu iphe,
ọ gụberu mba,
aabarụ iya bụkwa onwiya
bẹ ọ tọ gụbeduru iphe.
Obenu l'onye abụjeru;
a -nọdu ahụ̀ iya ahụ̀hù
l'ọoba iya lẹ nchị
enwejeru egomunggo.
33 Atsụ Chipfu ebvu ezije
nemadzụ mmamiphe.
Ewoze onwonye alị nọdu
esekutaje akwabẹ ùbvù.