43
Onye bụ iya kpoloko
a-dzọ ndu Ízurẹlu
1 O be lẹ nta; wakwa iphe,
Chipfu epfu;
mbụ onye ono,
bụ iya meru gụbe Jiékọpu;
onye bụ iya kpụru
gụbe Ízurẹlu pfụbe.
Ọ sụru-a:
B'atsụshi ebvu;
kẹle mu gbafụtawaru ngu.
Mu kuru ngu oku;
kukpọo ngu ẹpha ngu;
mbụ l'ị bụ nkemu.
2 Teke ọ bụ mini bẹ iirwughata
bẹ mu nọepho swiru
ngu eswiru.
Teke ọ bụ nggele bẹ iime
g'ị ghata;
o too ridu ngu.
Teke i jeru ije je aghabua ọku;
ọ tọo hụdu ngu;
ọphu ire ọku iya te
ekepyashịdu ngu.
3 Noo kẹle ọo mbẹdua bụ
Chipfu;
bya abụru Chileke ngu;
bya abụru Onye nsọ
kẹ ndu Ízurẹlu;
bụru onye ndzọta ngu.
Ọo ndu Ijiputu bẹ mu
nụru gude gbata ngu.
Mu woru ndu Kushi;
yẹle ndu Seba nụ
l'ọzori ngu.
4 Eshinu ị dụ mu mkpa;
tẹme ị bụru onye
aakwabẹ ùbvù l'ẹnya mu;
tẹme eshinu mu yeru
ngu obu;
bẹ mu e-woru ndu
nemadzụ nụ gude
gbanweta ngu;
nụkwapho ndiphe gude
gbanweta ndzụ ngu.
5 Gẹ ndzụ ba agụkwa ngu;
kẹle mu nọkwa swiru
ngu eswiru.
Mu e-shi l'ụzo
ẹnyanwu-awawa
chịlataru ngu ụnwu ngu;
bya ejekwaphọ l'ụzo
ẹnyanwu-arịba je
achịlatachaa ndibe ngu.
6 Mu abya asụ isheli:
“Pakwarụ phẹ haa!”
Bya asụ ndọhali:
“Be sedeẹkwa phẹ!”
Sụ phẹ: Unu shikwa l'ẹka
dụ ẹnya chịtaru mu
ụnwu mu kẹ nwoke!
Unu eshi l'ẹka igwe
beru alị beru chịlataru
mu ụnwada mu!
7 Mbụ iphe, bụkpoo
onyemonye zarụ ẹpha
laaru mu.
Ndu mu meru g'e gude tua
mu ẹpha.
Ndu mu gude ẹka mu kpụa;
gude ẹka mu mee g'ọo-dụ.
8 Dufụtanu ndu ono,
nweru ẹnya;
obenu l'ẹphe atsụ ishi onoya;
mẹ ndu ọphu nweru nchị;
ẹphe nọdu ada nkụchi.
9 Ọhamoha l'ophu dzukọru
l'ẹka lanụ.
Tẹme ndu nemadzụ
dzukọkwaapho.
Ọle ?bụ onye ole lẹ g'ẹphe ha
pfuru iphe ono,
eme nụ onoya;
bya epfukwaphọ ọphu
mehawaru nụ?
G'ẹphe jenụ ekua ndu ekebe
phẹ g'ẹphe bya egoshi
lẹ nkephẹ bụ ire-lanụ;
k'ọphu ndu ọzo a-nụma
iya sụ: Ọ kwa eviya.
10 Wakwa iphe, Chipfu epfu baa:
“Ọ kwa unu bụ ndu ekebe mu;
unu bụkwarupho
onye-ozi mu,
mu họtaru l'onwomu;
k'ọphu unu a-maru mu;
bya ekwetakwaphọ nkemu.
L'o dokwaphọ unu ẹnya
l'ọo mu bụ onye ọbu.
Ọ tọ dụedu Chileke ọzo,
e meru dobe,
abụdu mbẹdua;
ọphu ọ dụdu ọzo,
a-dụbaa nụ gbahaa mbẹdua.
11 Mbẹdua; mbụ mbẹdua
gẹdegede;
ọo mu bụ Chipfu;
ọphu ọ dụedu onye
ndzọta ọzo,
dụ nụ gbahaa mbẹdua.
12 Mu goshiwaru iya egoshi;
bya adzọta iya dobe;
bya echia ya lẹ
mkpu l'ọo mbẹdua bụ
Chileke;
l'ọ tọ bụdu agwa ndu
ọhozo ono,
unu dobegbaaru ono.
Mbụ ọ bụru unu bụ ndu
ekebe mu.”
Nokwa iphe, Chipfu eepfu.
13 “E -shikpọo l'ichee
bẹ ọ bụe mu phọ bẹ
bụ iya nụ;
ọphu ọ dụdu onye adụ
ike anafụ mu onye nọ
mu l'ẹka.
Mu -mewaa iphe g'ọ dụ mu;
?bụ onye sụru g'ọo-bya
emee ya imephu?”
Chileke l'e-me gẹ ndibe iya
laphu azụ l'ọnodu phẹ
14 Wakwa iphe, Chipfu epfu
baa; mbụ onye ono,
gbafụtaru unu ono;
bya abụru Onye Nsọ
kẹ Ízurẹlu.
Ọ sụru-a: “Ọo l'iswi ẹhu
unu bẹ mu e-gude
zia g'e je Bábilọnu;
je anyakashịa
ọguzo-igwe g'ọ ha.
Noo teke okoo,
ndu Bábilọnu atụ
a-ghọ erwubvu.
15 Ọ kwa mbẹdua bụ Chipfu
ono;
mbụ Onye Nsọ k'unu ono.
Mbụ onye ono,
bụ iya meru unubẹ
ndu Ízurẹlu dobe;
bya abụru iya bụ eze unu.”
16 Sụ-a; wakwa, iphe,
Chipfu epfu;
mbụ onye ono, tọru ụzo,
o shijaa eze-ẹnyimu;
mbụ tọgbo gbororo;
ọ ghajaa eze mini;
17 mbụ onye ono,
chifụtaru ụgbo-ịnya-ọgu;
mẹ ịnya;
mẹ ndu ojọgu;
mẹkpoo ndu gbaru
mkparawa;
chịkobe phẹ dobe.
Ẹphe zẹshia l'ẹka ẹphe ta
abyadụ agbalihubaa ọzo.
Mbụ ọ gbanyịa phẹ;
mbụ phụnyia phẹ
g'onye aphụnyi ọku
orọku.
18 “Unu zọhaa akahụ iphe!
G'ọ tọ bụshi l'iphe, mehawaru
nụ bẹ obu unu a-dụ!
19 ?Unu te eledu lẹ mu watawarụ
eme iphe ọ̀phúú!
Mbụ l'ọobyawaa efuta.
?Unu ta ahụmaduru iya?
Mu eyeakwa ụzo l'echiẹgu.
Tẹme mu nọdu emewaa
nggele l'alị,
dabyiru mgbegere.
20 Anụ-ẹgbudu akwabẹ mu ùbvù;
mẹkpoo nkụta-ọswa yẹe
mgbashị-ujiku;
kẹle mu meru gẹ mini dụ
l'echiẹgu;
bya emee gẹ mini sọo
gborogboro l'alị,
dabyiru mgbegere;
k'ọphu ndibe mu a-ngu
mini; mbụ ndu ono,
mu gude ẹka mu họta
ono;
21 ndu mu gude ẹka mu mee
doberu onwomu
g'ẹphe raa ya arara sụ g'e
tuje mu ẹpha.”
Iphe-ẹji ndu Ízurẹlu
22 Obenu lẹ gụbe Jiékọpu
te ekwedu raku mu.
Mbụ-a; gụbe Ízurẹlu sụ l'ike
mu bvụwaru ngu.
23 Ọphu ị kpụtaduru atụru
gude gweeru mu
ngwẹja-akpọ-ọku.
Ọphu i gweduru mu ngwẹja
mmanụ gude kwabẹ
mu ùbvù.
Ọ tọ bụdu lẹ mu bojeru ngu
ivu-ẹrwa sụ g'i gweeru
mu ngwẹja-nri.
Ọzokwanu lẹ mu mejeru
g'ike bvụ ngu lẹ mu
adaru ngu ngwẹja
ụ̀nwù-isẹnsu.
24 I ti gudedu okpoga je azụta
oshi ọmanko,
eshi mkpọ gude bya
anụ mu.
Ọphu i gweduru mu ngwẹja
ẹba-anụ gude mee g'ẹpho
ji mu.
Ọ bụchia iphe, i meru bụ l'i
mewaru mu iphe-ẹji jasụ
ọ nọdu anyịwa mu ẹrwa.
Mbụ l'i meswewaru mu jasụ
ike ngu bvụwa mu.
25 Ọ bụru mbẹdua;
mbụ l'ọo mu bụ onye
e-hufu emeswe,
i mesweru mu;
g'ẹpha mu apfụru.
Ọphu mu anyatabaẹdu iphe-ẹji,
i meshiru ọzobaa.
26 Sụ-a; nyatanụru mu iphe,
mehawaru nụ.
G'anyi tụkonu yee ọnu l'opfu
ọbu.
Donaa g'ọ nwụru g'a maru
?ọ kalẹru ngu?
27 Nna ngu kẹ mbụ meru iphe-ẹji.
Ndu-ishi ngu meswee mu.
28 Noo g'o gude mu woru
ndu-ishi ụlo-dụ-nsọ
merwushia;
bya ahaa g'e woru Jiékọpu
mebyishikọta l'ophu;
l'e gude ndu Ízurẹlu
ephu l'iphu.