42
Onye-ozi kẹ Chipfu
1 Chipfu sụru-a:
“Wakwa onye-ozi mu,
bụ onye mu gudeshi;
mbụ onye mu họtaru;
bya abụru onye emeje
g'obu jidata mu.
Mu yeakwaru iya Unme mu
l'ẹhu.
Oo-goshi ọhamoha iphe,
bụ ikpe, pfụru ọto.
2 O too jekwa ara ọ́rà;
ọphu oojekwa echi mkpu.
Ọphu ọ dụkwa onye bya
anụma olu iya l'etsuzọ.
3 Mbụ l'ekperema,
jihuru ejihu bẹ ọ tọo
gbajikpọkwanu;
ọphu ọophunyikwa orọku,
enwu rẹswereswe.
Oo-gude ire-lanụ goshi iphe,
bụ ikpe, pfụru ọto.
4 Ọphu ọodadu adada;
ọphu ọ dụdu iphe,
a-kpọshi iya iphe,
oome jasụ teke ikpe,
pfụru ọto e-keru l'eliphe.
Ọ bụru ekemu iya bẹ ọha,
bukube eze-ẹnyimu
a-nọdu ele ẹnya iya.”
5 Sụ-a; wakwa iphe, Chileke,
bụ Chipfu epfu baa;
mbụ onye ono,
bụ iya meru eligwe
l'ophu bya eworu iya tọsa;
onye bụ iya tọsaru eliphe
l'ophu mẹkpoo
iphemiphe, shi iya nụ;
bya anụ ndu bu iya nụ
unme, ẹphe atụ;
bya eworu ndzụ nụ ndu eje
ije l'eli iya.
6 Ọ kwa mụbe Chipfu gude
apfụbekoto nkemu
kua ngu.
Mu je l'e-seta ngu l'ẹka
gudeshia.
Mu e-dobe ngu;
mee ngu g'ị bụru iphe,
mu lẹ ndiphe e-gude
gbaa ndzụ.
Tẹme l'ị bụru ìphóró,
dụru ọhamoha.
7 L'i mee g'ẹnya sahụ ndu atsụ
ishi;
mee gẹ ndu a kpụru lẹ
ndzụ nweru onwophẹ;
mekwaphọ g'a haa
ndu nọ lẹ mkpọro
l'ẹka gbahụru tsụkiribaa.
8 “Sụ-a; ọ kwa mbẹdua bụ
Chipfu.
Ọ bụru ẹpha mu bụ ono
gẹdegede!
Ọphu mu e-wokwaru úbvú,
rwuberu mu nụ anụ
onye ọzo.
Ọphu mu ewokwaru
etu ẹpha,
eetuje mu woru haarụ
agwa.
9 Lewarọ; akahụ iphe,
a sụru l'oo-me meakwaru.
Mu nọdu epfuwa k'ọ̀phúú.
Mbụ lẹ mu epfujeẹkwaru
iya phọ unu tẹme
l'ọowata ememe.”
Ebvu, e gude aja Chipfu
10 Unu gụa ebvu ọ̀phúú
nụ Chipfu!
Unu shikpọepho l'ẹka igwe
beru alị beru tuta iya
ẹpha;
unubẹ ndu eje l'ọma-mini;
mẹ iphe, bụ iphe,
bu lẹ mini!
Iphe, bụ alị,
nọ-kube eze-ẹnyimu;
mẹ iphe, bụ ndu bu iya nụ;
unu tua ya ẹpha!
11 G'echiẹgu mẹ ọha,
bu iya nụ wata erwu
okwe!
Gẹ ndu bugbaa lẹ mkpụkpu
Keda tejekwa ẹswa!
Gẹ ndu Sela gụa ebvu ẹhu-ụtso!
G'ẹphe nọdu lẹ mkpakpọnu
úbvú rwua okwe!
12 G'ẹphe kwabẹkwa Chipfu
ùbvù!
Ẹphe anọdu l'alị,
nọ-kube eze-ẹnyimu
tua ya ẹpha!
13 Chipfu a-zọ garamu garamu
lụfuta gẹ nwoke,
dụ ike.
L'ọ bya akpalia obu iya
g'ojọgu, ike dụ;
l'ọ phụahaa ya l'ẹhu.
L'ọ bya araa ọ́rà gude chia
mkpu ọgu;
lwụa ọgu lwụ-kpee
ndu ọhogu iya.
14 Chileke sụru-a:
“Mu shihaakwa ụzenya
nọduta doo.
Mu nọkpoepho nwapyakọo
esedekpọepho
onwomu.
Obenu lẹ nta-a bẹ mu a-wata
echi mkpu; atsụ ude;
atụ hẹehee;
gẹ nwanyị, ime eme.
15 Mu e-me g'iphe, bụ úbvú,
nọkota nụ dabyikọtaru
iphoro.
Mu abya emee g'ẹswa,
rwuru iya nụ kpọshihu
nkụ.
Mu emee nggele nggele
g'ọ ghọshia alị ọkponku.
Mu abya emee g'okpuru
okpuru tashịhu.
16 Mu e-duru ndu atsụ ishi
shia ụzo,
ẹphe amahaada.
Gbororo, ẹphe te eshijehaada
bẹ mu a-kpọ-ziru phẹ
ụzo iya.
Mu e-me g'ọchii bụru ìphóró
l'iphu phẹ;
bya emee g'ụzo,
dụ kpọkoro kpọkoro
kpọkoro kwọru
phẹ akwọkwo.
Iphemiphe ono bụkota iphe,
mu e-me;
ọphu mu abyadụ
aha phẹ.
17 Obenu lẹ ndu kpọru obu
yeru agwa;
mbụ ndu bụ iphe,
a kpụru akpụkpu bẹ
ẹphe sụru l'o gude
ndzụ phẹ;
ndu ono bẹ ee-me
iphe-iphere chịfu phẹ.”
Ndu Ízurẹlu atsụ ishi ada nkụchi
18 “Unubẹ ndu nkụchi;
unu nụmadupho iphe
lẹ nchị!
Unubẹ ndu atsụ ishi;
unu palidaphọ ẹnya
hụmakpodapho!
19 ?Bụkwanu onye atsụ ishi ọbu,
abụdu onye-ozi mu?
Tọo ?bụ onye adabe nkụchi
g'onye ono,
mu ziru ozi ono?
?Bụ onye atsụ-be ishi
g'onye nọ mu l'ẹka?
Mbụ ?bụ onye atsụ-be ishi
g'onye-ozi kẹ Chipfu?
20 Ị hụmawaru iphe,
dụ igwerigwe;
ọphu ịingadu nchị.
Nchị gheru ngu ọnu;
ọphu ọ dụdu iphe,
ịinumaje.”
21 Chipfu bẹ bụ onye
pfụberekoto.
Noo iphe, meru g'o gude ọ nụ
phẹ ekemu,
ereshi ire ike bya
adụkwapho biribiri.
22 Obenu l'ẹphe byaru
bya abụru ndu a
lwụtaru iphe phẹ l'ọgu;
bya abụru ndu a kwarụ
l'ọkwata.
Mbụ lẹ g'ẹphe ha bẹ
nwulahụkotaru
kwaa l'ime nsụkutu;
mẹ ndu ọphu a
tụru mkpọro woru
domia edomi.
Ẹphebedua l'onwophẹ bụwaa
ndu a lwụtaru l'ọgu.
Ọphu ọ dụdu onye gbaru
phẹ mkpu.
Ẹphe bụwaa ndu a kwarụ
l'ọkwata.
Ọphu ọ dụdu onye pfuru
sụ: “Unu chiphu phẹ nụ
azụ-o!”
23 ?Bụ onye ole lẹ g'unu
ha a-ngabẹ nchị l'opfu-a;
ọzokwanu nọdukpoepho
nwadoo nụma iphe,
e-mechaa mee nụ?
24 ?Bụ onye woru ndibe Jiékọpu
haa g'ẹphe bụru iphe,
a kwarụ l'ọkwata;
mbụ haa ndu Ízurẹlu
g'ẹphe bụru ndu a
lwụtaru l'ọgu?
?Tọbudu Chipfu l'onwiya
meru iya;
mbụ onye ono,
bụ iya bẹ anyi meshiru
iphe-ẹji ono?
Kẹle ẹphe te ekwedu etso
ụzo iya.
Ọphu ẹphe ekwedu eme
ekemu iya.
25 Ọ bụru iphe ono meru g'o
gude ọ wụa phẹ oke
ẹhu-eghu iya;
mee g'ẹjo ọgu dapfuta phẹ.
Ọgu ono gude ọku woru phẹ
kee mbvu;
ọphu iphe edoduru
phẹ ẹnya.
O kee phẹ phuruphuru g'ọku;
ọphu o rwuduru phẹ
l'ọkpoma.