14
No Kapangraot ni Jonatan Dyirad Pilisteo
1 Do asa karaw, inbahey ni Jonatan a pōtot ni Saulo do barwaw a taga-sahabit so armas na a kāna, “Ngay, mangay ta dwa bīt naya do yanan rakoh a bonggoy a soldādo dan Pilisteo saya.” Ki inbahebahey naba di āmang na.
2 As si Saulo, ki minyan do kampo na a masngen do gaganaw no Gibea do sīrok no kayo a granada a myan do Migron. Myan sa dyaw mag-anem a gasot a soldādo na.
3 Dyirad soldādo naw ni Saulo, ki myan si Ahihah a pādi a naylaylay so epod. Si Ahiha, ki pōtot ni Ahitob a kakteh ni Ikabod a pōtot ni Pinehas a pōtot ni Eli a pādi ni ĀPO do Silo. Abaw nakadlaw a komnaro si Jonatan do kampo daw.
4 Do ayayaman a inranta ni Jonatan a maysopo a komwan do yanan no rakoh a bonggoy a soldādo dan Pilisteo saw, myan maybīt a marahem a mabato a pangpang. No ngaran asaw, ki Boses. As do bīt naw, ki Seneh.
5 Iyaw asaw a pangpang, ki mamangket do Mikmas. As kan iyaw asaw, ki mamangket do Geba.
6 Binata ni Jonatan do barwaw a taga-sahabit na so armas na a kāna, “Ngay, mangay ta dwa yanan daw no matokpohaw a bonggoy dan soldādo saw no dya nakogit. Ta si ĀPO pakono, iyaw no somidong dyaten. Abaw makapenpen sya do kapangisalākan na so aran āro mana dēkey.”
7 Ki initbay no taga-sahabit naw so armas di Jonatan a kāna, “Na, parinen mo tabo a myan do kapangtokto mo ah, ta machitōnos ako dyimo do kapangtokto.”
8 Binata ni Jonatan a kāna, “Sigi. May ta na a maysopo dwa bīt naya tan maboya da yaten.
9 An ibahey da dyaten a kon da, ‘Nayahen nyo yamen mandan makarapit kami do yanan nyowaya,’ nāw tad yanan taw. Komayat taba do yanan da.
10 Ki an ibahey da a kon da, ‘Komayat kamo a mangay dyamen,’ aket na, komayat ta, ta nawrinchiw pangilasīnan a inparawat sa ni ĀPO do tanoro ta.”
11 Dawa, napaboya sa dadwa dyirad bonggoy daw no Pilisteo saw. Binata dan Pilisteo saw a kon da, “Chiban nyo pa! Tori saya mohtot Hebreo saya yapo do babahay da saw a tinaywan da!”
12 Inngēngey da no matokpohaw a bonggoy no soldādo dan Pilisteowaw da Jonatan kan iyaw taga-sahabit naw so armas na a kon da, “Hoy! Komayat kamo dyamen dya, ta ariw ipataham namen dyinyo.”
Inbahey ni Jonatan do taga-sahabit naw so armas na a kāna, “Komayat ka a somarono dyaken, ta inparawat dana sa ni ĀPO do tanoro no Israel.”
13 Komnayat si Jonatan do malidyataw a pangpang a nayhonohonos. Minonot dya iyaw taga-sahabit naw so armas na. Naychaharaharag Pilisteo saw do nakapaychihat daw a nangdiman sira da Jonatan kan iyaw taga-sahabit naw so armas.
14 Do dāwri a dāmo a nakapangdiman da Jonatan kan iyaw taga-sahabit naw so armas, ki diniman daw sigōro dadwa poho a mahahakay do irahem no malābit dadima poho a kamitro a kwadrado a tana.
No Kapangābak Dan Israel Dyirad Pilisteo
15 Naychinyābot sa tābo bōyot dan Pilisteo. Naychamirpir saw myan saw do irahem no kampo kan siraw myanaw do gagan kontodo siraw myan do kōta kan siraw mangraot saw. Sinpangan na, naggin-gined kan tinaranta sa no Dyos so taywara.
16 Siraw magbanbantayaw ni Saulo do Gibea do tana no Benhamin, ki naboya da a naychawpit saw soldādo daw no Pilisteo a maychapayyapayyayo do kompormi.
17 Do dāwri, binata ni Saulo dyirad soldādo naw a myan dya a kāna, “Bidangen nyo pa saw soldādo saya kan chichwasen nyo an sino abo.” Do nakabidang daw sira, ki napatakan da a abo sa Jonatan kan iyaw no taga-sahabit naw so armas na.
18 Binata ni Saulo di Ahiha a pādi a kāna, “Yangay mo pa dyaw epodaya.” Ta do dāwri, iyaw akin rebbeng a mangilaylay so epodaw do salapen dan Israelita saw.
19 Ranan na nachisarsarīta ni Saulo do pādyaw, naypaypāngay paw kapagariwāwa dan Pilisteowaw. Dawa, inbahey dana ni Saulo do pādyaw a kāna, “Bali dana. Aryan mo naw kakamay mwaya do epodaya.”
20 Sinpangan na, sa Saulo kan tabo siraw soldādo na saw, ki naychichipeh sa kan nangay dana sa machigobat dyirad Pilisteowaw. Ki nadongso da a maychaychawaw dana saw Pilisteowaw a maysintatabtab do bōkod da a ispāda.
21 Siraw Hebreo saw a sīgod a myan dyirad Pilisteo saw kan nachangay dyira do kampo daw, ki naybadiw dana sa a nachirapa dyirad Israelita saw a myan do yanan da Saulo kan Jonatan.
22 Siraw tabo Israelita saw a tomnayo do katokotokonan no Epraim, nadāmag da a naychapayyapayyayo dana saw Pilisteowaw. Do dāwri, nachirapa sa a nachipanglakat.
23 Dawa, insalākan ni ĀPO iyaw Israel do dāwri a araw, kan romnapit iyaw gobat do labes no Bet-aben.
No Kabon Arang a Kapangisapata ni Saulo
24 Do dāwri a araw, taywaraw nakahopag dan Israelitaw, ta inpasapata ni Saulo dyirad soldādo na saw a kāna, “Maabay iyaw no aran sino a koman sakbay no kapaypamahep, sakbay no kapangbahes ko dyirad kabōsor ko!” Dawa, aba dyirad soldādwaw nanaham so aran āngo a makan.
25 Sinpangan na, tabo bōyot ni Saulo, ki naysalosalok sa do kakahasan, kan nakadongso sa so bahay no yokan a myan so tagapolot a myan do tana.
26 Do nakasalok daw do kakahasanaw, naboya da a mayteytetedted tagapolotaw a yapo do bahay dan yokan saw. Ki abaw aran asa dyira napatola so kakamay na as katapos na sya, ta namo sa do insapata daw.
27 Ki si Jonatan, ki nadngey nabaw inpasapata naw ni āmang na dyirad soldādwaw. Dawa, pinatongdo naw tobwan no sarokod na a inigpet na, kan insawsaw na do tagapolotaw no yokan, as nakatapos na sya. Do nakataham naw so tagapolotaw, ki nadidiw na naydyegegla.
28 Do dāwri, inbahey dya no asaw dyirad soldādwaw a kāna, “Maingetaw nakaipaisapata ni āmang mo dyirad bōyot naw a bata na a ‘Maabay iyaw mahakay a koman so mākan sichangori a araw!’ Dawa, siraw soldādwaya, ki maychaplepleng dana sa.”
29 Binata ni Jonatan a kāna, “Si āmang ko, ki namarin so riribok do nasyon. Chiban nyo paw nakapaydyegegla kwaya do nakapanaham kwaya so dēkey lang do dya a tagapolot no yokan!
30 Maganaganay paro aba an komninan saw mahahakay so kadwan saw a sinamsam da dyirad kabōsor da saw? Dyori a arwaro paw nakadiman siras Pilisteowaw?”
31 Do dāwri a araw, nangdiman saw Israelita siras Pilisteo saw a makayapo do Mikmas manda do Aidyalon. Ki taywaraw kapaychaplepleng darana do kapteng.
32 Inalistwan daw nagtiliw siras sinamsam da saw a karniro, bāka, kan orbon a bāka. Pinarti da sa do tanaw a yanan da, as nakakan da sira a siraraya.
33 Sinpangan na, myan saw nakaibahey di Saulo a kon da, “Chiban mo pa. Ari sa maygaygatos soldādo saw di ĀPO do kakan das karni a siraraya.”
Ki inbahey ni Saulo dyira a kāna, “Taywara a nakagatos kamo di ĀPO! Mamadede kamo pa so rakkoh a bato dya.”
34 Binata na pa a kāna, “Magwaras kamo pa dyirad soldādwaya, as kaibahey nyo sya do kāda asa a yangay naw bāka kan karniro na dyaken. Do dya iyaw pangpartyan da sira, as kakan da sira. Basta dyi sa maygatos di ĀPO do kakan da so karni a siraraya.”
Dawa, kāda asa, ki inyangay naw bāka na do dāwri a ahep, as kan pinarti da sa daw.
35 Do dāwri, napatnek si Saulo so altar a para di ĀPO. Nyaw dāmo na nangparin so komwan.
36 Binata ni Saulo dyirad soldādo na saw a kāna, “Osoken ta sa lakatan Pilisteo saw an mahep, as kasamsam ta dyira mandan parbangon, as kan abaw tokosen ta aran asa dyira a mabyay.”
Initbay dan soldādwaw a kon da, “Parinen mo an āngo iktokto mo a kagaganayan a para dyimo.”
Ki binata no pādyaw dyira a kāna, “Iyahes ta pa do Dyos a manma ah.”
37 Dawa, inyahes ni Saulo do Dyos a kāna, “Mosok akori a manglakat dyirad Pilisteo saw? Iparawat mo sawri do tanoro dan Israelita saya?” Ki inatbay aba no Dyos iya do dāwri a araw.
38 Binata ni Saulo a kāna, “May kamo dya, inyo a tabo a mangidaōlo dyirad bōyot saya, ta chiban ta an āngo iyaw no gatosaya a naparin sicharaw.
39 Ta akmas kasigorādo no kasibibyay ni ĀPO a mangisalākan so Israel, iyaw naygatosaw, ki machita a madiman a aran si Jonathan pa a pōtot ko.” Ki abaw aran asa a naylilyak dyira.
40 Do dāwri, binata ni Saulo dyirad tabo a Israelita a myan daw a kāna, “Maytēnek kamo a tabo daw, as yaken kan iyaw pōtot kwaya a si Jonatan, ki maytēnek do dya.”
Initbay da a kon da, “Parinen mo an āngo iktokto mo a maganay.”
41 Naydasal si Saulo a kāna, “O ĀPO a Dyos no Israel, āngo ta dyi mo a inatbay iyaw pachirawatan mwaya sicharaw? An no naygatos, ki yaken mana iyaw no pōtot kwaya a si Jonatan, atbayen mo pa do Orim. Amnan nya gatos, ki pinarin dan tawotawo mo saya a Israel, atbayen mo pa do Tommim.” As do nakapagbobōnot daw, ki minohtot ngaran da Saulo kan Jonatan. As siraw no tawotawowaw, ki nalibri sa.
42 Binata ni Saulo a kāna, “Bonōten nyo an sino dyamen kan iyaw no pōtot kwaya a si Jonatan.” Ki minohtot ngaran ni Jonatan.
43 Inyahes ni Saulo di Jonatan a kāna, “Ibahey mo pa dyaken an āngo pinarin mo ta dawa?”
Dawa, initbay ni Jonatan a kāna, “Tod kwaw lang a tinahaman dēkeyaw a tagapolot no yokan do nakaosar kwaw so tobwanaw no sarokod ko a inigpet ko. Changori, nakasagāna ako a madiman.”
44 Binata ni Saulo a kāna, “Dosāen pakono yaken no Dyos so taywara an dyi ka madiman mo Jonatan.”
45 Ki inbahey dan tawotawo saw di Saulo a kon da, “Madimanori si Jonatan a iyaw napangābak so rakoh do Israel? Engga ah! Ta akmas kasigorādo no kasibibyay ni ĀPO, aba polos aran asa a boboh na masday do tana, ta pinarin naw nya sichangori a maynamot do sidong no Dyos.” Dawa, insalākan dan tawotawowaw si Jonatan tan dyi na maipadiman.
46 Do dāwri, nayhāt si Saulo a manglakat dyirad Pilisteo saw. As siraw Pilisteowaw, ki naybidi sa do tana da.
No Kapagballīgi ni Saulo Dyirad Kabōsor Na
47 Do nakapagāri ni Saulo do Israel, ginobat na sa tabo kabōsor naw do omdibon a siraw Moabita, Ammonita, Edomita, siraw ar-āri saw no Sobah, kan siraw Pilisteo saw. Aran dino a nachilabānan na, ki nagballīgi.
48 Sitotored a nachigobat kan inābak da saw Amalekita saw, kan isalākan na saw Israelita dyirad nangsamsamaw sira.
No Pamilya ni Saulo
49 Siraw pōtot saw a mahahakay ni Saulo, ki sa Jonatan, Isbi, kan Malki-swa. Iyaw matonengaw a pōtot na mabakes, ki si Merab. As iyaw adeadekeyaw, ki si Mikal.
50 No ngaran no baket naw, ki si Ahinoam a pōtot ni Ahimaas. No ngaran no komander naw no bōyot naw, ki si Abner a pōtot no marāan naw a si Ner.
51 Iyaw āmang naw ni Saulo, ki si Kis. Iyaw āmang ni Abner, ki si Ner. Sa Kis kan Ner, ki pōtot sa ni Abiyel.
52 Do ōnos no kapagāri ni Saulo, ki nāw na siraranggas a nachigobat dyirad Pilisteo saw. Kāda makaboya si Saulo so mahakay a masiglat do gobat mana matored, ki pinagsoldādo na.