9
No Kinasīrib kan Kabo no Arang
1 Napatnek si Kinasīrib so bahay na,
kan pinareyan na so papito.
2 Nagparti so binyay a pagpasken na, kan nagtimpla so palek,
as kan indasar na do lamisaan.
3 Tinoboy na saw tobotoboyen naw a mababakes a mangāwis.
Yapo do katotohosan saw a logar no idi, tinawagan da a kon da,
4 “Somdep kamo dya, inyo a machononot!”
Batahen na dyirad abos sīrib a kāna,
5 “Yangay nyo a kanen iyaw kanen kwaya,
kan inomen iyaw no tinimpla kwaya a palek.
6 Karwan nyo kayiyan nyowaya a machononot tan maynam byay nyo,
kan mayam kamo do rarahan no kapakaāwat.”
7 “No mangkosto so mangoy-oyaw, mangdaw so kapangiroromen.
No maydabdab so marahet a tawo, makahap so pakaynyinan.
8 Ilyak mwabaw mangoy-oyaw, ta tod nanchimo a ipsok.
An paydabdab mo masīrib, chadaw nanchimo.
9 Nanawhen mo masīrib, kan maypasīrib panchi.
Nanawhen mo malinteg, kan marapan panchiw chapatak na.
10 “Iyaw no kaanyib di ĀPO, ki siknanan no kinasīrib,
as no kapakatoneng so Masantwanaw, ki kapakaāwat.
11 Ta maynamot dyaken, maypāronchiw araw mo,
kan manayōnan anchiw tawtawen do byay mo.
12 An masīrib ka, manaham kanchi so kaganay na.
Ki an mangoyaw ka, maychatanyi ka maglak-am.”
13 Iyaw mabakes a abos arang, ki matagari.
Abaw kapakatoneng na, kan abaw chapatak na.
14 Maydisna do pantaw no bahay na,
do disnan do katotohosan saw a logar no idi.
15 Tawagan na saw homabas saw a
mayam a derecho do kwanan da, kan batahen na dyira,
16 “Somdep kamo dya, inyo a machononot!”
As kan batahen na pa dyirad abos sīrib saw a kāna,
17 “Iyaw natakaw a ranom, ki matami,
as no mākan a kanen a sililimed, maīmas!”
18 Ki chapatak daba a myan saw nadiman daw,
kan siraw bisīta naw, ari dana sa do Yanan Dan Nadiman.