10
No Proberbyo Saw ni Āri Solomon
1 Nya saw proberyo ni Āri Solomon:
No masīrib a anak, pasoyoten nas āmang na,
ki no abos arang a anak, pagmamayohen nas ānang na.
2 Abaw sirsīrbi no kinabaknang a yapo do kōsit,
ki mapabawa iyaw kinalinteg do kadiman.
3 Inonolay aba ni ĀPO a maptengan malinteg a tawo,
ki penpenen naw chalakam dan marahet a tawo.
4 No masadot a tawo, pomobri,
ki no magaget, bomaknang.
5 No anak a magrānyi an chimpo no kapagāpit, masīrib,
ki no anak a makaycheh do kapagrarānyi, makasnesnek.
6 Siraw bindisyon, akmay korona do oho no malinteg,
ki do dangoy no marahet, mangitayo so kinaranggas.
7 No pakanaknakman so malinteg a nadiman, makabindisyon,
ki no ngaran no marahet a nadiman, mahtanchi.
8 No masīrib, chasoyot naw mangrawat so bilbilin,
ki no masawat a abos arang, komwan do pakarārayawan.
9 No masingpet, masaray do kayam na,
ki no manakey do dyīdo, madoktalan anchi.
10 No magkosilap a machitōnos do madi, mapahtot so riribok,
ki iyaw matored a maydabdab, mapaychapya.
11 No dangoy no malinteg, akmay akbod a manoroh so byay,
ki no dangoy no marahet, maytayotayo so kinaranggas.
12 No kapangipsok, mapahtot so kapaydidiman,
ki no adaw, pakawanen naw tabo a nakagatos.
13 No kinasīrib, myan do bibi no makailāsin,
ki no babāot, para do bokot no kōrang so sīrib.
14 Siraw masīrib a tawo, nāw da mangpeh so kapakatoneng,
ki no masawat a abos arang, mangāwis so karārayaw.
15 Iyaw kinabaknang, akmay kōta dyirad mabaknang,
ki iyaw kinapobri, mayrārayaw so mapobri.
16 No tangdan no malinteg, mapalongo do maganay a kabibyay,
ki no ganansya no marahet, mangiyangay so kadōsa.
17 No mangadngey so kapangkosto, mangipaboya so rarahan a lomongo do byay,
ki no dya mangikaskāso so kapaydabdab, mapaychawaw.
18 No mangitayotayo so kapangipsok, maganay a maybayataw,
as iyaw maparaherahet, ki abos arang.
19 No nāw na masawat, nāw na pachisngenan gatos,
ki no mang-igpet so rida na, masīrib.
20 Iyaw kapaychirin no malinteg, akmay kagaganayan a pirak,
ki no kapangtokto no marahet, dēkey balor na.
21 Iyaw kapaychirin no malinteg, mangpayit so āro a tawo,
ki no abos arang, madiman anchi do sīrib na a kōrang.
22 Iyaw bindisyon ni ĀPO, pabaknangen naw tawo,
kan rapan nabas kapagmamayo.
23 No kapamarin so madi, igtal no abos arang,
ki no nainsirīban a kaparin, pakasoyotan manakaāwat.
24 Iyaw chananawa no marahet, mangay anchi dya,
ki no pakakdekden no malinteg, maitoroh anchi dya.
25 An mayparahan bagyo, mabo saw marahet,
ki do malinteg saw, nāw da a abos pandan.
26 Akmay soka a manghanyinyi so nyepen, kan akmay ahob a mangasdem so mata,
komwan masadot a tawo dyirad manoboyaw sya.
27 Iyaw no kaanyib di ĀPO, mangnāyon so byay no tawo,
ki no tawtawen dan marahet, ki maksayan.
28 Iyaw namnāma no malinteg, ki kasoyotan.
Ki no hahawen no marahet, ki mayparin aba.
29 Iyaw rarahan ni ĀPO, akmay kōta do malinteg,
ki karārayawan dyirad mamarinaw so marahet.
30 No malinteg a tawo, polos a dyinchi a mapakaro,
ki no marahet, omyan sabanchi do tanaya.
31 Iyaw dangoy no malinteg, mapahtot so kinasīrib,
ki no rida no nailabay do dyīdo, makteb anchi.
32 Do bibi no malinteg, mohtot omno a chirin,
ki do dangoy no marahet, mohtot dyīdo a chirin.