22
Siraw Linteg do Kapagbāyad
1 “An myan manakaw so bāka mana karniro, as partyen na mana ilāko na, machita a bayādan na so dadima bākaw takawen naw a bāka, kan bayādan na so apat a karniro takawen naw a karniro.
2 “An myan matiliw a manakanakaw a madama a maglikyat a somdep, as mamālo kan madiman, abaw pakagatosan nakadimanaw sya.
3 Ki an maparin nyaya do kamāraw, makagatos dana so kapangdiman.
“Iyaw manakanakawaw a matilw, machita a bayādan naw tabo a takawen na. Ki an abo pagbāyad na, iyaw mailāko a mayparin a adīpen a magbāyad so takawen naw.
4 “An iyaw takawen naw a binyay, ki masarakan dya a sibibyay pa, aran bāka, asno, mana karniro, machita a magbāyad so maypirwa.
5 “An myan mangiwayway so binyay na do tālon na mana kaobāsan na, as makakaro kan mangay a magārab do tālon no matarek, machita a bayādan na a yapo do kagaganayanaw a āpit na do tālon mana kaobāsan na.
6 “An myan maysosoh do hakawan na, as komayamkam apoyaw do hakawan no matarek, as masosohan saw naopwaw a dāwa mana dya naapit a dāwa mana intīrwaw a myan do hakawan, iyaw naysosohaw, ki iyaw magbāyad.
7 “An myan mapakapya so kwarta mana warawara na do karoba, as matakaw do bahay no mangapyaw sya, ki machita magbāyad so maypirwa so kāro an matiliw.
8 Ki amnan dya matiliw manakawaw, machita magparang akin bahayaw a pakaitalkan kwarta mana warawara do salapen dan okom, ta ipaboya na an iya mana dya iyaw manakanakaw so ipakapyaw no matarek.
9 “Do kāda kāso a kapaydiman no dadwa a maynamot do warawara a akmas bāka, asno, karniro, laylay, mana aran āngo a mabo, as paydimanan da, ki machita a mangay sa do salapen dan okom. Iyaw tongdohen daw no okom a dya akin dyira, machita magbāyad so maypirwa do karoba naw.
10 “An myan mangipaaywan so asno, bāka, karniro, mana kadwan pa a binyay do karoba na, as madiman mana mabigaran mana hapen da a abo makaboya sya,
11 machita a magsapataw mangaywanaw do salapen ni ĀPO tan ipaboya na a dya iyaw makagatos so ipaaywan naw no karoba na. An ikeddeng ni ĀPO a dya iyaw manakaw, machita a rawaten no akin dyiraw so binyay nyaya kan abaw machita bāyad na.
12 Ki amnan oyod a matakaw binyayaw do aywan na, machita bayādan na do akin dyiraw so binyay.
13 An malisalisay no bolaw a animal, machita a hapen naw panda naw a pamaneknek na, as kan rebbeng na paba bayādan malisalisayaw a binyay.
14 “An myan mamohod so binyay do karoba na, as mabigaran mana madiman a abo akin dyiraw sya, machita bayādan mamohodaw.
15 Ki an myan daw iyaw akin dyiraw so binyayaw, machita naba a bayādan. An maabāngan binyayaw, manawob danaw ābang naw a bāyad no madimanaw a binyay.”
No Kalintegan do Kapayngay a Tawo
16 “An myan mahakay a mangsolisog so balāsang a birhin a dya maitōlag a machikabahay, as kaoknod na, machita a bayādan na do inyapwan no balāsangaw iyaw prisyo no kabahayen naw a nobya, as mayparin dana baket na.
17 Ki an taywara a maskeh si āmang na a mangitoroh so balāsang naw do mahakayaw, alit na magbāyad mahakayaw so prisyo no kabahayen naw a nobya a birhin.
18 “Palōbosan mwabaw mabakes a manolib a mabyay.
19 “Aran sino a mangdakep so animal, machita a maipadiman.
20 “Aran sino a mangidāton so binyay a masosohan do aran āngo a dyos a dya si ĀPO, machita a maipadiman.
21 “Mamarin kaba so madi do gan-ganaet mana idadanes mwaba. Ta aran inyo, ki gan-ganaet kamo do kayan nyowaw do Egipto.
22 Gondawāyan mo sabaw bālo mana olīla.
23 An gondawāyan mo sa, as omāsog sa dyaken, sigorādo a adngeyen ko āsog daw.
24 Maāsot anchiw soli ko, kan dimanen konchi inyo do gobat. Mabālo anchiw baket nyo, as kan apabanchiw āmang dan anak nyo.
25 “An mapabohod ka so kwarta mo do asa dyirad tawo ko saw a mapobri, tolāden mo sabaw mangipaōtang saw a paanakan daw inpaōtang daw.
26 An manghap ka so kagay no karoba mo a pamagpetan mo so ōtang naw, machita pabidyen mo sakbay no kasdep no araw,
27 ta iya lang kagay naw panalob na so inawan naw. Āngo panchiw osaren na makaycheh? Anchan mangtanyis so kasidong dyaken, adngeyen konchi, ta māsisyen ako.
28 “Maychirin kaba so maikokntra do Dyos, mana mangabay kaba so pangōlo no tawotawo nyo.
29 “Maybabalay kaba a mangidāton yapo do āpit, palek, kan lana mo an chimpo no kapanoroh.
“Machita a itoroh mo dyaken matoneng a mahakay a anak mo.
30 Komwan met parinen mo do matoneng a bāka, karniro, kan kalding mo. Nonolay mo pa sa do ānang da mandad papito a karaw, ki itoroh mo sa dyaken do chawawaho naw a karaw.
31 “Inyo, ki maitatārek a para dyaken a tawotawo ko. Dawa, koman kamo aba so karni no binyay a nalisalisay no bolaw. Ipoha nyo a itoroh dyirad chito.”