21
Siraw Linteg a Maynamot Dyirad Adipen
(Deot. 15:12-18)
1 Binata pa ni ĀPO di Moyses a kāna, “Siraw nyaya a linteg, machita mo a ibahey dyirad Israelita saya:
2 An gomātang ka so adīpen mo a Hebreo, machita a magsīrbi dyimo do anem a katawen. Ki do chapapito naw a katawen, mawayawayaan a dya magbayād so kawayawaya naw.
3 An maychatanyiw mahakay do kaadīpen naw, maychatanyi met a komaro. Ki amnan sikakabahay do kaadīpen na, yonot naw kabahay naw a komaro.
4 An torohan āmo naw so baket na, as maymanganak, iyaw baket naw kan anak na saw, ki dyira no āmo naw, as kan maychatanyi a komaro mahakayaw.
5 “Ki an ibahey no adīpenaw a kāna, ‘Chadaw ko āmo kwaya, si baket ko, kan anak ko saya, as kan chakey kwabaw mawayawayaan,’
6 ayket, machita hapen āmo naw do salapen daw no okom. Sinpangan na, hapen nanchi do pantawaw mana mondora no pantaw, as katebbeng nas asaw a tadyinya na. Do dāwrinchi, adīpen narana do ōnos no kabyay na.
7 “An ilāko no āmang balāsang naw a mayparin a adīpen, mawayawayaan aba a akmas adīpen saw a mahahakay.
8 An dyi na chahwahok no balāsang āmo naw a mamidi sya a dyira na, ayket, basta palobōsan na a masobbot a mirwa ni āmang na. Aba polos kalintegan na a mangilāko sya do gan-ganaet maynamot ta matongpal nabaw kontrata na dya.
9 Amnan ipakabahay na do pōtot naw a mahakay, machita a torohan nas kalintegan a akmas kalinteganaw no balāsang na mismo.
10 An mangabahay nya āmo so asa pa a baket na, basta dyi na a hātan a torohan dāmwaw a baket na so kanen na, laylay na, mana kalintegan na a kabahay.
11 An dyi na sa parinen nya tatdo a pagrebbengan na, machita palobōsan naranaw baket naw, kan apaba polos mahap no mahakayaw a pinakabāyad na.”
Siraw Linteg do Kaparin a Kinaranggas
12 “Aran sino a mangmālo so tawo as madiman na, machita a maipadiman.
13 Ki amnan dyi na a īsad, as disgrasya a madiman a ipalōbos ni Āpo Dyos, maparin naw mayyayo do yanan a ikeddeng konchi.
14 Ki amnan īsad na a ranggasan a dimanen asaw a tawo, as mayyayo a machikāmit do altar ko, machita a goyōden a ikaro a ipadiman.
15 “Aran sino a mangkabil so āmang mana ānang na, machita a maipadiman.
16 “Aran sino a mangakaw so tawo tan ilāko na, mana matiliwan a myan pa dya, machita a maipadiman.
17 “Aran sino a mangabay di āmang mana ānang na, machita a maipadiman.
18 “An myan saw mahahakay a maydiman, as agsidan no asaw so bato mana danogen na, kan chadiman naba, ki mapopok do katri,
19 iyaw makanahwaw sya, ki makagatos aba an makatēnek pa, as makabidibidi pa do gagan a myan so sarokod. Ki aran komwan, machita bayādan naw manaho naw a tawo do kabalabalay naw, as kan chichiban na manda do kakomplito na mapyan.
20 “An myan mangmālo so adīpen na a mahakay mana mabakes, as madiman a maynamot do nawri, machita a madōsa.
21 Ki an mabyay paw adīpen naw katayoka no asa mana dadwa karaw, madōsa aba maynamot ta iyaw adīpen, ki dyira na.
22 “An siraw mahahakayaw a maydidiman, as myan mapaynyinan da mabōgi as maalisan, ki abaw dilikādo da may-ānang, iyaw makapaynyinaw sya, ki machita mamolta sigon do akdawen naw no lakay naw kan ipalōbos no pangokoman.
23 Ki amnan magdilikādo, no kadōsa na, ki byay panādi so byay,
24 mataw panādi so mata, nyepen panādi so nyepen, tanoro panādi so tanoro, kokod panadi so kokod,
25 sosoh panādi so sosoh, bigar panādi so bigar, mahmah a manyibaheng panādi so mahmah a manyibaheng.
26 “An myan mangsōlong so mata no adīpen na a mahakay mana mabakes as mabolsekan, machita a wayawayaan naw adīpenaw a panādi so mata naw.
27 As kan an myan mangsōlong so dangoy no adīpen naw a mahakay mana mabakes as matoppolan, machita a wayawayaan naw adīpenaw a panādi so nyepen naw.”
No Pagrebbengan no Akin Dyira
28 “An myan manangdo a tōro a bāka so mahakay mana mabakes as madiman, machita a maobor tōrowaw manda do kadiman na, as kan machita a dya kanen karni naw. Ki aran komwan, madōsa abaw akin tōrowaw.
29 Ki amnan sīgod a maganay a machisangdo tōrowaw a bāka kan naiballāag dana di āmo na, ki alit na a dyi na ipopok, kan makasangdo so tawo as madiman, machita maobor tōrowaw manda do kadiman na, as kan machita aran iyaw akin dyiraw, ki maipadiman.
30 Amnan bāyad iyaw akdawen dan kabagyanaw no madimanaw, maparin a sobboten naw byay naw do kabāyad na so aran āngo a chindaw da.
31 Iyaw nyaya linteg, ki mawnotan an adekey sangdohen no tōro.
32 Ki an mangsangdo tōro a bāka so adīpen a mahakay mana mabakes, iyaw akin tōrowaw, machita a magbāyad so tatdo a poho a plata a pirak do āmo naw no adīpen as machita a maobor tōrowaw a manda do kadiman na.
33 “An myan mangpakaro so talob no aridos mana naychadi so aridos kan dyi na tohongen, as makaaridos so bāka mana asno,
34 iyaw no akin aridosaw, ki machita a magbāyad do akin binyayaw. As iyaw madimanaw a binyay, ki dyira narana.
35 “Ki an myan machisangdo a tōro a bāka do tōro a bāka no matarek, as madiman na, machita a ilāko daw sibibyayaw kan paycharwahen daw naglākwan daw. Komwan kapaycharwa da sya so madimanaw.
36 Ki amnan sīgod a maganay a machisangdo tōrowaw, ki alit na a dya ipopok no āmo naw, machita a bākaw panādi so bāka. As iyaw madimanaw a binyay, ki dyira narana.”