97
1 Ọ kwa Ojejoje bụ eze;
t'ẹhu tsọo ndiphe ẹna.
Tẹ ndu bugbaa l'ikfuli
eze ẹnyimu tee ẹswa!
2 Urukpu; mẹ ẹkpuru-ọchi
nọ-pheru iya mgburumgburu.
Ọ bụ odobe-ẹka-ndoo;
mẹ ikpe, dụ maa
b'o gude nọdu l'aba-eze iya; l'achị.
3 Ọku evutajeru iya ụzo;
je ekegbushikota ndu
ọhogu iya l'ẹkemeke ọbule.
4 Ebemu, ọ lọru bẹ iphoro,
iya ngashịkotaru mgboko.
Iphe bụ onye -phụru iya nụ;
ẹphe anmahu jijiji.
5 Ugvu dazehuru l'ọ bụ ụmu l'ifu Ojejoje;
mbụ l'ifu Nnajiufu, bụ iya
nwe mgboko gbaa mgburumgburu.
6 Akpamigwe l'ọ ha atụ ọnu iya
l'ọ bụ onye doberu ẹka ndoo.
Ndiphe l'ẹphe ha l'elewaa ẹge
biribiri iya habe nshinu.
7 Iphe bụ ndu, abaru iphe
a pyịru apyịpyi ẹja;
mbụ ndu gude nte asa nsasa;
b'e mekotaru iphe-iphere.
Unubẹ nte l'unu ha;
unu baaru Nchileke ẹja!
8 Ndu Záyọnu nụru ẹge
nggụbe Ojejoje egudeje
ekpe ikpe; telahaa ẹswa.
Ndu kẹ Júda b'o meru t'ẹhu tsọo ẹna.
9 Kẹ l'ọ bụ nggụbe Ojejoje
bụ Ọkaribe-Kakọta-Nụ
lẹ mgboko
gbaa mgburumgburu.
E woliru ngu;
nggu akakọta iphe bụ agwa,
nọ lẹ mgboko-a l'ọ ha nshinu.
10 Tẹ ndu yeru Ojejoje obu
kpọkwaa ẹjo iphe-ashị;
kẹ l'ọ kwa ndu yeru iya
obu bẹ ooletaje ẹnya.
Yọ bụru ẹphe;
bẹ ọonafutaje l'ẹka ndu iwe.
11 Iphoro b'e meru t'ọ dụru
ndu doberu ẹka ndoo.
Ndu obu gụru iphoro
b'e meru tẹ ẹhu-ọtso-ẹna bụru nk'ẹphe.
12 Unu nọdu Ojejoje l'ẹka tee ẹswa;
unubẹ ndu doberu ẹka ndoo.
Unu tua ya ẹpha; l'ẹpha iya dụ nsọ.