96
1 Unu gụaru Ojejoje egvu ọphungu.
Tẹ ndiphe kpoo-gbaa
gụaru Ojejoje egvu.
2 Unu gụaru Ojejoje egvu;
jaa ya ajaja!
Unu rajẹ iya arara
mbọku-mbọku l'ọ bụ
Ojejoje bụ onye adzọje madzụ!
3 Unu kfukashiaru iphe bụ
mbakeshi k'iphe dụ biribiri, oomeebe.
Unu ekfuaru ndiphe k'iphe
dụ biribiri, oomeje.
4 Kẹle Ojejoje ha nshinu;
ọ gbakpọoru t'a jajẹ iya ajaja.
T'a tsụjekwa iya phụ egvu;
kẹ l'ọ kakọta iphe bụ agwa l'ọ ha.
5 Agwa iphe bụ mbakeshi
bụkota iphe e gude ẹka mee.
Obenu l'ọ bụ Ojejoje gude ẹka iya mee igwe.
6 Ùgvù; mẹ o-gbu-nwịi-nwịi; bẹ nọ iya l'ụzo ifu.
Ike; mẹ ọdu-biribiri abụru
iphe jiru ụlo iya, dụ nsọ.
7 Unubẹ ikfu, nọgbaa lẹ
mgboko;
unu kwabẹ Ojejoje ugvu.
Unu kfua ẹge ọ dụ-be
biribiri; mẹ ẹge ike iya habe nshinu.
8 Unu tụa ọnu ẹge Ojejoje
dụ-be biribiri; kẹ l'ọ gbaru iya.
Unu gude iphe bya anụ iya l'ogbodufu iya.
9 Unu yee uwe, dụ nsọ;
dụ biribiri gude baaru Ojejoje ẹja.
T'ẹhu nmajẹ unu anmanma
l'ifu iya; unubẹ ndiphe l'unu ha.
10 Unu kfuru iphe bụ mbakeshi
l'ọo Ojejoje bụ eze.
Mgboko b'e meru;
yo shihu ike;
k'ọphu bụ l'ẹ tọo fọ-wodu afọ-wo.
Yọ bụru Ojejoje
e-kpe ndiphe ikpe,
vudo nhamụnha.
11 Tẹ akpamigwe l'ọ ha
tee ẹswa;
ẹhu atsọo ndiphe ẹna.
T'eze ẹnyimu;
mẹ iphemiphe ọbule,
nọ iya nụ tụkokwa zee igidi.
12 Tẹ ẹgu ẹke, e meberu iphe;
mẹ iphemiphe ọbule,
nọ iya nụ tee ẹswa.
Teke ono; iphe bụ oshi,
nọ l'ọswa agụa egvu; tee ẹswa.
13 Ẹphe a-gụru Ojejoje egvu
kẹ l'ọobyawa okpe ndu eliphe ikpe.
Oo-gude odobe-ẹka-ndoo
kpee mgboko
mgburumgburu ikpe;
bya egude ire-lanụ kpee ndiphe ikpe.