73
Egvu-ọma, Ásafu deru
1 Ọkpobe okfu bụ lẹ
Nchileke dụru ndu Ízurẹlu
lẹ mma; mbụ ndu,
obu ẹphe gụru iphoro.
2 Obenu lẹ mbẹdua
phọdukpooru nwa gẹngu;
mẹ ọkpa echifu mu;
mbụ l'ọ phọdukpowarua nwanshị;
mẹ mu ta adụhe
ike vudo l'iphe mu vudo.
3 Kẹle mu wataru ojiru ndu
etu onwẹphe oke ẹpha
ijimẹnya teke mu phụru
lẹ ndu akirishi;
bẹ iphe dụru lẹ mma.
4 Ẹ tọ dụdu iphe atsụ ẹphe l'ẹhu.
Ẹphe shihuru ike;
ẹhu adụ ẹphe mma.
5 Iphe ta atsụdu ẹphe l'ẹhu ẹge ọotsu ndu ọdo;
ishi, akụje ndu ọdo ta akụ ẹphe.
6 Yọ bụru iya meru;
ekuku, ẹphe eku onwẹphe
abụru ẹphe iphe-olu.
Iphe-kpaa abụru uwe,
ẹphe eye l'ẹhu.
7 Iphe eshije ẹphe l'obu
nwẹnkinyi bụ ẹjo iphe.
Ẹjo idzu, ẹphe anọduje achị
abụru 'onwe nwunne.
8 Ẹphe anọduje achị madzụ ọchi;
l'anma onye ọbu kulakula.
Ẹphe egudeje ekuku,
ẹphe eku onwẹphe l'eyeshi madzụ egvu
iphe ẹphe e-me iya.
9 Ẹphe anọduje ekfubyishi
Nchileke, bu l'imigwe;
l'aharu ndiphe kpaakpaa.
10 Ọo ya meru iphe ndu nke
mu ghakọberu tsoru ẹphe;
kwetakota iphemiphe ọbule, ẹphe ekfu.
11 Ẹphe asụje: “?Nanụ ẹge
Nchileke e-shi maru?
Ọkaribe-Kakọta-Nụ;
?ọ maru ngụnu?”
12 Ọwaa ẹge ndu akirishi dụ:
Ẹ tọ dụdu iphe eruje ẹphe l'ẹhu;
ọ bụ l'ẹku anọdujekwanu abyaru ẹphe.
13 Mbẹdua, haru obu mu t'ọ gụa iphoro-a;
?ọ bụ l'ọo eswe b'ọ bụ mu tọo.
Tọo ẹge ono, mu sefuru
ẹka l'iphe dụ ẹji ono:
?ọ bụwa mu kẹ mmanu tọo.
14 Iphe bụ eswe, mụtaru amụta;
bẹ ịinoduje anụ mu aphụ;
nggụbe Nchileke.
Ẹ to nwedu mbọku,
mu nọghajeru;
t'iphe-ẹhuka bẹ dakfuta mu.
15 Mu -sụ lẹ mu e-dokwa;
yọ dụ l'ọ bụ mgbamu;
mu agba iya ụnwu Nchileke.
16 Ọobuje teke mu jeru ome
t'iphe ono doo mu ẹnya;
yo gbe bụru mu iphe-ẹhuka;
17 gbururu jeye mu abya abahụ
l'ụlo nsọ kẹ Nchileke.
Ọ bụ teke ono b'o doru mu ẹnya;
mbụ iphe e-mekochaa mụaru ẹphe;
18 iiwojeru ẹphe dobe l'ẹke echi ẹturu;
gbahaa ẹphe ẹka; ẹphe abya adashịa;
bụru kpurupyata.
19 Ẹ ta anọdu ọphu barụ nwishi;
ẹphe abụru kpurupyata;
kpofu l'ọ bụ ẹswa.
20 Ẹphe adụje l'ọ bụ nrọ;
o -be l'ụtsu; a zahaa ya.
Ọ kwaphụ ẹge ono;
bẹ ẹphe achịhuje l'ifu
nggụbe Ojejoje teke i gbalihuru.
21 Teke ono, mu shi agụ aphụ,
iwe jiru obu mu ono;
22 bẹ mu shi bụru onye eswe;
to nwe iphe mu maru.
Mu eshikwa dụ ngu
l'ọ bụ anụ-ẹgu-ẹgbudu!
23 Obenu lẹ mu anọje ngu ntse tekenteke;
nggu egude ẹka-ụtara ngu sekputa mu.
24 Iishije l'ike, ịidu mu l'eduzi mu ụzo;
k'ọphu bụ l'e megee;
bẹ ịi-nabata mu l'ọdu-biribiri ngu.
25 ?Bụ onye bẹ mu nweru l'imigwe,
abụdu nggụbedua?
E tọ dụkwa iphe nọ lẹ
mgboko-a, ẹgu iya agụ mu;
gbahaa nggụbedua.
26 Ike agvụje anụ-ẹhu mu;
gvụ obu mu.
Obenu l'ọ bụ Nchileke bụ
onye emeje tẹ mu shihu ike;
bụru iya bụ òkè-iphe mu
gbururu jeye lẹ tutu yoyo.
27 Ndu nọ ngu ote-ẹnya a-la l'iyi;
ndu ẹ ti gudedu ire ẹphe
ẹka; bẹ ii-me t'ẹphe bụru kpurupyata.
28 Obenu lẹ mbẹdua b'ọ dụ tẹ
mu nọdu Nchileke ntse.
Mbẹdua wowaru Nnajiufu,
bụ Ojejoje;
mee a-gbabe-a-dzụru nke mu.
Ọo ya bụ lẹ mu a-kọkota
iphe dụ mma, iime l'ẹhu mu.