72
Egvu, Sólomọnu deru
1 Nggụbe Nchileke;
menua tẹ eze kpeje ikpe ẹge
nggụbedua ekpe!
Menua tẹ nwatibe eze
dobe-ẹka-ndoo ẹge
nggụbedua doberu;
2 k'ọphu oo-kpeje ndibe ngu ikpe, dụ mma;
gbaaru ndu aakpa ẹhu ọdzori.
3 Tẹ ugvu ugvu ndu k'eze iya
mee t'ẹhu dụ ndiphe agu.
Ugvu ugvu ndu kẹ nshịi
emee t'ẹphe gude umere
ẹphe koshi l'ẹphe bụ ndu doberu ẹka ndoo.
4 Ndu aakpa ẹhu;
bẹ eze a-gbaru ọdzori;
dzọo ụnwegirima ndu
ẹ ta dụdu ẹge ọ haru ẹphe;
dzọpyashia ndu ono,
akpa ẹphe ẹhu ono ishi.
5 Ẹphe a-nọdu abaru ngu ẹja
gbururu jeye teke ẹnyanwu;
mẹ ọnwa a-nobebe;
mbụ tsube l'ọgbo sweru ọgbo.
6 Ọo-dụ l'ọ bụ mini, achị l'ẹke, a sụru asụsu;
mbụ l'ọ bụ ẹke igwe
ayọru alị tẹshiteshi mini.
7 Teke ono, ọo-nọdu achị ono;
bẹ ndu doberu ẹka ndoo
a-jà ajàjà.
Ẹhu-agu achịko ẹkemeke jegbaru;
jeye teke ọnwa ta anọhedu.
8 Ọo-bụru eze chịa ndiphe
tsube l'eze ẹnyimu rua
eze ẹnyimu; mbụ tsube lẹ
Ẹnyimu Yufurétusu jeye
l'ẹke mgboko jeberu.
9 Ndu bu l'echi-ẹgu a-bya
ebyiaru iya ikpere l'alị;
ndu ọhogu iya achịchiaru
iya ọnu achịchi l'ẹja.
10 Ndu eze ndu Tashishi;
mẹ ndu bugbaa l'ikfuli
a-nọdu atụ ụtu anụ iya.
Ndu eze ndu Sheba yẹle
kẹ ndu Seba e-wotaje iphe bya anụ iya.
11 Iphe bụ ndu bụ ndu eze
l'ẹphe ha e-byishiru iya ikpere.
Iphe bụ mbakeshi e-jeru iya ozi.
12 Kẹle ndu ẹ ta dụdu ẹge
ọ haru ẹphe -rakua ya;
bẹ ọo-dzọfuta ẹphe;
mbụ ndu iphe-ẹhuka byaru;
to nwe onye a-gbaru ẹphe mkpu.
13 Ọo-phụru ndu ike ta anọdu;
mẹ ndu ẹ ta dụdu
ẹge ọ haru ẹphe imiko;
bya adzọo ndu ẹ ta dụdu
ẹge ọ haru ẹphe ndzụ.
14 Ọo-nafụta ẹphe l'ẹka
ndu akpa ẹphe ẹhu;
mẹ l'ẹka ndu ẹnya enwu ọku;
kẹle ndzụ ẹphe dụ iya mkpa nshinu.
15 Tẹ ndzụ eze bụkwaru ndzụ ogologo.
T'a nụjekwa iya
mkpọla-ododo ndu Sheba!
Tẹ ndiphe kfujekwaru nụ
Nchileke l'okfu ẹhu iya;
ẹphe agọjekwaru iya phụ
ọnu mbọku-mbọku.
16 T'iphe a kụru akụku tụkwaa
ụda; tụa nggodo l'alị-a.
Tẹ iphe a kọberu l'eli ugvu
mehukwa l'ọ bụ iphe
e meberu lẹ Lébanọnu!
Tẹ ndu mkpụkpu ono
zụkwaa l'ọ bụ ẹswa l'igu!
17 T'ẹpha eze nọdukwa ojejoje;
ụdu iya edzuru ẹkemeke
l'ọ bụ ẹnyanwu, nọ l'igwe.
Ee-shi l'ẹka iya gọoru
iphe bụ mbakeshi ọnu;
ndiphe l'ẹphe ha ekua
ya onye a gọru ọnu.
18 T'ajaja bụru kẹ
Ojejoje, bụ Nchileke;
mbụ Nchileke kẹ ndu Ízurẹlu;
mbụ onye bụwa iya phụ nwẹnkinyi;
bẹ emeje iphe dụ biribiri.
19 T'ajaja bụkwaruphu kẹ
ẹpha iya ono, dụ biribiri
ono jeye lẹ tutu yoyo!
Tẹ biribiri iya chịkokwa
mgboko dzuru!
Ono kwa ẹge ọ dụ.
Ono kwa ẹge ọ dụ!
20 Ono kwa ishi ẹke Dévidi Jesi
kfubeberu nụ Nchileke.