45
Ẹ́vù, a raru nụ onye ishi egvu tẹ Ụnwu Kora gụa. T'e gude olu egvu “Okfukfulike” gụa ya egvu ẹswa-nwanyi
1 Okfu ọma jiru mu ọnu;
tẹ mu kfuru yeru eze.
Ire mu dụkwa l'ọ bụ
mkpịshi-ẹkwo onye maru ode ẹkwo.
2 ?O nweru onye ka ngu ọma mma.
Okfu, shi ngu l'ọnu bụ iphe-ọma;
kẹle Nchileke gọwaru ngu ọnu, a-nọ ojejoje.
3 Nggụbe O-gbua-o-turu-ugo;
wota ogu-mbeke ngu kee l'ukfu!
Wota ọdu-biribiri yẹle
o-gbu-nwịi-nwịi yee l'ọ bụ uwe!
4 Nọdu l'ụgbo-ịnya ngu;
nggu egude ọ-dụ-ugvu ngu
gbaa wugowugo
lụaru ire-lanụ ọgu;
mẹ owozita onwonye alị;
mẹ odobe-ẹka-ndoo.
Gude ike ngu mee iphe dụ biribiri.
5 Tẹ akfụ ngu ono, atsụ nkọ ono
mejelephu kẹ tsụu lẹ
meji ndu ọhogu nggụbe eze.
Tẹ iphe bụ mbakeshi
dajẹkwaa ngu kpurumu l'ifu.
6 Nggụbe Nchileke;
ọ bụ ẹge ị bụ eze nta-a;
bụ ẹge ịi-bụru iya gbururu jeye lẹ tutu yoyo.
Ọ bụ ikpe, dụ mma;
b'i gude achị.
7 Odobe-ẹka-ndoo adụje ngu mma;
akirishi adụkwa nụ ngu ashị.
Ọo ya meru iphe Nchileke, bụ Nchileke ngu
shi lẹ manụ ẹhu-ọtso-ẹna,
ọ wụru ngu l'ishi
mee t'ị kakọta ndu ọgbo ngu.
8 Uwe-eze ngu l'ọ ha;
tụkoru eshi mẹeru mẹeru;
l'eshi alowe;
l'eshikwaphu kashia kashia.
Une, a nọ l'ufu-eze akpọ;
emeje t'ẹhu tsọo ngu ẹna;
mbụ ufu-eze, e gude
ọdu-enyi memaa emema.
9 Ụnwanyi ibe ngu,
aakwabẹ ugvu;
hakwaru bụru ụnwada eze.
Ọ bụ l'ẹka-ụtara ngu;
bẹ eze-nwanyi vudo.
Iphe o yeru l'ẹhu b'e gude
ọkpobe mkpọla-ododo,
shi Ofi.
10 Ngabekwa nchị nggụbe
ada-eze!
Byiko; rịkwaa iphe-a,
mu abya ekfukfu-a arịri!
Zahakọtakwa ndibe unu;
mẹ ndu nna ngu phẹ!
11 Lẹ mma, ịima meekwaru;
nggu agụ eze agụgu.
Keshinu ọ bụ iya bụ
onye nwe-ngu nụ;
kwabẹjekwa iya ugvu!
12 Ndu Táya a-byakwa ngu
ọnya-ko iphe;
ndu nweru iphe awataru
ngu omeru ọhuma;
ẹge ee-shi t'ẹphe nọdu ngu l'obu.
13 Ada-eze bẹ nọ
l'o-gbu-nwịi-nwịi iya;
e duba iya l'ụlo.
Uwe iya b'e gude òwúú
mkpọla-ododo kwee.
14 E yeru iya uwe,
a kwamaru akwama;
duru l'ejekfu eze;
ụnwu-mgbọko ibe iya etsoru iya.
Ẹphebedua bẹ eedukwaphu edujeru eze.
15 Ẹhu atsọ ẹphe ẹna; ẹphe ete ẹswa;
l'ẹke eedu ẹphe abahụ
l'obu-eze.
16 Nggụbe eze; ọ bụ ụnwu ngu
a-nọdu l'ọzori nna ngu oche phẹ.
Ọ bụ ẹphe; bẹ ii-me t'ẹphe
bụru ishi lẹ mgboko mgburumgburu.
17 Mu e-me t'ẹ ba azahashị
ẹpha ngu azaha tsube l'ọgbo rua l'ọgbo.
Ọ ya bụ l'iphe bụ mbakeshi
a-nọdu ekele ngu ekele
gbururu jeye gbururu.