44
Ẹ́vù, a raru nụ onye ishi egvu tẹ Ụnwu Kora gụa
1 Nggụbe Nchileke;
ayi gudewa nchị ayi nụa;
nna ayi oche phẹ akọwaru
ayi iphe i meshiru
l'oge nk'ẹphe; teke ndiche.
2 Ẹphe kọru ayi l'ọo
nggụbedua gude ike ngu
chịshia iphe bụ mbakeshi l'alị ẹphe;
bya eworu ndu nke ngu dzaa l'alị ono.
Ọhamoha ono b'i mebyishiru;
bya emee nna ayi oche
phẹ;
ẹphe ajàa ajàjà.
3 Ẹ tọ bụdu ngwa-ọgu;
bẹ ndu nke ngu gude lụta alị ono;
tọ bụ l'ike k'ọkpu-ẹka ẹphe.
Ọ bụ l'ike nke ngu yẹle
ọkpu-ẹka nke ngu;
mẹ eswiru ono, i swiru
ẹphe ono;
bẹ ẹphe gude lụta iya;
kẹ l'i yeru ẹphe obu.
4 Ọ bụ nggu bụ eze mu;
bụru Nchileke mu.
Ọ bụ nggu emeje t'ụnwu
Jékọpu lụ-gbua l'ọgu.
5 Ọ bụ nggu; bẹ ayi anọje l'ẹka;
chị-phu ndu ọhogu ayi azụ.
Yọ bụru ẹpha ngu;
bẹ ayi egudeje dzọo ndu
ọhogu ayi pyakapyaka.
6 Mu ta achịduru ụkfu kwẹe l'akfụ, mu chị;
ọphu ogu-mbeke mu 'adzọdu mu.
7 Obenu l'i meru t'ayi lụ-gbua ndu ọhogu ayi.
Ndu ayi dụ ashị b'i kpuru ifu lẹ ntụ.
8 Ọ bụ Nchileke; bẹ ayi egudeje
asa nsasa mbọku-mbọku;
bụru nggụbe Nchileke;
bẹ ayi a-nọdu aja ajaja
gbururu jeye lẹ tutu yoyo.
9 Obenu lẹ nta-a;
b'ị jịkawaru ayi;
bya ekpuwa ayi ifu lẹ ntụ.
Ọphu i tsojehedu ndu sọja ayi eje ọgu.
10 Ị haru ndu ọhogu ayi;
ẹphe achị-phu ayi azụ;
ndu ayi dụ ẹji l'ẹnya abya
atụko ẹku ayi gwoo tụtua.
11 Ị chị-waru ayi haa l'ọ bụ atụru,
e doberu k'egbugbu;
tufashiwa ayi l'iphe bụ mbakeshi.
12 I reshiwaru ndibe ngu tọrotoro;
l'ẹ b'ọ dụ uru, i ritaru l'ishi ẹphe.
13 I mewaru ayi; ndu obutobu
ayi l'azụru ayi ukwe;
l'achị ayi ọchi;
l'aja ayi ewena.
14 I mewaru ayi; iphe bụ
mbakeshi egude ayi anma ẹjo ẹtu.
Ndiphe -phụa ayi;
a kpọ-yiaru ayi ukuvu.
15 Mbọku-mbọku;
bẹ aanọduje eme mu
iphe-iphere.
E mewaru mu ifu kpube mu lẹ ntụ;
16 kẹle ndu ọhogu mu;
mẹ ndu eme t'ẹphe melata
ụgwo-iphe e meru ẹphe
anọduje azụru mu ukwe;
l'ekfubyishikwa mu phu.
17 Iphe-a l'ọ ha mekotaru ayi;
e guderu l'ayi ta zahabụa ngu;
tọ bụ l'ayi dakajẹru ndzụ, ayi lẹ nggu gbaru.
18 Obu ayi ta lụfubua l'ẹke ịino;
ọphu ọ bụdu l'ayi dakajẹru ekemu ngu.
19 Obenu l'i gweru ayi rakaraka
wụshiru nkụta-ọswa.
I gudewa oke ẹkpuru-ọchi kpuchia ayi.
20 Ndẹge ọ bụ l'ayi zaharu Nchileke ayi;
wata ọbaru agwa ndu alị ọdo ẹja;
21 ?Nchileke ta ga amadụnua tọo;
keshinu ọ makọtaru iphe madzụ arị l'obu?
22 Ọ bụ l'okfu ẹhu ngu;
b'ẹ to nwedu mbọku, anwụhu
ta anọdujedu achị ayi.
Aanọduje eme ayi l'ọ bụ atụru,
a chịtaru eje egbugbu.
23 Nnajiufu; ehu nụ etehu!
?Bụ ngụnu kparu iphe iiku mgbẹnya?
Tehu etehu; ba ajịkashi nụ ayi tụgbuwararu!
24 ?Bụ ngụnu meru iphe
ẹ ti yeheduru ayi ọnu?
?Bụ ngụnu meru iphe
ị zaharu iphe-ẹhuka, ayi eje;
mẹ ẹhu, aakpa ayi?
25 E mewaru ayi; ayi adaa; nmaa ẹpho l'alị;
mbụ l'ishi ruakwaru ayi alị.
26 Gbeshi nụ yeru ayi ẹka!
Gude kẹ n-yemobu ngu gbafụta ayi!