41
Egvu-ọma, Dévidi deru nụ onye ishi egvu
1 Ọnu-ọma bụ k'onye
eyejeru ndu ụkpa ẹka;
kẹle Ojejoje a-dzọfuta iya
teke ooje iphe-ẹhuka.
2 Ojejoje a-kwachi iya;
dobe iya ndzụ.
Yọ bụru onye a gọru
ọnu-ọma nụ lẹ mgboko.
Ojejoje te enwuduru iya eye;
tẹ ndu ọhogu iya mee ya
ẹge dụ ẹphe mma.
3 Ojejoje a-gbaru iya mkpu
teke ome-l'ẹhu tụru iya ye l'ụlo;
mee t'ọ gbakerehu l'iphe bụ ẹhu-ọtsu-ụme iya.
4 Mu asụ: “Nggụbe Ojejoje;
phụnuaru mu imiko!
Menua mu tẹ mu kọrohu l'iphe eme mu nụ;
kẹle mu mewaru ngu ẹji!”
5 Ndu ọhogu mu anọduje
ekfuru mu ẹjo okfu; sụ:
“?Bụ teke ole; bẹ mu a-nwụhu;
t'a zahaa mu lẹ mgboko-a?”
6 Madzụ -bya mu ajịji;
yoo kfuru mu iphe, ẹ te shidu iya l'obu.
Iphe ọ byaru; abụru t'ọ bya
anụta iphe dụ ẹji l'ẹhu mu.
Ọ -lụfulephu;
yọ wata edori ẹhu mu.
7 Iphe bụ ndu, mu dụ ashị
anọduje adzụ-phe
taphatapha l'ekfubyishi mu.
Ọ bụlephu iphe, bụ iya
katsụkpo ẹji;
bẹ adụje ẹphe t'o mee mu.
8 Ẹphe asụ: “Tụswekwa!
L'ọ kwa 'o-nwe-agwọta byaru mu.
L'ọ tụ-ruakwaru mu azụ alị;
k'ọphu bụ lẹ mu te
egbeshihekwa egbeshi ọdo.”
9 Mbụ jeyekpo l'onye ọphu
mu ẹya eshi ọkpobe ọnya;
bụru onye mu dakoberu;
mbụ onye mu l'iya
gba mgba ria nri mu;
bẹ gbeshiru nụ;
chọlahaa ẹge ee-shi t'ọ tsụru mu.
10 Ọlobu; nggụbe Ojejoje;
phụnuaru mu imiko!
Meeru tẹ mu gbakerehu;
k'ọphu mu a-kfụ ẹphe
ụgwo iphe-a, ẹphe eme
mu-wa.
11 Mu marua lẹ mu nọ ngu l'obu;
kẹ l'ẹ ti kwedu tẹ ndu
ọhogu mu mekputa mu.
12 Keshinu ọphu ụta ẹ-ta dụdu mu l'ẹhu;
bẹ ịi-pali mu-a;
dobe onwongu l'ifu;
tẹ mu nọdu gbururu jeye lẹ tutu yoyo.
13 T'e tua Ojejoje ẹpha;
mbụ Nchileke kẹ ndu Ízurẹlu;
gbururu jeye lẹ tutu yoyo.
Ono kwa ẹge ọ dụ.
Ono kwa ẹge ọ dụ.