40
Egvu-ọma, Dévidi deru nụ onye ishi egvu
1 Mu takwaru nshi ngaberu Ojejoje;
gbururu jeye yọ ngabe nchị; nụa olu mu.
2 Yọ bya anwụfuta mu lẹ nsụ, anyị ishi ẹdzu;
mbụ kufuta mu l'ẹpoto ụra, mu nọ;
bya eworu mu kfụbe l'eli
agbụranyi mkpuma;
mee mu; mu evudoshia ike.
3 Yọ bya eworu egvu
ọphungu ye mu l'ọnu.
Mu egude egvu ono wata
ọja Nchileke ayi ajaja.
Aa-dụ l'igwe phụ iphe meru nụ;
wata ọtsu egvu.
Ẹphe alaphuta azụ bya adakobe Ojejoje.
4 Ọnu-ọma bụ k'onye,
bụ Ojejoje b'ọ dakoberu;
onye ẹ te eledu ndu, eku
onwẹphe ekuku ẹnya l'ifu;
too tso ndu chịru ụkfu
kwẹe l'iphe ẹ-ta dụdu iphe ọ bụ.
5 Nggụbe Ojejoje,
bụ Nchileke mu;
iphe dụ biribiri, i meshiru;
mẹ iphe ịichi idzu k'omeru ayi;
bẹ hakwa l'igwe.
Ọphu ọ dụdu onye a-dụ ike
gụshi-geeru ngu iya.
Ọ -bụru l'ọo tẹ mu gụa ya nanụ nanụ;
bẹ ọo-ga abụkwa
'agụta agụta.
6 Iphe agụ ngu nụ ta bụkwa
t'a gwajẹ ngu agwagwa;
m'ọ bụ t'e gwotaru ngu ngwẹja.
Obenu l'ị hawaru mu ẹnu nchị.
Ngwẹja-ukfuru;
mẹ ngwẹja-iphe dụ ẹji
ta dụdu ọphu jiru ngu ẹpho.
7 Ya ndono; mu asụ:
“Ọwaa mu Nchileke!
Mu byawaru tẹ mu mee
ẹge e deru kẹ nke mu lẹ Ẹkwo Ekemu.
8 Nggụbe Nchileke mu;
iphe dụ mu mma bụ tẹ mu
mee iphe bụ uche-obu ngu.
Ekemu ngu anọjele mu phụ l'obu tekenteke.”
9 Mu gudewa ọnu mu kfua
k'odobe-ẹka-ndoo ngu l'edzudzu ọha.
Nggụbe Ojejoje;
ị mawaru lẹ mu te dobedu ọnu ndoo.
10 Mu ta asumijedu
odobe-ẹka-ndoo ngu
l'obu mu.
Mu ekfukashịje l'ị bụ
o-me-g'o-kfuru;
bụru onye ndzọfuta;
ọphu mu 'ahadu okfuru
ọha l'ophu ẹge i yetaberu madzụ obu;
bụru onye ire-lanụ.
11 Nggụbe Ojejoje;
byiko ba ahakwa mu ọphuru imiko.
T'ọ bụkwaru n-yemobu
yẹle ire-lanụ ngu a-nọdu
eche mu mkpụrumkpuru!
12 Iphe-ẹhuka, bụ 'o-nwe-agụta
gbaakwaru mu mgburumgburu;
ẹjo iphe mu meshiru
anọ-chiwa mu ụzo;
k'ọphu bụ lẹ mu ta aphụhedu ụzo.
Ọ ka ẹgbushi, nọ mu l'ishi l'igwe.
Nta-a; bẹ mu ta mahẹkwa ẹge mu e-me iya.
13 Nggụbe Ojejoje;
t'ọ bụnuru uche ngu t'ị dzọo mu!
Bya nụ nta-a; bya eyeru mu ẹka!
14 Tẹ iphere bụkwaru kẹ ndu achọ ishi mu;
mbụ t'ẹkwo-njị jịkwaa ẹphe.
Kpua ẹphe ifu l'alị; chịlala ẹphe azụ;
mbụ ndu arị t'ẹ b'ọ dụru mu lẹ mma;
kpua ẹphe ifu l'alị;
chịlala ẹphe azụ.
15 Tẹ iphere bụkwaru kẹ ndu
azụru mu ukwe;
t'ẹhu dakwaa ẹphe kọo.
16 T'iphe bụ ndu achọ ngu nụ;
bụkwaru ndu ẹhu a-nọduje atsọ ẹna;
ẹphe anọdu ngu l'ẹka tee ẹswa.
Tẹ iphe ẹphe a-kpụru l'ọnu;
mbụ ndu ọ dụ t'a sụ l'ị
dzọfutaru ẹphe bụru:
“Ojejoje dụ egvu!”
17 Obenu lẹ mbẹdua bụ onye ụkpa;
bụkwaruphu onye aka ẹka ịkarikari.
Obenu lẹ Nnajiufu arịle-e ọriri ẹhu mu;
mbụ l'ọ bụ nggụbe
Nchileke mu bụ onye
eyejeru mu ẹka;
bụru onye adzọje mu nụ.
Nggụbe Nchileke nke mu;
ba akpọkwa ụkfu!