38
Egvu-ọma, Dévidi gụru gude nyataru Ojejoje iphe
1 Nggụbe Ojejoje; be egudekwa
ọvuma baaru mu mba;
ọphu i gudekwa
oke ẹhu-eghughu
hụ̀a mu àhụ̀hù!
2 Kẹ l'akfụ ngu baakwaru mu l'ẹhu kẹ tụu.
I meruwaru mu ẹhu.
3 Ẹhu-eghughu ngu mewaru;
ẹhu ta adụjehe mu npho.
Ẹjo iphe, mu meshiru;
emewa; ọkpu, nọ mu l'ẹhu
amịkota mu wọngu-wọngu.
4 Kẹ l'ẹjo iphe, mu meshiru
ripyabeekwaru mu.
Ọonyitabewa mu ẹra;
k'ọphu bụ lẹ mu ta
dụhedu ike evuvu iya.
5 Ọnya, aba mu nụ
rehuwaru erehu; l'eshi nshi.
Ishi iya abụru eswe, mu meru.
6 Mu kpọ-kfuwaru-a
akpọ-kfuru; dẹe ẹka l'agba.
Mkpụrumkpuru;
bẹ mu agụkota aphụ.
7 Okpurukpu-azụ tụkokwa
eshi mu nwaranwara.
Ẹ t'o nwehekwa ẹke ẹhu
dụ mu npho; m'ọo nanụ.
8 Ụvo ta dụhekwa mu;
ike agvụwa mu.
Obu te gvuhekwaru mu egvuru;
k'ọphu bụ l'ọ bụwaa ude bẹ mu atsụ.
9 Nggụbe Ojejoje; iphe bụ iphe
agụ mu nụ b'ị makọtaru.
Ude, mu atsụ bẹ ta bụhedu k'edomi.
10 Obu akfụ mu
gbudungu-gbudungu;
ọphu ike adụhedu mu.
Mu te egbe aphụhedu ụzo l'ẹnya.
11 Ndu ọ̀nyà mu phẹ;
mẹ ndu ọyi mu phẹ ezewaru mu ezeru.
Ishi iya abụru iphe-ẹhuka ono,
dakfutaru mu nụ ono.
Ndu obutobu mu phẹ
jewaru je evudo ote-ẹnya.
12 Ndu achọ ishi mu
gbashịwaru mu ọnya.
Ndu eme t'ẹphe
meka mu iphe anọdu l'idzu
ẹge mu e-shi laa.
Ọ bụlephu idzu ẹge ẹphe
e-shi dzụa ẹjo-ire bẹ ẹphe
anọje: eswe l'ẹnyashi.
13 Mbẹdua dụkwa l'ọ bụ onye
ada nkịchi, ẹ-ta dụdu iphe ọonuje;
dụkwaphu l'ọ bụ onye te ekfudu okfu,
ẹ te nwedu okfu, eshije iya ọnu.
14 Mu dụlephu l'ọ bụ onye
eekfu okfu eyeru;
ọphu o yedu ọnu;
kẹ l'ẹ tọ dụdu iphe eekfu, ọ nụru.
15 Nggụbe Ojejoje;
mu nọduwa ngabẹru ngu.
Ọ bụ nggụbe Nnajiufu,
bụ Nchileke mu, a-za mu
oku, mu eku ngu.
16 Mu ekfu; sụ: “Be ekwekwa
t'ẹphe zụaru mu ukwe;
m'ọ bụ t'ẹphe kulahaa
onwẹphe ẹge ẹphe ẹ-ta
hadu teke ọkpa chiswahuru mu.”
17 Ishi iya abụru lẹ mu angawa nganga k'adada.
Ẹhu ahụwa mu ọku.
18 Mu ekfushiwa iphe dụ ẹji, mu meru.
Ẹjo iphe mu meshiru atsụwa mu l'ẹhu.
19 Ndu ọhogu mu dụkwa l'igwe; shihu ike.
Ndu kpọru mu ashị
l'ẹ b'ọ dụ iphe mu meru ẹphe
ahakwaphu l'igwe.
20 Ndu egudeje ẹjo iphe
kfụa ụgwo iphe-ọma,
e meru ẹphe
anọduje ekfuru mu
ẹjo-okfu;
kẹle mu anọduje eme iphe dụ mma.
21 Ba ahakwa mu; nggụbe Ojejoje!
Nggụbe Nchileke mu;
ba anọdukwa mu ote-ẹnya!
22 Mee ẹgwegwa bya agbaaru mu mkpu;
nggụbe Ojejoje, bụ onye ndzọfuta mu!