37
Egvu, Dévidi deru
1 Ba aphụjekwaru ndu
eme ẹjo iphe ẹnya-ụphu;
ọphu i kojekwaru ndu
ẹ te dobedu ẹka ndoo okopho.
2 Kẹ l'ẹ ta aa-nọkwa ọphu baru ishi;
ẹphe anwụa kpaa l'ọ bụ ẹwu;
kpọshihu nkụ l'ọ bụ iru oshi.
3 Dakobe Ojejoje; meje iphe dụ mma!
Buru l'alị ono bụru
o-me-g'o-kfuru!
4 Tẹ ẹhu-ọtso-ẹna ngu bụru lẹ Ojejoje;
k'ọphu ọo-nụ ngu iphe,
agụ ngu nụ.
5 Woru iphe, bụ iphe, iime
ememe ye Ojejoje l'ẹka.
Dakobe iya; oo-meru ngu iya-a.
6 Oo-me tẹ odobe-ẹka-ndoo
ngu nwua l'ọ bụ iphoro;
mbụ lẹ Ojejoje a-haru ngu enge;
mee tẹ iswi-ọdu-mma ngu
gbua nwịinwii l'ọ bụ
echi-oke-eswe.
7 Taa nshị; nggu achịru ụkfu kwẹe Ojejoje.
Ba aphụkwa ẹnya-ụphu
teke iphe dụru ndu ẹjo iya ono lẹ mma;
mbụ teke ẹjo idzu,
ndu akirishi chịru eje l'ẹge ẹphe chịru iya.
8 Ba avụjekwa ọvuma;
ọphu ẹhu eghujekwa ngu eghughu!
Ba aphụjekwa ẹnya-ụphu;
kẹ l'oodubajekwa madzụ l'ome ẹjo iphe;
9 kẹle ndu ẹjo iya ono;
bẹ ee-me t'ẹphe chịhu
Obenu lẹ ndu chịru ẹnya
pyoo lẹ Ojejoje bụ ẹphe
e-nweru mgboko.
10 Ẹ ta anọhedu ọphu baru ishi;
e mee tẹ ndu akirishi gvụ.
Ị -chọo ẹphe; tịi phụ ẹphe.
11 Ọ bụ ndu dụ agu e-nweru mgboko-a.
Ẹphe enweru ẹhu-agu;
nweru iya k'etsutsu iya.
12 Ndu ẹjo iya ono a-nọduje
achịru ndu doberu ẹka ndoo ẹjo idzu;
l'ataru ẹphe ikireze iphe ẹphe e-me ẹphe.
13 Obenu l'ọo ọchi bẹ Ojejoje
anọduje achị ẹphe;
kẹ l'ọ maru lẹ teke
ee-mebyishi ẹphe; dụwa ntse.
14 Ndu akirishi mịtaru
ogu-mbeke ẹphe;
t'ẹphe gbushia ndu ifu dụ npho;
bya esee akfụ ẹphe t'ẹphe
gbatsushia ndu ụkpa;
mẹ ndu ẹ-tọ dụdu ẹge
ọ haru ẹphe.
15 Obenu l'ọ bụ ogu-mbeke
ẹphe ono ee-mekochaa ria ẹphe ishi;
e woru akfụ ẹphe ono nyakwoshia.
16 Nwiphe ẹ-ta badu ishi,
onye doberu ẹka ndoo nweru;
bẹ kakwa mma;
ma l'ẹku, ndu ẹjo iya ono,
dụ l'igwe kparu kụbe.
17 Kẹle ndu akirishi;
bẹ aa-nafu iphe ẹphe gude eze igidi.
Obenu l'ọo Ojejoje
bụ agbarike ndu doberu-ẹka-ndo.
18 Ọ bụ Ojejoje maru ẹge ndu
ụta ẹ-ta dụduru a-nọ-bebe.
Obenu l'òkè, gbaru ẹphe
a-bụru nk'ẹphe gbururu jeye.
19 Iphe-ẹhuka -bya;
bẹ ifu te ekpuduru ẹphe
lẹ ntụ.
Ẹjo-ẹgu -bya;
ẹphe enweru nri;
nweru k'etsutsu iya.
20 Obenu lẹ ndu akirishi
a-bụru kpurupyata.
Ndu ọhogu Ojejoje
a-dụ l'ọ bụ iphe,
e meberu l'alị, vuru; ji ejiji;
a bya ele ẹnya;
yo kpofu l'ọ bụ
ẹnwuru-ọku.
21 Ndu ẹjo iya ono abụje;
ẹphe -jita ụgwo; ẹphe eria ya.
Obenu lẹ ndu doberu
ẹka ndoo bụ o-me-l'uko.
22 Ọ bụ ndu Ojejoje gọru
ọnu-ọma nụ e-nweru mgboko-a.
Obenu lẹ ndu ọ tụru ọnu
a-chịhu.
23 Onye eme iphe, dụ Ojejoje mma
bụ iya akpọ-zijeru onye ono ẹge
oo-gude aha ọkpa.
Yo mee onye ono t'o vudo vudoshia ike.
24 Ụkfu -dụkpoo ya nụ;
b'ẹ tọo darudu alị;
kẹle Ojejoje a-wọta iya.
25 Mu shikwa bụru nwata;
nta-a bẹ mu bụwa ọgurenya.
Ọ bụ lẹ mu ta aphụbua ẹke
Ojejoje gbadoru onye doberu ẹka ndoo;
m'ọ bụ ẹke ụnwu iya arọ nri.
26 Onye doberu ẹka ndoo
abụje o-me-l'uko;
l'eje ndu ọdo ụgwo.
Ụnwu iya abụru iya ọnu-ọma.
27 Gbakutaru ẹjo iphe azụ;
wata ome iphe dụ mma;
ẹge ii-buru l'alị-a jeye lẹ tutu yoyo.
28 Iphe dụ Ojejoje mma bụ
t'e ekpeje ikpe, dụ mma.
Ẹ tọo gbadojekwa ndu yeru iya obu.
Ọokwa-chije ẹphe jeye lẹ tutu yoyo.
Obenu lẹ ndu akirishi;
bẹ oomeje t'awa ẹphe chịhu.
29 Ọ bụ ndu doberu ẹka ndoo
e-mekochaa nweru alị-a;
buru iya jeye lẹ tutu yoyo.
30 Okfu, eshije onye doberu
ẹka ndoo ọnu bụ mmamiphe.
Iphe eshije iya ọnu abụru iphe, dụ mma.
31 Iphe anọje iya l'obu
tekenteke bụ ekemu Nchileke.
Ẹ tọo dakajẹdu iya adaka.
32 Ndu ẹjo iya ono ejeje
je akwaaru ndu doberu ẹka ndoo;
l'achọ ẹge ee-shi t'ishi ẹphe phuhu.
33 Obenu lẹ Ojejoje
te ekwejedu t'ẹphe daba ẹphe l'ẹka.
Ọphu o nwedu l'a nma
ndu doberu ẹka ndoo ikpe;
m'a kpụru ẹphe bya
l'ụlo-ikpe.
34 Nọdu ngabẹru Ojejoje!
Tsoje ụzo iya!
Ọo ya a-pali ngu ifu;
mee ngu t'i nweru alị-a.
Ii-gude ẹnya ngu
phụ teke ee-me
tẹ ndu akirishi chịhu.
35 Mu phụjewaru ẹjo madzụ, obu taru mini.
Yoo vu l'ọ bụ oshi,
nọ l'ẹke ẹhu dụ iya mma.
36 Obenu l'ẹ ta nọdu ọphu baru ishi; tọ nọhe.
Mu achọo ya nta; chọo ya imo;
mu ta aphụhe iya.
37 Lenua ndu ụta ẹ-ta nọdu l'ẹhu ẹnya;
nggu egbua ndu obu gụru iphoro igo;
nggu aphụ lẹ ndu eme tẹ
nchị dụ ndoo e-dobe akọ.
38 Obenu lẹ ndu eme iphe dụ ẹji;
bẹ ee-me t'ẹphe bụru kpurupyata.
Iphe bụ ụnwu ndu akirishi
l'ẹphe ha; a-chịhukwa.
39 Ọ bụ Ojejoje adzọfutaje
ndu doberu ẹka ndoo.
Ọ bụ iya abụjeru ẹphe
agbarike teke ẹphe eje iphe-ẹhuka.
40 Mbụ lẹ Ojejoje eyejeru
ẹphe ẹka nafụta ẹphe.
Ọonafutaje ẹphe l'ẹka
ndu akirishi; shi ẹge ono
dzọfuta ẹphe;
kẹ l'ẹphe gbabaru l'ime iya je ezeeru ndzụ.