26
Egvu, Dévidi deru
1 Haaru mu enge
nggụbe Ojejoje;
kẹ l'ẹ to nwedu ẹke ụta dụru mu.
Ọ bụ nggu;
bẹ mu dakoberu Ojejoje;
ọphu o nwedu teke obu bọjeru mu ẹbo.
2 Nggụbe Ojejoje; daa mu;
nggu enyochaa mu enyocha!
Gbunua mu igo l'obu;
mẹ l'egomunggo.
3 Kẹ l'ọ bụ obu, i yeru mu
anọduje akpọ-ziru mu ụzo;
mu eme iphe i kfuru.
4 Mu lẹ ndu ẹregede
ta ayịkwa ayịyi;
ọphu mu lẹ ndu
o-kfuru-iche-eme-iche 'achịgbakwa idzu.
5 Ndzuko ndu ẹjo madzụ;
bẹ mu akpọ-yiru ukuvu;
ọphu mu lẹ ndu akirishi 'anọgbajekwa.
6 Mu akwọje ẹka
je ejephee ẹnya-ngwẹja
nggụbe Ojejoje mgburumgburu;
gude koshi l'ẹkworo ta nọdu lẹ ndzụ mu.
7 Mu ekfukwaaphu k'iphe dụ biribiri,
ịinoduje emeshi;
raa ya arara; kele ngu ekele.
8 Eze-ụlo ngu; bẹ mu yeru obu;
mbụ ẹke ọdu-biribiri ngu nọ.
9 Ba asakọbekwa mu lẹ ndu ẹjo iya ono ọ-sa-nkfụ;
ọphu i dobekwa mu lẹ
ndu egbu ọchi l'oshi lanụ.
10 Ndu bụlephu ẹjo iphe;
bẹ ẹphe maru ememe;
bụru ọna ẹka-azụ bụ iphe doru ẹphe ẹnya.
11 Obenu lẹ mbẹdua;
b'ẹ to nwedu ẹke ụta dụru mu.
Ọo ya bụ; phụnuaru mu imiko;
nggu agbafụta mu!
12 Mu e-vudo l'ẹke ọkpa ruru mu alị;
nọdu l'edzudzu ọha jaa Ojejoje ajaja.