25
Egvu, Dévidi deru
1 Ọ bụ nggụbe Ojejoje;
bẹ mu gude obu mu ekfu anụ;
2 bụru nggụbe Nchileke mu;
bẹ mu dakoberu.
Be kwekwa t'e kpua mu ifu lẹ ntụ.
Ọphu i kwekwa tẹ ndu
ọhogu mu tụru okoo kpua mu.
3 Ẹ tii kwekwa t'e kpua ya ifu lẹ ntụ;
mbụ onye ẹnya iya nọ l'ẹke ị nọ.
Ọ bụ; mekwaa t'ifu kpua ẹphe lẹ ntụ;
mbụ ndu ekwefuru ngu íkè.
4 Byiko; Ojejoje;
koshi nụ mu ụzo ngu;
menua t'ụzo ngu doo mu ẹnya!
5 Dunua mu tẹ mu meje ọkpobe okfu ngu;
nggu ezia mu iphe l'onwongu;
kẹ l'ọ bụ nggu bụ Nchileke, adzọje mu nụ;
bụru l'ẹke ị nọ;
bẹ ẹnya mu anọje: eswe l'ẹnyashi.
6 Nggụbe Ojejoje;
nyatakwa obu-imiko ngu;
mẹ n-yemobu ngu;
bụ ọphu shi ngu l'ede-nwede.
7 Ba anyatakwa iphe dụ ẹji,
mu meshiru l'okorọbya;
ọphu ị nyatakwa íkè,
mu shi kwefuru ngu.
Gude kẹ l'i yeru mu obu nyata mu;
kẹ l'ị dụ mma;
nggụbe Ojejoje.
8 Ojejoje dụ mma;
bụru onye obu gụru iphoro.
Ọ bụ iya meru iphe
ọonoduje akpọ-ziru
ndu ẹjo iya ono ụzo kẹ yẹbe Ojejoje.
9 Ndu wozitaru onwẹphe alị
l'ifu Nchileke;
bẹ ọonoduje edu t'ẹphe mee iphe dụ mma;.
Ọonodujekwaphu ezi ẹphe ụzo iya.
10 Ndu eme iphe nọ l'ọgba-ndzụ Ojejoje;
l'eme iphe ọ sụru t'e meje;
bẹ Ojejoje ekoshije lẹ ya yeru obu;
bụru o-me-g'o-kfuru.
11 Iphe dụ ẹji, mu meshiru ha nshinu;
ọlobu; Ojejoje;
gudenu okfu k'ẹpha ngu gụaru mu nvụ.
12 ?Bụ onye bụ onye atsụ Ojejoje egvu?
Ọ bụ onye ono;
bẹ ọo-kpọ-ziru ụzo,
gbaru iya l'eshishi.
13 Onye ono bẹ iphe a-nọdu adụru lẹ mma;
yọ bụru eri iya e-nweru alị ono.
14 Ndu Ojejoje kpọru obu yeru
bụ ndu atsụ iya egvu.
Yọ bụru ndu ono;
bẹ oomeje t'ẹphe maru ndzụ,
ẹphe l'iya gbaru.
15 Ọ bụ ẹke Ojejoje nọ;
bẹ mu edobeje ẹnya;
kẹ l'ọ bụ iya nwẹnkinyi iya
bu onye a-dụ ike hafụta mu l'ọnya.
16 Ghanụaru mu ifu;
nggu aphụaru mu imiko;
kẹle mu nọ nkịnyi;
iphe adụru mu ẹhuka.
17 Iphe byaru mu nụ hakwa l'igwe.
Dzọnua mu l'iphe-ẹhuka, mu eje!
18 Lenua ẹnya l'egbe
iphe-ẹhuka, byaru mu nụ
yẹle ẹjo ọnodu, mu nọ;
gụaru mu nvụ l'iphe dụ ẹji mu l'ọ ha!
19 Lewaru ẹge ndu ọhogu mu habe igwe!
Nggu aphụwaru ẹge mu dụtabe ẹphe ashị!
20 Chejenu mu nche;
nggu adzọo mu;
t'e b'e kpu mu ifu lẹ ntụ;
kẹ l'ọ bụ l'ime ngu;
bẹ mu nọ;
ezeru ndzụ.
21 Tẹ iphe a-nọdu adzọ mu nụ
bụru kẹle mu bụ onye,
ụta ẹ-ta dụduru;
onye obu gụru iphoro;
kẹ l'ọ bụ l'ẹke ị nọ;
bẹ ẹnya mu nọ.
22 Nggụbe Nchileke;
gbafụtanu ndu Ízurẹlu
l'iphe-ẹhuka ẹphe l'ọ ha!