22
Egvu-ọma, Dévidi deru nụ onye ishi egvu; t'e gude olu egvu “Ele Nchi-abọhu” gụa ya
1 Nchileke mu! Nchileke mu!
?Bụ ngụnu meru iphe
ị haru mu nkịnyi mu?
?Bụ ngụnu meru iphe
ị haru mu adzọfuta
je anọdu mu ote-ẹnya.
Nggu eje anọdu l'ẹke ude,
mu atsụ te erudu ngu nchi.
2 Nggụbe Nchileke mu;
eswe l'ẹnyashi bẹ mu
anọduje araku ngu;
tịi yeru mu ọnu.
?Obekwanu lẹ mu te
edobedu ọnu ndoo.
3 Obenu l'ị bụ Nchileke,
dụ nsọ ẹge ị bụ iya;
mbụ onye eze ndu Ízurẹlu
anọduje aja ajaja.
4 Ọ bụ nggu;
bẹ nna ayi phẹ dakoberu.
Ẹphe dakoberu ngu;
nggu adzọfuta ẹphe.
5 Ẹphe rakuru ngu;
nggu adzọo ẹphe.
Ẹphe adakobe ngu;
t'i kpu ẹphe ifu lẹ ntụ.
6 Obenu lẹ mbẹdua
bụ mbashiride;
mu ta bụdu madzụ.
Mu bụ onye ụnwu
eliphe emeje iphe-iphere;
onye te nwedu iphe madzụ gụberu iya.
7 Iphe bụ onye phụru mu nụ
anọduje achị mu ọchi.
Ẹphe anọduje azụru mu ukwe;
l'aja mu ewena; su:
8 “Mgbẹ ọ sụru l'ọo Ojejoje;
bẹ ya dakoberu;
tẹ Ojejoje ọbu dzọfutanu iya!
T'ọ dzọfutanu iya;
keshinu ọ sụru lẹ ya nọ Ojejoje l'obu.”
9 Obenu l'ọo nggu kufutaru mu
l'ẹpho nne mu;
bụru nggu meru;
mu adakobe ngu;
keshinu teke mu angụkwaduru ẹra.
10 A mụru mu; kuru mu ye ngu l'ẹka.
Dụbekpooru teke mu nọ
l'ẹpho nne mu b'ị bụhawa Nchileke mu.
11 Ba nọdukwa mu ote-ẹnya;
kẹ l'iphe-ẹhuka nọkwa mu ntse;
ọphu o nwedu onye a-gbaru mu mkpu.
12 Ndu ọhogu nọ-pheru mu
mgburumgburu l'ọ bụ
igwe oke-eswi.
Ẹphe gbaru mu mgburumgburu
l'ọ bụ oke-eswi ndu Báshanu, eme ẹnu.
13 Ephe sagbaaru ọnu;
l'ederu mu ekiri;
l'ọ bụ agụ, ejekfu anụ,
oo-gbu; taa.
14 Nke mu gvụakwaru l'ọ bụ
mini, a wụshiru awụshi.
Iphe bụ ọkpu, nọ mu l'ẹhu
sweshihuakwaru.
Nta-a; bẹ meji tọfuakwaru mu.
15 Ike gvụawaru mu;
ụvo ta dụhe mu.
Ire nyawaru mu l'akpo.
Ị tọgbowaru mu l'ẹja tẹ mu nwụhu.
16 Nkụta nọ-phewaru mu mgburumgburu.
Ndu iwe gbaru mu mgburumgburu;
kpọ-fushia mu ẹka l'ọkpa.
17 Nta-a; bẹ nggara agụwa mu ọgu.
Ndiphe achịru ẹnya
dzebe l'ele mu phophopho.
18 Uwe mu; bẹ ẹphe keru onwẹphe;
ọphube iphe mu eyeje l'ime ẹhu;
bẹ ẹphe tụru ẹnwa
t'ẹphe maru onye ọo-laru.
19 Byiko; nggụbe Ojejoje;
ba anọdukwa mu ote ẹnya!
Nggụbe mkpakọ ike mu;
bya nta-a bya agbaaru mu mkpu!
20 Dzọfuta ndzụ mu t'ẹ be gude
ogu-mbeke gbua mu!
Dzọfutaru mkpakọ iphe ono,
mu nweru ono,
bụ iya bụ ndzụ mu;
tẹ nkụta ba ata mu!
21 Byiko; dzọfuta mu l'ọnu agụ;
mẹ lẹ mgbaku mpo atsụ.
Keshinu ị zawaru mu oku;
22 bẹ mu a-ra ẹpha ngu arara
t'ụnwunna mu phẹ nụkota iya.
Mu a-nọdu l'edzudzu ọha jaa ngu ajaja.
23 Unubẹ ndu atsụ Ojejoje egvu;
unu jaa ya ajaja!
Iphe bụ l'unu ha bụru ndu eri Jékọpu;
unu kwabẹje iya ugvu!
Unubẹ ndu ikfu Ízurẹlu l'unu ha;
unu bajẹru iya ẹja!
24 Kẹ l'onye iphe-ẹhuka byaru;
b'ẹ to legbujedu l'ẹnya;
tọ gbadojedu iya;
ọphu ọ ghajẹduru iya azụ;
ọonujechia olu,
o gude chiku iya.
25 Mu a-nọdu l'edzudzu ọha
jaa ngu ajaja kẹ iphe i meru.
Mu a-nọdu ndu atsụ ngu egvu l'ifu;
mekota iphemiphe ọbule,
mu riburu lẹ mu e-me.
26 Ndu ụkpa bẹ e-riji ẹpho.
Ndu achọ Ojejoje a-ja iya ajaja.
“Tẹ ndzụ unu bụkwaru ojejoje.”
27 Ụnwu eliphe l'ẹphe ha
e-mekochaa nyata iphe meru nụ;
ghakọbe lakfuta Ojejoje.
Mbụ l'iphe bụ ikfu,
nọ l'iphe bụ mbakeshi
e-mekochaa bya ebyiaru iya ikpere l'alị.
28 Kẹ l'iphe bụ alị-eze ndiphe
l'ọ ha bụkota kẹ Ojejoje;
bụru iya achịkota iphe bụ mbakeshi.
29 Iphe bụ ndu nweru iphe
lẹ mgboko-a e-mekochaa baaru iya phụ ẹja.
Iphe bụ madzụ
nwigbaleke-ọma, bụ ndu
e-mekochaa nwụhu anwụhu
e-byishiru iya ikpere.
30 Ọgbo, nọ l'ifu e-jeru iya ozi.
Ọgbo, a-bya nụ; bẹ aa-kọru kẹ Nnajiufu.
31 Aa-raru iya ndu ẹ ta mụdua amụmu:
lẹ Nnajiufu bụ onye doberu ẹka ndoo.
Ọo yẹbedua tụko iphe ono l'ọ ha mekota.