21
Egvu-ọma, Dévidi deru nụ onye ishi egvu
1 Agburu-ẹhu nggụbe Ojejoje;
bẹ mewaru tẹ ẹhu atsọ eze ẹna;
kẹ l'agburu-ẹhu ngu ha nshinu.
Lewaru egbe ẹswa, oote l'i meru;
yọ lụ-gbua l'ọgu!
2 I meru iya iphe nọ iya l'obu;
ọphu o nwedu iphe
o gude ọnu sụ t'i meru iya,
ẹ ti meduru iya.
3 I gude iphe-ọma, nyịberu
anyịbe bya iya ndzuta;
bya eworu okpu-eze,
e gude ọkpobe
mkpọla-ododo mee kpube iya.
4 Ọ rọru ngu ndzụ;
nggu anụ iya ẹya;
mee tẹ ndzụ iya bụru ojejoje.
5 Emekputa ono, i meru;
yo mekputa ono;
meru; aakwabẹ iya ugvu, ha nshinu.
I meru iya; yọ dụ biribiri;
l'egbu nwịinwii.
6 Mbụ l'ị gọwaru iya ọnu ojejoje;
mekwaaphu t'ẹhu tsọje iya ẹna;
kẹ l'ị nọ swiru iya.
7 Keshinu ọphu eze dakoberu Ojejoje;
Ọkaribe-Kakọta-Nụ
eyeru iya obu;
b'ẹ te enwubatakwa iya enwubata.
8 Ẹka ngu a-kparua ndu ọhogu ngu l'ẹphe ha.
Ndu ị dụ ashị; bẹ ii-gude ike ngu zụa kfụu.
9 Teke ii-me t'a phụ ngu;
bẹ ịi-hụ ẹphe l'ọku, enwu phophopho.
Ojejoje a-tụ-koshi ẹphe oke ẹhu-eghughu iya;
gude ọku dzụpyashikota ẹphe.
10 Ii-me tẹ ọkpu ẹphe kpọhu l'iphe;
kpọhu lẹ maa; mee t'awa
ẹphe chịhu lẹ mgboko.
11 Ọ -bụru l'ẹphe chịru ngu ẹjo idzu;
m'ọ -bụ rịaru ngu ẹjo ọriri;
b'ẹ to nwedu ọphu ere nụ.
12 Kẹ l'ii-me t'ẹphe ye ọkpa l'ọso;
m'i setalephu akfụ ngu t'ị gbaa ẹphe.
13 Nggụbe Ojejoje;
t'a jaa ngu ajaja;
kẹ l'agburu-ẹhu ngu paru ẹka.
Ayịbedua a-nọdu agụ egvu;
l'etu ngu ẹpha l'ike ha ngu nshinu.