8
Mmamiphe eku ngu oku
1 ?Tọ bụdu oku bẹ mmamiphe eku ẹge ono?
?Tọ bụdu mkpu;
bẹ iphe-odo-ẹnya echi ono?
2 Ọ nọ l'ẹke tukogbaaru atukoru l'iku ụzo;
o vudo lẹ mkpọkahu-ụzo.
3 O vudo l'obu-edukfu.
Ọ nọ l'ọnu-nggamgbo
l'echi mkpu; sụ:
4 “Ọ kwa unubẹ ndiphe bẹ ya eku.
Unubẹ ụnwu;
ọ kwa unu bẹ ya echiru mkpu-a.
5 T'iphe dojee unu ẹnya;
unubẹ ndu ẹ-te nwedu egomunggo!
Unu akwaa ẹnya;
unubẹ ndu eswe!
6 Unu ngabẹ nchị;
kẹ l'o nweru iphe ya abya ekfukfu, dụ mkpa.
Ya kpuhawaru ọnu tẹ
ya kfua iphe vudo nhamụnha.
7 Iphe eshije iya l'ọnu
bụ ire-lanụ.
Ẹjo-ire oshi iya l'ọnu bụ ẹbyi.
8 Iphe bụ okfu, shi iya l'ọnu kfụru akfụru.
Ẹ tọ dụdu okfu,
gberu nggọ; m'ọ bụ okfu,
dụ ghadaghadaghada,
eshije iya ọnu.
9 Okfu iya kfụru akfụru
lẹ nchị ndu iphe edoje ẹnya;
daburu ifu lẹ nchị ndu maru iphe.
10 Hakwaa mkpọla-ọcha;
nata iphe ya ezi ngu.
Nggu ahaa mkpọla-ododo; hata mmamiphe;
11 kẹle mmamiphe kakwa
mkpuma, vu oke aswa.
Ẹ tọ dụkwa iphe agụ
ngu nụ ọphu ịi-tụru yeru mmamiphe.
Mmamiphe ekfu okfu
12 “Mụbe mmamiphe;
mu l'iphe-odo-ẹnya bu l'ẹkalanu.
Mu maru iphe; ẹnya erua mu alị.
13 Iphe bụ l'aatsụ Ojejoje egvu
kwa ọkpo iphe dụ ẹji ashị.
Oku onwonye;
otu onwonye oke ẹpha;
iphe dụ ẹji;
mẹ l'ụru-ọnu adụje mu ashị.
14 Idzu ọma; mẹ mmamiphe bụ nke mu.
Iphe-odo-ẹnya; mẹ ike
abụkwaphuru nke mu.
15 Ọ bụ mmamiphe;
bẹ ndu eze gude achị;
bụru iya; bẹ ndu ishi gude
l'atụ ekemu, vudo nhamụnha.
16 Ọ bụ mu; bẹ ndu ishi gude achị; bụru mu;
bẹ ndu ha nshinu gude achị mgboko.
17 Ndu yeru mu obu;
bẹ mu eyejeru.
Ndu achọshi mu ike
achọ-vuje mu.
18 Ẹku; mẹ ùgvù bụ mu b'ọ nọ l'ẹka.
Iphe-enweru ọphu a-nọ jeyewaru;
mẹ ụba bụkwa mu phụ b'ọ nọ l'ẹka.
19 Uru, nọ mu l'ime kakwa
ọkpobe mkpọla-odod.
Iphe shi mu l'ẹka aka
ọkpobe mkpọla-ọcha.
20 Ụzo, mu eshije bụ ụzo
odobe-ẹka-ndoo;
bụru ụzo ikpe,
vudo nhamụnha bẹ mu etsoje.
21 Ndu yeru mu obu; bẹ mu
emeje t'ẹphe nweru iphe;
l'emejekwaphu t'ẹku ji ụlo-ẹku ẹphe.
22 Ọ bụ mubẹ mmamiphe;
bẹ Ojejoje vutsukpoo ụzo mee;
bụru mu bụ ozi,
o vutsukpoo ụzo jee l'oge ndiche.
23 A fọtahawaru mu rụ teke ẹ ta madụ;
mbụ lẹ mbụlembu tẹmanu mgboko adụbe.
24 Tẹmanu eze ẹnyimu anọdu; bẹ mu nọhawa.
Mu nọhawa; bẹ nwogvu byadẹru.
25 Tẹmanu e mee eze ugvu,
dobegbaa l'ọnodu iya;
mbụ tẹmanu e mee
ụnwu ugvu nshịi;
bẹ mu nọhawaa.
26 Tẹmanu Ojejoje emee mgboko;
mẹ abasarama iya;
mbụ tẹmanu e mee udzudzu kẹ mgboko.
27 Mu nọ teke o meru igwe;
nọdu teke o meru akpamigwe;
yo fozita kephetakota eze ẹnyimu.
28 Ya nọ teke o meru; urukpu anọdu l'igwe;
nọdu teke o meshiru ẹke
mini eshije amụshi l'eze ẹnyimu.
29 Ya nọ teke ọ kparu
eze ẹnyimu òkè ẹke
oo-jebebeje;
k'ọphu bụ l'ẹ tọo
wụ-swetadu òkè iya;
nọdu teke ọ tọru ntọ-l'alị mgboko.
30 Teke ono bụ mu bụ
o-me-nka, swiru iya nụ.
Mu shi emeje;
ẹhu l'atsọ iya ẹna
mbọku-mbọku.
Mu shi anọduje iya l'ifu
l'eme ẹmirima tekenteke.
31 Mgboko, o meru emeje;
ẹhu atsọ mu.
Ndiphe mgburumgburu adụje mu mma.
32 Ọo ya bụ; ụnwu mu;
unu ngabẹru mu nchị:
Ọnu-ọma bụ k'onye etso mu nụ.
33 Unu ngabẹ nchị;
nụa iphe mu ezi unu;
k'ọphu unu a-maru iphe!
Unu be efukwa iya lẹ ntụ!
34 Ọnu-ọma bụ k'onye
angabẹjeru mu nchị;
mbụ onye anọduje
l'ọnu-ụzo mu l'eche nche mbọku-mbọku;
35 kẹ l'onye chọru mu nụ;
chọ-vu mu; bẹ bụkwa ndzụ b'ọ chọ-vuru.
Ẹge ono bẹ ùgvù Ojejoje
a-nọdu etsokwa iya phụ.
36 Obenu l'onye jịkaru mu nụ
bụkwa onwiya bẹ oomebetaru.
Iphe bụ onye mu dụ ashị
bụkwa ọnwu b'ọ chọ.”