7
Ọkwa, aanmaru ndu etso nwanyi ọkpara
1 Nwa mu; nụkwaa iphe mu ekfuru ngu!
T'iphe-a, mu akpọ-ziru ngu
ụzo iya-a nọdujekwa ngu l'obu!
2 Mejekwa iphe-a, mu ezi
ngu-a;
k'ọphu ndzụ e-dzu ngu.
T'ọ bụru ẹge iiletaje
nwandodo-ẹnya ngu ẹnya;
bụ ẹge ii-letaje iphe, mu ezi ngu-a.
3 Gbaru iya agbaru lẹ
mkpụshi-ẹka ngu l'ọ ha;
nggu edee ya edede l'ime obu ngu!
4 Kfuru mmamiphe l'ọo ya bụ
nwunne ngu kẹ nwanyi;
nggu ekua iphe-odo-ẹnya: “Ẹgiri ọnya ngu!”
5 Ọ bụ iya e-dufuta ngu l'ẹka
nwanyi, eri ogori;
tẹ nwanyi, eme k'ẹnyishi ẹji;
be egude ire machamacha deta ngu.
6 Ujiku lanụ; bẹ mu shi l'ọnu
windo mu pyofu ẹnya;
7 phụa ẹke ndu, ẹ te amadụ iphe dọru.
Mu elee ẹnya lẹ ndu
ọgbo-lanụ ono;
yo nweru onye lanụ ọphu,
egomunggo swehuru.
8 Yẹbedua echebe ifu l'ụzo iya kẹ nwanyi ono;
mbụ l'ụlo ẹke nwanyi ono,
eri ogori ono bu;
9 l'ụzo gbẹregbede urẹnyashi;
mbụ l'ụzo nchi ejihu; teke ọchi ekpuwa ẹhu.
10 Ya ndono; nwanyi ọbu
alụfuta byakfutashia ya.
Nwanyi ono kwaru ngwa
l'ọ bụ nwanyi ọkpara;
bụru onye ẹregede.
11 Ọ bụ nwanyi, eme zuwozuwozuwo;
bụru nwanyi, ẹ te ekwejedu t'ọnu rua ya l'ẹhu.
Ọphu ọkpa 'egvujeduru iya egvuru l'ufu.
12 I -phụa ya l'esu-ụzo nta-a;
ị -bya aphụ iya ọdo; bụwunu l'edukfu.
Ọonoje lẹ nkụcha;
l'achọ onye ọo-bụru yẹle iya.
13 Ya ndono; yo duta
nwata-okoro ono; nmaa ya akpa;
bya ekiriberi iya ifu; sụ iya:
14 “L'o nweru ngwẹja, ya jeru
egwogwo.
Anụ, ya jeru egwogwo nọkwa l'ufu;
l'ọ kwa ntanụ; bẹ ya
medzuru iphe ya kweru ụkwa iya.
15 Ọ kwa iya; bẹ ya lụfutaru bya ngu ndzuta.
Nggu ndọ-ọ.
16 Oshi-azẹe ya; bẹ ya tọwaru
ẹkwa, e dengashiru
edengashi, shi Íjiputu.
17 Oshi-azẹe mu; bẹ ya gbakwaru mẹeru;
gbaa ya alowesu;
mẹ sinamọnu;
k'ọphu ọo-nọdu eshi kwẹkwekwe.
18 Bya t'ayi je emee k'ẹnyishi jeye l'ụtsu.
Bya t'ayi je azẹe t'ẹhu tsọo ayi ẹna.
19 “Nji mu ta nọkwa;
o jekwaruru ẹke, teru ẹnya.
20 Okpoga, o gude l'ije ono hakwa l'uru.
Ọ kwaru teke ọnwa dzuru bẹ ọo-lata.”
21 Yo gude ire-ọma deta iya;
gude ire mẹchemeche kpụghaa ya.
22 Teke ono teke ono;
yọ dụ-kpuru tsoru iya;
l'ọ bụ ịnya, aakpụ eje egbugbu;
mbụ l'ọ bụ ele, eje ọdalahu l'ọnya;
23 jeye teke akfụ bụru iya gụngu lẹ meji;
l'ọ bụ nwẹnu, kfụlahuru l'ọnya;
tọ ma l'ọ bụwa iya anwụhu.
24 Nta-a; nwa mu; ngabẹru mu nchị!
Gekwa nchị; nụa iphe mu ekfuru ngu.
25 Be ewokwaru obu ngu dobe
l'ẹke nwanyi ono nọ.
Ọphu i phukwa ụzo; tsoru iya;
26 kẹ lẹ ndu nwanyi ono mewaru;
ẹphe adaa hakwa nshinu.
Ndu, o gbuwaru egbugbu aka nkụ.
27 Ụlo iya bụ ụzo, e shi ala maa.
Ụzo ono tụgburu nanụ jeye l'ẹke anwụhu bu.