5
Ọnma ọkwa ori ogori
1 Nwa mu; gebe nchị lẹ mmamiphe mu;
nggu eworu nchị dobe
l'okfu, gbaru akpị,
mu ekfu anụ ngu;
2 k'ọphu ịi-majẹru oye ọnu l'okfu.
Okfu, shi ngu l'ọnu ekoshi l'ị maru iphe;
3 kẹ l'okfu, shi nwanyi,
eri ogori ọnu adụje l'ọ bụ manụ-ẹngu;
l'akwọ tẹriteri l'ọ bụ manụ ụrazu.
4 Obenu l'ikperazụ iya;
b'ọ tsọje age;
bụru ogu-mbeke, atsụ nkọ ifu labụ.
5 Onye, tsoru iya nụ laakwaru;
anwụhu abụru ishi iya.
6 Ẹ tọo kpajẹdu ishi iphe e-me tẹ ndzụ dzua.
Ndzụ iya agbakọtaje
nggịrigonggirigo;
ọ bụ l'ẹ t'ọ majẹdu.
7 Nwa mu; mejekwa iphe mu ekfu.
Ba ahakwa iphe mu ekfuru ngu;
wata ome iphe ọdo.
8 Bujekwaru ụba yeru egbe nwanyi ono.
Be ejenyabejekwa ọnu-ụlo iya ntse;
9 a nọnyaa; i woru ugvu,
gbaru ngu nụ; nụ ndu ọdo;
woru ndzụ ngu tụaru onye
imiko madzụ ta adụjedu.
10 Teke ono;
ndu o-shi-awe o-shi-awe
abya aphụpyabe ngu;
akanya, i seru abụru ndu ọdo e-ri iya.
11 L'ikperazụ; ndzụ ngu abụru ude kpụu.
Ị -kahụlephu; ụvo ta nọhe ngu.
12 Teke ono bẹ ịi-sụ: “Nanụ
ẹge ọ dụ; b'o shi abụje;
a -lọ mu ẹka lẹ nchị;
mu ta agụbe iya iphe.
A -baru mu mba;
yo ghu mu eghughu?
13 Mu jịkaru ome iphe ndu ezi mu iphe kfuru;
woru nchị mu swọ-chia l'ẹke ẹphe nọ.
14 Nta-a bẹ mu eyifuwa
eyifuwa l'edzudzu ọha.”
15 Wofu ẹnya lẹ nwanyi onye ọdo.
Tẹ nwanyi, ị kụru àkụku
dụkwa ngu l'ọ bụ wẹlu,
ị tụru l'onwongu.
16 ?Nanụ ẹge ii-shi woru
onwongu haaru ụnwanyi esu-ụzo;
wota iphe shi ngu l'ẹhu
ghaa l'edukfu ọha?
17 Wota onwongu doberu
nyee nke ngu nkịnyi iya;
tẹ yẹle ndu ọdo ba agbakwa ngu mgba.
18 Tẹ nyee ngu bụkwaru
ọnu-ọma.
Tẹ nwamgbọko, i gude
kpọo ekfu bụkwaru ngu ẹhu-ọtso-ẹna.
19 T'ọ dụjekwa ngu l'ọ bụ
ada ele l'obu, i yeru iya;
dụ ngu
l'ọ bụ umoro-ẹnyimu lẹ mma.
Tẹ ẹra iya mejekwa t'ẹhu
tsọ ngu ẹna; obu, o yeru
ngu atsụjekwa ngu atsụtsu.
20 Nwa mu; ?nanụ ẹge ọ dụ
b'ọ bụ nwanyi onye ọdo,
a-nọdu agba ngu igiri;
kẹ tẹ nggu l'iya je
anmakụbe onwunu?
21 Kẹ l'iphe, madzụ eme;
bẹ Ojejoje chị l'ẹka;
l'enyocha l'iphemiphe
ọbule, madzụ eme ememe.
22 Iphe ẹjo madzụ eme;
bẹ ahataje iya l'ọ bụ ọnya;
bụru ụgbu kepyia ya.
23 Iphe e-gbu iya nụ abụru
àhụ̀hù, ẹ ta ahụ̀du iya.
Yọ bụru ririri ono, oome ono;
bụ iphe e-me iya;
yo phuhu.