4
Mmamiphe ka
1 Ụnwu mu; unu ngabẹru mu
nchị l'ọ bụ nna.
Unu kpaa iphe lẹ nchị;
k'ọphu unu e-shi iya mụta iphe.
2 Iphe mu ezi unu kwa ọkpobe iphe.
Unu ba agbakwa iya mgbukuma.
3 Teke mu shi bụru
nwokorọbya; buru lẹ kẹ nna mu;
mbụ teke mu bụkwadua nwata;
bụru nne mu nwa lanụ;
4 bẹ nna mu ziru mu iphe; sụ:
“Tẹ mu kwẹshikwaa ẹka ike l'okfu iya.
Mu emeje iphe o kfuru;
k'ọphu ndzụ e-dzu mu.
5 Tẹ mu nwekwaru mmamiphe;
iphe edojee mu ẹnya.
Tẹ mu ba azahakwa okfu iya;
ọphu mu 'ewokwaru okfu iya dobe l'agụga.
6 Tẹ mu ba ahakwa mmamiphe;
kẹ l'oo-leta mu ẹnya.
Tẹ mu yeru iya obu
ẹge ọo-nọdu eche mu nche.
7 Ọ bụ mmamiphe ka.
Ọo ya bụ t'ị chọo mmamiphe;
nggu achọo egomunggo;
m'o -ruhuru oo-phu ngu ngụnu.
8 Kutsee ya; ọo-pali ngu eli.
Nmaa ya akpa; ọo-kwabẹ ngu ugvu!
9 Oo-kpube ngu okpu, e-me t'ị dụ ugvu;
mbụ kpube ngu okpu-eze, ama mma.”
10 Ngabẹkwa nchị; nwa mu;
t'iphe mu ekfuru ngu-a
ga ngu ẹnu nchị;
k'ọphu ịi-ka nka.
11 Ọ kwa ụzo mmamiphe;
bẹ mu ezi ngu;
bụru ụzo, vudo nhamụnha;
bẹ mu edu ngu eshi-a;
12 k'ọphu bụ; teke ịi-nọdu eje;
t'ẹ b'ọ dụ iphe anọ-chi ngu ụzo.
Ọ -bụru ọso bẹ ịigba;
tẹ bẹ ụkfu ba adụ ngu.
13 Gudeshia okfu ono ẹka ike;
be ekwekwa t'ọ nahụ ngu;
lepyabe iya ẹnya;
kẹ l'ọ kwa iya bụ ndzụ ngu.
14 Be ejekwa oye ọkpa l'ụzo ndu akirishi;
ọphu i shikwa ụzo ndu ẹjo iya ono.
15 Bujekwaru ụba yeru iya;
be ejejekwa iya eshishi lẹ phuu;
gbangojekwaa ya;
shia ụzo ọdo; je iphe iije.
16 Ndu ẹjo iya ono te
ekujekwa mgbẹnya;
l'ẹphe ẹ-be eme iphe ẹphe tụberu.
Ọphu ẹphe 'edobedu ishi-mgbẹnya;
a gụfu l'ẹphe meru t'ụkfu kpọ madzụ.
17 Nri ẹphe bụ akirishi;
mẹe, ẹphe angụje abụru ome iphe-kpaa.
18 Ụzo, ndu doberu ẹka ndoo
adụje l'ọ bụ iphoro
nchi-abọhu, anọduje asa
petengu jeye yọ bọhu-ghee.
19 Obenu l'ụzo ndu akirishi
agbajẹ tsụbalangu;
k'ọphu bụ l'ẹphe ta
amajẹdu ẹke ụkfu a-dụ ẹphe.
20 Nwa mu; ngabẹkwa nchị
l'iphe-a, mu ekfuru ngu-a.
Gebekwa nchị ọhuma l'okfu mu-a.
21 Be ekwekwa t'ẹnya ngu lụfu iya.
T'ọ nọdukwa ngu l'obu;
22 kẹ lẹ ndu nụru okfu ono
e-gude iya nọdu ndzụ;
ẹhu-npho abụru nk'ẹphe.
23 T'obu rukwaa ngu alị l'ọriri;
kẹ l'ọ bụ iya bụ ẹke ndzụ shi.
24 Be ekwekwa t'o nweru okfu,
gberu nggọ, e-shi ngu l'ọnu.
T'iphe ẹ-ta bụdu ire-lanụ;
be eshikwa ngu l'ọnu.
25 Tụbe ẹnya ngu l'ụzo ifu;
ba ahakwa ẹke i chiberu ifu;
wata ọghada aghada.
26 Gbujeodu igo l'ụzo,
i shi tẹmanu nggu eyedu iya ọkpa;
k'ọphu ọkpa te echifudu ngu.
27 Ba ahakwa ọkpobe ụzo;
swịa ya l'ẹka-ụtara;
m'ọ -bụ l'ẹka-ibyita;
sefutakwa ọkpa l'ẹjo iphe.