4
Ọnodu Jerúsalemu teke ọ daru
1 Lewaru ẹge mkpọla-ododo ono,
shi egbu ngerengere ono
nwakọtaru anwanwa.
Lewaru ẹge ẹgiri
mkpọla-ododo ono
dụwanu inyichi-inyichi.
Mkpuma ụlo-nsọ
dakashịhuwaru nanụ nanụ lẹ mkpọkahu-ụzo.
2 Ụnwu Záyọnu, bụ ndu ẹnya eje,
bụ ndu ono, dụ l'ọ bụ
ọkpobe mkpọla-ododo;
bẹ dụkotawanu l'ọ bụ ite,
e gude ụra kpụa;
mbụ l'ọ bụ iphe ọ-kpụ-ite kpụru.
3 Mbụ jeye lẹ nkụta-ọswa
echejekwa ụnwu iya ẹra;
obenu lẹ ndu nke mu;
bẹ ẹjo ọkpoma nk'ẹphe
dụkwa l'ọ bụ k'enyi-nwẹnu echi-ẹgu.
4 Ẹgu ẹra mewaru ụnwegirima
ire anyaru ẹphe l'akpo.
Ụnwegirima ẹphe arọ nri;
ọphu o nwedu onye ekweje anụ iya ẹphe.
5 Ndu phụ, shi erije
nggụmufeleshi phụ;
gbe zẹshiwanu ẹgu lẹ mbadụzo.
Ndu ọphu e gude ẹkwa uruswe-eze hee;
egbe azẹwanu l'ikpo ntụ.
6 Iphe e meru ndu nke mu
kaakwa kẹ ndu Sódomu ono,
a byaru bya ajị ẹnya; ẹphe agwụwa;
t'ọ dụ onye gbaru ẹphe mkpu ono.
7 Ndu ishi ẹphe shi ka eberugo ọcha ụcha.
Ẹphe shi ka ẹra eswi ọcha ụcha.
Ẹhu ẹphe shi ka
mkpuma-igwe ọcha vịrikiti.
Ẹphe shi achajẹ gbarakata
l'ọ bụ mkpuma sáfàyà.
8 Obenu lẹ nta-a;
bẹ ẹphe kawa utsukirịnya oji uji.
Ẹ tọ dụdu onye
ahụbejekwadu ẹphe ama l'esu-ụzo.
Akpọ ẹhu ẹphe
swịpyabetsuaru aswịpyabe l'ọkpu ẹphe.
Ọ kpọhuwaru gbengu l'ọ bụ nkụ.
9 Ndu laru l'ọgu kakwa mma;
ma lẹ ndu ẹgu gbushiru.
Mbụ ndu ẹgu swịru tẹletele
jeye ẹphe anwụshihu;
kẹ l'ẹphe ta phụdu nri shi l'ókfù.
10 Ụnwanyi, nweru obu-imiko
gbe gudekwa ẹka ẹphe
shia anụ ụnwegirima ẹphe.
Yọ bụru iya bụ nri
ndu nke mu teke ono, ẹphe shi ala-l'iyi ono.
11 Ojejoje gude ẹge iphe eghu iya vụa ọvuma.
Ọ vụru ọvuma ẹge obu
enwu iya taphutaphu.
Ọ tụru ọku lẹ Záyọnu;
yọ dzụa dzụa ntọ-l'alị, gude Záyọnu.
12 Ndu eze ndu mgboko;
mẹ ndu mgboko l'ọ ha te
kwetadu lẹ ndu ọhogu;
m'ọ bụ ndu yẹle onye nọ lẹ
mkpọkakfu a-bataghe
l'obu-edukfu Jerúsalemu.
13 Ishi iya abụru ẹjo-iphe,
ndu nkfuchiru Nchileke meshiru;
mẹ l'ụruburuku, ndu
agbajẹru iya ẹja rụshiru;
mbụ ndu ono, nọ l'ime mkpụkpu ono
gbushia ndu doberu ẹka ndoo ono.
14 Nta-a bẹ ẹphe etsutsowa lẹ
mbadụzo l'ọ bụ ndu ìshì.
Mee ndu ẹphe gbushiru;
bẹ merushiakwaru ẹphe;
k'ọphu bụ l'ẹphe ẹ-ta dụdu
kẹ t'e denyi ẹphe ẹka l'uwe.
15 Iphe aarajẹru ẹphe bụ:
“Unu lụfu; unu rụru onwunu arụru!
Unu lụfu! Unu lụfu!
T'ẹhu unu; be erukwa ayi l'ẹhu!”
Tọ dụ iya bụ; ẹphe
agbalashịa je aghaphelahaa.
Iphe bụ mbakeshi ekfulahaa:
“L'ẹphe ta anọhekwa l'ẹke-a ọdo.”
16 Ọ bụ Ojejoje l'onwiya chịkashiru ẹphe.
Ẹ tọo ghahẹduru ẹphe ẹnya;
ta akwabẹhe ndu achijẹru iya ẹja ugvu;
te mehe ndu bụ ọgurenya ọhuma.
17 Ọphu ka nụ abụru l'ayi lewaru
ẹnya onye ọgbata;
tọ dụ iphe ayi letaru iya.
Ayi anọdu l'ụlo nche;
l'eche mba, ẹ ta adzọ-ghedu ayi.
18 Ọobuje ẹke ayi dzọru ọkpa;
igboma l'ege apata-ọkpa
ayi; k'ọphu bụ l'ayi ta
alụfujehedu lẹ gbororo.
Nk'ayi agvụakwa agvụgvu.
A gụakwaru ẹge ayi
a-nọ-bebe ọgu;
kẹ l'ishi ayi abyawa akparu.
19 Ndu achị ayi ọso ka ugo,
ephe l'akpamigwe ephephe.
Ẹphe chịru ayi l'ugvu ugvu;
kee; kwabẹru ayi l'echi-ẹgu.
20 Onye Ojejoje fọtaru,
bụ iya bụ onye bụ iya bụ ndzụ ayi;
bẹ dalahụwaru l'iduma, ẹphe tụru;
mbụ onye ono, ayi rịru l'ayi a-nọdu iya l'ẹhu;
tẹ ndzụ dzua ayi l'iphe bụ mbakeshi ono.
21 Unu tee ẹswa; t'ẹhu tsọje unu
ẹna unubẹ ndu Édọmu;
mbụ unubẹ ndu ono, bu l'alị Uzu.
Obenu l'aa-gbẹkwa unu
iphe-ẹhuka nk'unu;
unu angụa ya;
yo gude unu;
unu agbaru ọtu.
22 Unubẹ ndu Záyọnu;
àhụ̀hù, aahụ̀ unu gvụakwaru.
Ẹ tọo hahẹkwa unu l'ụzo ọdo.
Obenu l'unubẹ ndu Édọmu;
bẹ ọo-gwata ụgwo ẹjo iphe ono,
unu emeshi ono; tụa unu ẹba
k'ẹjo iphe unu l'ọ ha.