3
Ẹkwa-aphụ k'ẹhu onye
1 Mbẹdua bụ onye jewaru
iphe-ẹhuka l'ẹka Nchileke;
maru iphe bụ lẹ Nchileke
gude ẹhu-eghughu eme madzụ iphe.
2 Ọ chịfuru mu;
nwuru mu ye l'ẹkpuru-ọchi;
tẹ mu je etsutso l'ẹke
iphoro ta anọdu.
3 Ishi iya bụlephu l'o switowa
mu eswito mbọku-mbọku.
4 Ugwẹhu mu; mẹ akpọ ẹhu mu;
b'o mewaru; yo ose ẹli.
Ọ bụ ẹge ono;
b'o shiru tsukoshia mu ọkpu.
5 Iphe o gude yebuta mu bụ
iphe atsọ ile;
mẹ iphe-ẹhuka.
O gude iya gbaa mu mgburumgburu.
6 O wowaru mu ye l'ẹkpuru-ọchi;
l'ọ bụ ndu, nwụhuhawaru nụ teke teru ẹnya.
7 O yechiwaru mu k'ọphu bụ
l'ẹ to nwedu ẹke mu e-shi nahụ.
Ọ tụru mu mkpa lọ-tsuta mu.
8 Mu -chia mkpu nta;
chia ya imo; raa t'ọ gbaaru mu mkpu;
yọ tsụ-chia nchị;
jịka lẹ ya te eyeduru mu ọnu.
9 O gudewa mkpuma,
a gbakpọshiru agbakpọshi dochishia mu ụzo.
O mewaru ụzo mu adụ kpọkorokpokoro.
10 Ọ kwaru mu l'ụzo l'ọ bụ agụ,
domiru onwiya; kwabẹru madzụ;
mbụ fụaru mu l'ọ bụ oduma.
11 Ọ kpụfuru mu l'ụzo;
je alabushia mu alabushi.
O meru mu;
to nwe onye e-yeru mu ẹka.
12 O kweru akfụ iya; kwabẹru mu.
13 O wotaru akfụ l'ẹkpa-akfụ iya tụa;
yọ bụru mu l'obu tụu.
14 Mu bụwa onye iphe bụ ndu
nke mu anọduje achị ọchi;
mbụ ẹphe gudewa mu agụ egvu.
15 O mewaru ndzụ t'ọ dụru mu ẹhuka.
O gudewa age chejia mu ẹpho.
16 O gudewa mkpuma kụ-kwoshia mu eze;
bya adzọo mu lụlalula lẹ ntụ.
17 O mewaru ẹhu te gvujeru mu egvuru.
Mu ta majẹhedu iphe bụ
ẹhu-ọtso-ẹna.
18 Ọo ya kparu iphe mu ekfu; sụ:
“L'ùgvù; mẹ iphemiphe ọbule,
mu ele ẹnya iya l'ẹka
Ojejoje; te nwehekwa.”
19 Mu -nyata iphe-ẹhuka,
mu eje; yeru ririri, mu
agha; ndzụ l'onwiya abụru mu age.
20 Ọobuje teke mu nyataru iya; meji atọfu mu.
21 Ọle ọobuje; mu -nyata iphe lanụ-a;
ẹhu ala mu l'ọ̀rù iya.
22 Ọ bụ ẹge obu Ojejoje,
yeru ayi hatabe nshinu
kparu iphe ayi te yifudu;
kẹ l'obu-imiko iya ta
gvụjedu agvụgvu.
23 Ụtsu mbọku-mbọku;
bẹ n-yemobu Ojejoje;
mẹ obu-imiko iya
adụje ọphungu ọphungu.
Ị bụ onye eegude ire iya ẹka;
gudeshia ya ike.
24 Iphe mu ekfuje l'obu mu bụ
l'ọ bụ Ojejoje bụ oke mu.
Ọ bụ iya meru iphe mu
e-gude cheru iya.
25 Ojejoje anọduje emeru
ndu atụ ume atụ-kobe iya ọhuma;
mbụ onye anọduje achọ iya.
26 Ọ dụ mma tẹ madzụ
nọdu nggujingguji
chee tẹ Ojejoje dzọo ya.
27 Ọ dụ mma tẹ nnajiufu
byakfuta madzụ l'okorọbya.
28 T'onye ọbu nọdukpelephu
nwa nggujingguji;
kẹle o nweru ẹge ọo-dụ; iphe agbanwee.
29 T'onye ọbu kpube ifu lẹ ntụ;
kẹ l'o nweru ẹge ọo-dụ;
yo nweru iphe oo-levu ẹnya iya.
30 T'o dobe ishi-nchị;
t'o onye echi iya ẹya chita ike iya.
Yọ haa t'e gude iphe-iphere nụ-jia ya ẹpho;
31 kẹle Nnajiufu te
enwufujekwa madzụ gbururu jeyewaru.
32 O nwekwaruru ẹge ọo-dụ;
yo mee t'iphe-ẹhuka bya;
ọbu l'oo-koshikwaphu lẹ ya
bụ onye obu-imiko;
kẹ lẹ n-yemobu iya ha nshinu.
33 Ẹ too hejedu iya uhere
ọpa-kfutaru madzụ iphe-ọtsu-l'ẹhu;
m'ọ bụ iphe aphụ.
34 Oofuto iphe bụ ndu a tụru
mkpọro lẹ mgboko l'ọkpa;
35 mẹ ọnafu madzụ iphe gbaru iya nụ
l'ifu Ọkaribe-Kakọta-Nụ;
36 mẹ l'okpe madzụ ẹjo ikpe
bụkota iphe ẹ-ta dụdu Nnajiufu mma.
37 ?Bụ onye e-kfughe okfu;
t'o ree;
ẹ ba bụ l'ọ bụ Nnajiufu kweru t'o ree?
38 ?Tọ bụdunua
Ọkaribe-Kakọta-Nụ asụje
t'iphe-ọma mee; yo mee;
l'asụjekwaphu t'iphe dụ ẹji mee; yo mee.
39 ?Bụ ngụnu kparu iphe
madzụ nwigbaleke-ọma
a-nọduje agụ aphụ teke
aahụ̀ iya àhụ̀hù k'iphe dụ ẹji, o meru?
40 T'ayi gbuedu igo l'ụzo ayi; ghaa ya aghagha;
t'ayi kpọlata azụ lakfuta Ojejoje.
41 T'ayi zia obu l'ẹke Nchileke, nọ l'imigwe nọ;
chị-liaru iya ẹka; sụ:
42 “Ayi meswewaru;
bya ekwefu íkè;
ọphu ị gụduru ayi nvụ.
43 I phukpuru onwongu
ẹhu-eghughu l'ọ bụ uwe;
nọdu iya chịru ayi tụgburu;
gbushia ayi; t'ị phụru ayi imiko.
44 I gude urukpu kwechia onwongu;
k'ọphu iphe e kfuru ngu te rudu ngu nchị.
45 I mewaru; ayi abụru
ẹswara-iphe;
dụwa l'ọ bụ ikpọzu l'ẹke ndiphe nọ.
46 Ndu ọhogu ayi ekfuwaru ayi o-beru-t'ọ-kwaa.
47 N-yemegvu bẹ dakfutaru ayi;
a gbashịaru ayi ọnya;
emebyi yẹle kpurupyata adakfuta ayi.”
48 Ẹnya-mini jiru mu ẹnya;
kẹle ndu nke mu b'e gbushikotawaru.
49 Ẹnya-mini ta atsọ-buhudu
mu atsọ-buhu l'ẹnya;
50 jeye teke Ojejoje a-nọdu
l'imigwe tụfu ẹnya lee l'alị.
51 Iphe mu phụru meru mu ata chịchichi;
Yọ bụru ẹge ọ dụru iphe
bụ ụnwu-mgbọko mkpụkpu mu.
52 Ndu ọhogu mu anọduje
achị nta mu ọchi nta nwẹnu;
l'ẹ b'ọ dụ iphe mu meru ẹphe.
53 Ẹphe nwuru mu ye l'ime nsụ;
woru mkpuma swichia ya.
54 Mini tukpuru mu ishi;
mu arịa lẹ mu phuhuwaru.
55 Mu nọdu l'ime nsụ ono
kpọ-ku nggụbe Ojejoje.
56 Ị nụwaru arọro, mu arọ ngu; sụ:
“Ba adahụkwa mu nkịchi
l'araku ono, mu araku ngu
t'ị dzọ mu ono”
57 I kparutaru lẹ teke mu rakuru ngu.
Ị sụru tẹ mu ba atsụkwa egvu.
58 Nggụbe Nnajiufu;
ọ kwa nggu kfuchitaru mu ọnu;
bya agbata ndzụ mu.
59 Nggụbe Ojejoje;
ị phụwarua ẹjo iphe e meru mu;
hanaaru mu enge!
60 Ị phụwaru ẹge ẹphe
gwataberu mu ụgwo iphe
mu meru; mẹ ẹjo idzu,
ẹphe achịkotaru mu.
61 Nggụbe Ojejoje;
ị nụwaru-a ẹge ẹphe
ekfurushi mu; mẹ ẹjo idzu, ẹphe achịru mu;
62 mbụ atabashi, ndu ọhogu mu atabashiru mu;
mẹkwaphu ẹjo idzu,
ẹphe anọduje achịru mu mkpụrumkpuru.
63 Lekpodudunu; ọ bụje;
ẹphe -vudo evudo;
mẹ ẹphe -nọdu anọdu
ẹphe l'agụ mu l'egvu.
64 “Byiko Ojejoje;
gwata nụ ẹphe ụgwo ẹge
ọ gbaru t'i gwata ẹphe;
l'iphe ẹphe gude ẹka ẹphe kpata.
65 Kpọ-chia ẹphe obu;
nggu atụ ẹphe ọnu.
66 Gude iphe-eghughu;
chịa ẹphe;
gbushia ẹphe lẹ mkpuli
igwe ngu; Ojejoje.”