51
1 Ọwaa iphe Ojejoje ekfu ndọ-ọ.
Ọ sụru:
Lẹ ya a-kpali ẹjo phẹrephere t'ọ
byakfuta ndu Bábyilọnu;
mẹ ndu Lebu Kamayi ọgu.
2 Ya e-zi ndu ọhodo t'ẹphe
byaru ndu Bábyilọnu ọgu;
t'ẹphe bya azaa ẹphe azaza;
mee alị ẹphe t'ọ daburu ochobo.
Mbọku ono, a-bụru iya
ẹjo ụboku ono -rulephu;
bẹ aa-nọdu etso iya ọgu ifu l'azụ.
3 Tẹ ndu sọja, agbajẹ akfụ;
be setakwa akfụ iya k'agbagba.
Ọphu ẹphe 'akwakwa ngwa-ọgu.
Unu ba aphụkwaru
ụnwu-okorọbya ẹphe imiko.
Unu mee ndu sọja ẹphe t'ẹphe gvụ.
4 Aa-nọdu egbushi ẹphe;
ẹphe adashị l'alị Bábyilọnu;
l'emekashi ẹphe iphe nshinu l'echi esu-ụzo.
5 A makwaru-a lẹ ndu Ízurẹlu;
mẹ ndu Júda l'ẹphe ha
bẹ ikpe nmaru l'ifu
Onye nsọ kẹ Ízurẹlu;
ọle Nchileke ẹphe,
bụ Ojejoje;
mbụ Ọkaribe-Kakọta-Ike
ta agbadokwa ẹphe.
6 Unu shi lẹ Bábyilọnu gbalashịa!
T'onyenọnu gbaaru ndzụ iya!
Unu be ekwekwa t'o nweru iphe e-me unu;
l'okfu iphe dụ ẹji ndu Bábyilọnu;
kẹ l'o ruakwaru teke
Ojejoje e-melata;
mbụ teke ọo-kfụ ẹphe
ụgwo, gbaru ẹphe.
7 Bábyilọnu shi dụ l'ọ bụ
okoro, e meru lẹ
mkpọla-ododo l'ẹka Ojejoje.
Yo gude iya mee;
mẹe atsụlaha ndiphe l'ẹphe ha.
Ndiphe mgburumgburu
ngụru mẹe, shi l'okoro ono.
Ọo ya meru iphe ẹphe
melahaaru mẹe mẹe nta-a.
8 Bábyilọnu dawaru
l'ọtu-l'ụkfu; dakashịhu.
Unu kwaa ẹkwa iya; kwashia ya ike!
Unu kpatakwaru iya manụ banụ
t'o tee l'ẹke iphe eme iya.
?Bụ onye maru; oo-shi ẹge ono kọrohu?
9 Ndu mba ọdo, nọ l'ẹke ono asụ:
“L'ẹphe ga emetakwaa
Bábyilọnu l'iphe eme iya nụ.
Ọ bụ l'ẹ to nwehedu emeta.
T'a haa ya; t'onyemonye la;
kẹ l'ikpe, nmaru iya nụ hakwa nshinu.”
10 “Ojejoje meekwaru;
t'ẹphe bụru ndu doberu ẹka ndoo ọdo!
Unu bya t'ẹphe je lẹ Ugvu Záyọnu;
je akọo iphe Ojejoje,
bụ Nchileke ayi meru!”
11 Unu pyịa ọnu akfụ unu apyịpyi!
Unu achịlia iphe unu
egudeje egbobuta onwunu!
Ojejoje kpaliakwaru
ndu eze ndu Mídiya;
kẹ l'iphe ọ tụberu bụ t'o
mebyia Bábyilọnu.
Ojejoje a-gwata ụgwo
iphe ono, e meru l'eze-ụlo iya ono.
12 Unu gbaa ama;
koshi l'unu etsukposhiwa
ụpho-mkpuma Bábyilọnu!
Unu yekwabaaru ndu nche madzụ!
Unu mee tẹ ndu nche nọdugbaa lẹ nche!
Unu eje l'ẹgbudu je edokaa ndu mpya-ọgu;
kẹle Ojejoje e-mekwa iphe
ọ tụberu; mbụ iphe
ọ chị-buhuhawaru lẹ ya
e-me ndu bu lẹ Bábyilọnu.
13 Unubẹ ndu bu l'iku ẹnyimu;
bya enwetsuaru ẹku nshinu;
oge ikpazụ unu ruakwaru!
Mbụ l'eri, gude ndzụ unu gbabuhuakwaru!
14 Ojejoje, bụ
Ọkaribe-Kakọta-Ike
gudeekwa onwiya ria angụ; sụ
lẹ ya e-gude madzụ yejia
mkpụkpu unu l'ọ bụ ẹke igube jeru;
ẹphe a-tụa ụzu l'ẹphe mekputawaru.
15 Ojejoje bụ ike kẹ ẹka iya
b'o gude mee mgboko;
bụru mmamiphe iya;
b'o gude mee mgboko;
yọ ngụru angụru;
bya eshi l'ẹnya, ọkwaru
phụshia akpamigwe.
16 Teke o meru t'igwe gbaa agbagba;
mini, nọ l'igwe aphụa gbudugbudu.
Yọ bụru iya emeje t'urukpu
shi l'ẹke igwe jeberu wụa wụfuta.
Ọ bụ iya meru; teke mini wataru achịchi;
ebemu-igwe ekulahaa.
Ọ bụ Ojejoje eshije
l'ụlo-ẹku iya kpofuta phẹrephere.
17 Madzụ mmanu te nwedu egomunggo;
ọphu 'onwedu iphe ọ maru.
Ndu akpụ ụzu bẹ iphere ntẹkpe,
ẹphe akpụshi egudeje;
kẹle ntẹkpe ẹphe ọbu
bụkota iphe-mmanu.
Ẹ tọ dụdu ọphu nweru ndzụ l'ime iya.
18 Ẹphe bụkota iphe-mmanu;
iphe eegude agba mgbọnu.
O -rulephu teke Ojejoje
a-nụ ẹphe aphụ; ẹphe alaa l'iyi.
19 Obekwanu lẹ Nchileke
kẹ Jékọpu
ta dụkwa l'ọ bụ ndu onanu;
kẹ l'ọo ya bẹ iphemiphe nọ l'ẹka.
Ọo ya fọtaru ndu Ízurẹlu
t'ẹphe dụru iya iche.
Onye ono; bẹ ẹpha iya bụ Ojejoje,
bụ Ọkaribe-Kakọta-Ike.
20 Ojejoje asụ: Bábyilọnu;
ọ kwa nggu bụ ogbu-nkụ,
ya gude alụ ọgu.
Ọ bụ nggu; bẹ ya egudeje
chịkaa iphe bụ mba l'ọ ha;
bụru nggu; bẹ ya egudeje
mebyia iphe bụ alị-eze.
21 Ọ bụ nggu bẹ ya egudeje
chịkaa ịnya; mẹ ndu agba iya nụ;
bụru nggu bẹ ya egudeje
chịkaa ụgbo-ịnya;
mẹ ndu agba iya nụ;
22 bụru nggu; bẹ ya egudeje
chịkaa unwoke mẹ ụnwanyi;
bụru nggu bẹ ya egudeje
chịkaa ndu bụ ọgurenya;
mẹ ụnwu-okorọbya;
bụkwaruphu nggu;
bẹ ya egudeje chịkaa
unwoke ọgbangga;
mẹ ụnwanyi ọgbangga.
23 Ọ bụ nggu; bẹ ya egudeje
chịkaa onye eche atụru; mẹ atụru iya;
bụru nggu bẹ ya egudeje
chịkaa onye akọ okfu;
mẹ ndu, akọru iya ẹya nụ;
bụru nggu; bẹ ya egudeje
chịkaa ndu bụ gọvano;
mẹ ndu bụ ishi, tso iya nụ.
24 Ọwaa iphe Ojejoje ekfu: “Lẹ ya a-nọdu unu l'ifu kfụa Bábyilọnu; yẹ iphe bụ ndu bu ndu, bu iya nụ l'ẹphe ha ụgwo iphe ẹphe meru lẹ Ugvu Záyọnu.
25 “Nggụbe Bábyilọnu;
ya bụakwa ọgu nọduru ngu;
kẹ l'ị dụ l'ọ bụ ugvu;
l'emebyishi eliphe mgburumgburu.
Ya a-machịru ngu ẹka-mgba;
yọ bụru ọgu nọduru ngu.
Ya e-shi lẹ eli-ọnu ugvu;
nwufu ngu t'ị bya adaa l'alị;
mbụ mee ngu;
nggu abụru ntụ.”
Ono iphe Ojejoje ekfu ndono.
26 “Ẹ t'o nwedu mkpuma,
shi ngu l'ẹhu, ee-gude mee itso ụlo;
to nwe mkpuma, shi ngu l'ẹhu,
ee-gude tụa ọkpa-ụlo.
Ishi iya abụru l'ẹgbara
a-kfụ ngu gbururu jeye lẹ gbururu.”
Ono iphe Ojejoje ekfu ndono.
27 “Unu gbaa ama;
koshi l'ọ bụwa ọgu!
Unu gbuaru iphe bụ
mbakeshi ụpyoku!
Unu kwakọbe iphe bụ
mbakeshi t'ẹphe tso iya ọgu.
Unu kua alị-eze ndu Araratu;
mẹ kẹ ndu Mini;
mẹ kẹ ndu Ashikenazu; t'ẹphe tso iya ọgu;
Unu fọta onye ishi amị,
e-du ndu e-tso iya ọgu.
Unu achịfuta ịnya ye;
t'o zeru gbigbigbi je l'ọbu ẹke igube etsu.
28 Unu kwakọbe iphe bụ
mbakeshi t'ẹphe jeru Bábyilọnu ọgu;
mbụ ndu eze ndu Mídiya;
ndu gọvano ẹphe; ndu ishi, tso ẹphe;
mẹ iphe bụ ndu alị ẹke,
ẹphe achị l'ẹphe ha.
29 Alị l'anma jijiji; l'agha gbụrugburu;
kẹ l'iphe Ojejoje chịru le ya
e-me ndu Bábyilọnu
dụkwaphu ẹge ọ dụ.
Mbụ l'oo-me Bábyilọnu mgburumgburu;
yọ daburu ochobo;
k'ọphu bụ l'ẹ tọ dụdu onye e-bu iya ebubu.
30 Ndu sọja ndu Bábyilọnu
haakwaru ọlu ọgu;
kwaa l'ụlo-ọgu ẹphe.
Ike gvụakwaru ẹphe;
ẹphe dụwa l'ọ bụ ụnwanyi.
Ẹke ẹphe bu ebubu b'a tụshiwaru ọku.
Mgbọro-ígwè, e gude gbaa
ụpho iya b'a nyajishiwaru.
31 Onye ọkpa-ẹgwa lanụ
anọduje agba etso ibe iya;
nwozi l'etso nwozi ọdo;
ẹphe atụko bụru ndu eje
ezi eze ndu Bábyilọnu
l'a naakwaru iya mkpụkpu
iya kpamukpamu.
32 Ẹke, eeshije kpọ-swee ẹnyimu;
lụfu azụ iya ọphu
bẹ ndu sọja nọ-chiakwaru;
abya atụkota ọku l'iphe bụ
ụda ụda, nọkota l'ẹke ono;
Ndu sọja ngu bẹ meji tọfuakwaru.”
33 Ọwaa iphe Ojejoje, bụ Ọkaribe-Kakọta-Ike;
bụ iya bụ Nchileke kẹ ndu Ízurẹlu kfuru:
“Ndu Bábyilọnu b'a dzọokwa tọlitoli
l'ọ bụ witu, nọ l'igwe, eegudeje etsu witu.
Ẹ taa nọhekwa ọphu baru ishi;
a bya akpata iya;
l'ọ bụ onye akpata iphe e meberu l'alị.”
34 Ọwaa iphe ndu Júda,
bu lẹ Bábyilọnu ekfu
ndọ-ọ:
“Lẹ Nebukadineza,
bụ eze ndu Bábyilọnu ripyawaru ẹphe.
O mewaru; ọphu ẹphe
'amahẹdu iphe ẹphe eme.
O mewaru ẹphe;
ẹphe abụru ite iphoro.
O lewaru ẹphe ẹge
agwọ eleje iphe o guderu.
O gudewa ẹku ẹphe rijia ẹpho;
metsua; bya agbụfu ẹphe.
35 Tẹ iphe ndu Bábyilọnu
meru ẹphe tukokwaru ndu Bábyilọnu l'ishi.”
Ono kwa iphe ndu bu lẹ
Ugvu Záyọnu ekfu ndono.
“Tẹ mee ẹphe tukokwaru ndu Bábyilọnu l'ishi!”
Ono kwa iphe ndu bu lẹ Jerúsalemu ekfu ono.
36 Ọwaa kwa nụ iphe Ojejoje ekfuru ndu Jerúsalemu:
“Lẹ ya a-gbaru unu ọdzori;
melata iphe e meru unu.
Ẹnyimu ndu Bábyilọnu;
bẹ ya e-me t'ọ tashịhu;
bya emee ọgba-mini
ẹphe t'ọ tashịhutsua.
37 Bábyilọnu a-bụru ikpọzu;
ẹke nkụta-ọswa e-bu;
bụru iphe a-nọdu anyị ishi ẹdzu;
mbụ iphe ee-gude agba mgbọnu;
ẹke ẹ ta dụdu onye e-buru iya eburu ọdo.
38 Ndu Bábyilọnu l'ẹphe ha
edegbaa ekiri l'ọ bụ agụ;
l'atsụgbaa ude l'ọ bụ ụnwu agụ nshịi.
39 Obenu l'ọo teke ono,
oonwu ẹphe phuruphuru l'ọ bụ ọku ono
bẹ ya a-gbaru ẹphe ajị;
mee tẹ mẹe tsụshia ẹphe;
k'ọphu ẹphe a-chị ọchi
kpọkirihitsua akpọkirihu;
shi iya kuwaruru mgbẹnya,
ẹphe tee tehubedu etehu.”
Ono iphe Ojejoje ekfu ndono.
40 “Ya e-nwuta ẹphe tụshia l'alị
l'ọ bụ ụnwu atụru;
ebyila; mẹ eghu, aachị eje egbugbu.
41 Unu lewaru ẹge e shiru gude Bábyilọnu;
mbụ Bábyilọnu ono, iphe
bụ mbakeshi shi gude eku onwẹphe ono.
Bábyilọnu bụakwa iphe
anyị ishi ẹdzu l'ẹnya iphe bụ mbakeshi.
42 Eze Ẹnyimu a-bya utso; ria alị Bábyilọnu.
O gudewa ọda utso ono kpua ya.
43 Iphe bụ edukfu Bábyilọnu
l'ọ ha bẹ ẹgbara kfụwaru.
Ọ kpọshihuwaru nkụ;
bụru echi-ẹgu ẹke ẹ-ta
adụdu onye bu iya nụ;
ọphu ọ dụdu onye eshije iya nụ.
44 Ya a-hụ̀ Belu àhụ̀hù lẹ Bábyilọnu;
mee ya t'ọ gboo iphe o lehawaru elele.
Iphe bụ mbakeshi ta
awụhedu awụ-kfu iya.
Ọdo abụru l'ụpho-mkpuma Bábyilọnu dakpọshihuwaru.
45 Ndu Júda; unu shikwa lẹ
Bábyilọnu gbalashia!
Unu gbakwaa ọso ndzụ unu!
Unu gbalakwaaru
oke ẹhu-eghughu Ojejoje!
46 Tẹ meji ba atọfukwa unu;
ọphu unu 'atsụhukwa egvu;
teke unu a-wata ọnu akọ
iphe eme nụ l'alị ono;
a -tụkpoo ọwaa l'afa-a;
afa ọdo; a tụkpoo ọdo.
Ọo-bụru akọ iphe-kpaa, eme l'alị ono;
mẹ lẹ ndu ishi a-nọdu etso
ndu ishi ibe ẹphe ọgu.
47 Ọo ya bụ l'ógè abyaphụ
teke ya a-nụ agwa ndu Bábyilọnu aphụ.
Alị Bábyilọnu gbaa mgburumgburu;
bẹ ee-me iphe-iphere.
Ndibe iya, e gburu egbugbu
a-wụshiru l'ẹkemeke ọbule.
48 Ono bụ teke igwe; mẹ alị;
mẹ iphe bụ iphe, nọ iya nụ a-tụ ụzu
ẹhu-ọtso-ẹna l'okfu ẹhu ndu Bábyilọnu;
kẹle ndu mgbugbu-madzụ,
shi ụzo isheli a-byaru ẹphe ọgu.”
Ono iphe Ojejoje ekfu ndono.
49 “Ọ kwa ẹge ndu Bábyilọnu
kparu iphe gbushiru ndiphe l'ophu;
bụ ẹge ẹphe a-da nwụshihu ẹphebedua.
Ishi iya abụru ẹge ẹphe
gude gbushia ndu Ízurẹlu.
50 Unubẹ ndu ọphu wafụru nụ;
unu tụgbulekwaphu!
Unu be ejekwa ọkpo ụkfu!
Ọ bụ oswi-okfu l'unu nọ ote-ẹnya;
ọlobu; unu nyatakwa yẹbe Ojejoje;
unu anyatakwaphụ Jerúsalemu!”
51 “E kpuakwaru unu ifu lẹ ntụ;
e kfurushiwaru unu ẹhu;
iphere ejiwa unu ifu;
kẹle ndu ọhodo bawaru l'ẹke,
dụgbaa nsọ l'eze-ụlo Ojejoje.”
52 Ọwaa iphe Ojejoje ekfu:
“L'oge abyakwa, teke ya a-nụ
agwa ndu Bábyilọnu aphụ.
Iphe a-nọdu ada l'alị ono
gbaa mgburumgburu
bụ ude, ndu e mekaru iphe atsụ.
53 Ẹ tọ nwekwa; m'o -ruhuru;
Bábyilọnu jerua
akpamigwe; bya emee ẹke,
ọ kpụshitsuaru ike l'ephekerephe;
bẹ ya e-yelekwaru iya-a
ndu mgbugbu-madzụ.”
Ono iphe Ojejoje ekfu ndono.
54 “Ụzu-ẹkwa a-dakwa lẹ Bábyilọnu;
ụzu-ẹkwa, ekoshi l'e
mebyishiwaru iphe nshinu lẹ Bábyilọnu.
55 Ojejoje abyawa omebyishi Bábyilọnu;
byanyikota oke ụzu ono, aatụ l'ime iya ono.
Ndu ọhogu iya a-nọdu atụ
akpara l'ọ bụ eze ẹnyimu l'abya.
Ụzu, ẹphe a-nọdu atụ;
bụ l'ephekerephe bẹ ọo-nọdu ala;
56 kẹle onye mgbugbu-madzụ
byawaru Bábyilọnu ọgu.
Ndu sọja iya b'a
kpụkotawaru lẹ ndzụ;
gbajishiwa ụta ẹphe;
kẹle Ojejoje bụ Nchileke,
akfụje madzụ ụgwo
l'ẹge iphe o meru ha.
Ọo-kfụ iya ụgwo ono;
kfụ-dzua ya akfụ-dzu.
57 Ya e-me tẹ mẹe tsụ ndu ishi ẹphe;
mẹ ndibe iya, ndu ọphu kwaru ẹnya;
mbụ jeye lẹ ndu gọvano ẹphe;
ndu ishi mkpụkpu;
mẹ ndu sọja ẹphe kwaphụ.
Mgbẹnya a-tụshikota ẹphe;
ẹphe te etetahedu eteta gbururu jeyewaru.”
Ono kwa iphe ookfu; mbụ Eze ono, bụ Ojejoje; bya abụru Ọkaribe-Kakọta-Ike ono.
58 Ọwaa iphe ookfu; mbụ Ojejoje bụ Ọkaribe-Kakọta-Ike:
“Ụpho-mkpuma Bábyilọnu
a-wụshikotaru l'alị;
a tụkota ọku l'ephekerephe
ọnu-ọguzo iya ono.
Ndiphe nọ l'eri aphụ;
l'ese akanya kẹ mmanu;
iphe bụ mbakeshi abụru ọku;
bẹ ẹphe e-jeru ozi jeye ike agvụ ẹphe.”
59 Ọwaa ozi, onye nkfuchiru Nchileke; mbụ Jeremáya ziru Seráya Neraya Maseya teke ono, yẹ Zedekaya yị je Bábyilọnu ono. Teke ono bụwa afa k'ẹno, Zedekaya wataru ọ bụ eze ndu Júda. Seráya ono bụ onye ishi ndu elekota ufu-eze.
60 Jeremáya atụko iphe dụ ẹji, a-dakfu Bábyilọnu ono dekota l'ẹkwo-agwọgwo; mbụ iphemiphe ọbule ono, e dekotaru k'okfu ẹhu Bábyilọnu ono.
61 Yọ sụ Seráya: “Unu rulephu Bábyilọnu; gụkwaa iphemiphe ọbule-a t'a nụ-dzuru iya.
62 Iphe ọdo, ii-kfufua bụ: ‘Ojejoje; i kfuwaru sụ l'ii-mebyishi alị Bábyilọnu; k'ọphu bụ lẹ madzụ te ebuhedu iya; ọphu anụ 'anọhedu iya; yọ daburu ochobo gbururu jeye lẹ gburu.’
63 Teke ị gụebeleruphu ẹkwo-agwọgwo-a; nggu elibe iya mkpuma woru chee lẹ Ẹnyimu Yufurétusu.
64 Iphe ọdo, ii-kfufua ye iya bụ: ‘Ono ẹge Bábyilọnu a-da darua alị; ọphu o gbeshihedu ọdo. Ishi iya abụru iphe dụ ẹji, Ojejoje abya ome t'ọ dakfu iya.’ ”
Ono ẹke okfu Jeremáya jeberu ndono.