4
Eeku ndu Ízurẹlu t'izimana la ẹphe azụ
1 Ojejoje sụru: “Unubẹ ndu Ízurẹlu. Ọ -bụru l'unu a-lata; ọ -bụru l'unu e-tso agwa ono, bụ iya akpamara ono ọgu; tẹ ya ba aphụjehe iya; haa ọgha ngvudangvu;
2 ọ -bụru l'unu e-gudeje ire-lanụ; gude ikpe, dụ maa yẹle odobe-ẹka-ndoo ribua ya: ‘Kamẹnu; bẹ ya e-gude okfu ẹhu iya; gọoru unu ọnu; iphe bụ mbakeshi egude okfu ẹhu iya rilahaa ugvu.’ ”
3 Ọwaa iphe Ojejoje ekfu anụ ndu Júda; mẹ ndu Jerúsalemu: Unu kọkotanu ẹke ẹ-ta kọdu akọko! Unu ba kụshinu iphe l'ẹgbudu!
4 Unu bua onwunu útsù nụ Ojejoje. Unu bufu onwunu akpapyị kẹ ime-obu; unubẹ ndu Júda; mẹ ndu Jerúsalemu. Ọdumeka bẹ oke ẹhu-eghughu yẹbe Nchileke a-gbanwuhukwa; relahaa l'ọ bụ ọku. Ishi iya abụru ẹjo iphe, unu meshiru. Ọ -watawa etsutsu; ta dụkwa onye agbanyi-ghe iya nụ.
Ọ-la-l'iyi e-shi l'isheli
5 “Unu raa ya arara l'alị Júda!
Unu echia ya ochi mkpu lẹ Jerúsalemu; sụ:
‘Unu gbua ụpyoku tsoru alị
ndu Ízurẹlu kpamukpamu!’
Unu rashịa ọra ike; sụ:
‘Unu dzukobe l'ẹkalanu!
T'unu gbalaa; laa mkpụkpu,
a kpụru ụpho-mkpuma iya mgburumgburu!’
6 Unu palia ẹkwa ọhubama t'e
jeshia lẹ Ugvu Záyọnu!
Unu gbalaa je anọdu ndzụ!
Unu be ejekwa ọkpo ụkfu;
kẹle ya shikwa l'ụzo isheli
gudekwa ọ-la-l'iyi l'abya;
mbụ mgbọnwu, a-dụ ẹjo ẹji.”
7 Agụ shiakwa l'ẹkfukala iya lụfuta.
Mgbugbu-madzụ l'iphe bụ
mbakeshi bẹ gbeshiakwaru ọgu.
O shiakwa l'ẹke ọono l'eje
t'o mee alị unu t'ọ daburu ochobo.
Mkpụkpu unu bẹ oo-me; yọ chịhu;
to nwehe ọphu madzụ ebu ebubu.
8 Ọo ya bụ t'unu yee uwe-aphụ;
unu agụa aphụ; tụa ụzu-ẹkwa;
kẹ l'o-re-phuruphuru,
bụ ẹhu-eghughu Ojejoj
e ta lụfukwaa ayi l'ẹhu.
9 “O -rua mbọku ono; bẹ meji a-tọfukwa ndu eze; ẹphe lẹ ndu ishi.” Ono iphe Ojejoje ekfu ndono. “Ndu achịjeru Nchileke ẹja a-wata ọtsu egvu; ndu nkfuchiru Nchileke; bẹ ọo-dụ biribiri.”
10 Ya ndono; ya asụ: “Haa; nggụbe Nnajiufu, bụ Ojejoje; ndu-wa; ẹphe lẹ ndu Jerúsalemu b'i dusweekwaru ụzo ọkpobe eduswe; kẹ l'ị sụru ẹphe: ‘Lẹ nchị a-dụkpokwaa unu ndo!’ Ọle ogu-mbeke b'a dabẹkwanuru ayi l'ẹkpiri!”
11 O -rua teke ono bẹ ee-kfuru ndu-a ẹphe lẹ ndu Jerúsalemu: “L'ẹjo phẹrephere, erebushi anụ l'ẹhu, e-shi lẹ nggeregede, nọ l'echi-ẹgu ono e-zi zikfuta ndibe mu; ọphu ọ bụkwa t'ọ phụchaa ẹphe aphụcha; m'ọ kwanu t'o mekwaa ẹphe emekwa.
12 Phẹrephere ono, e-shi iya l'ẹka ono a-karikwa ogude eme egbe iphe ono. Nta-a bụ tẹ ya bya ekfua iphe bụ ikpe, ya ekpe ẹphe.”
13 Lenu! Ọhogu ọbu awụkwa awụwu l'abya l'ọ bụ urukpu. Ụgbo-ịnya iya l'ada tititi l'abya l'ọ bụ oke phẹrephere. Ịnya iya kakwa ugo ome ẹgwa. Nshọo ayi! Ayi laakwaru l'iyi!
14 Nggụbe Jerúsalemu; sashịna ẹjo iphe, nọ ngu l'obu; k'ọphu aa-dzọta ngu! ?Bụ jeye teke ole; bẹ ịi-ha ẹjo ọriri l'obu ngu?
15 O nweru nwozi, shi lẹ mkpụkpu Dánu l'ara iya arara l'ekfu l'iphe dụ ẹji byakfutaru alị ugvu ugvu Ífuremu.
16 Woru iphe-a kfuaru ọhamoha! Raaru iya ndu Jerúsalemu arara; sụ ẹphe: “Ndu ọhogu, shi l'alị ẹke teru ẹnya abyakwa. Ẹphe echi mkpu-ọgu l'ekpu iphe bụ mkpụkpu mkpụkpu, nọgbaa l'alị Júda.
17 Ẹphe anọ-phee ya mgburumgburu l'ọ bụ ndu eche nche l'ẹgu; okfu l'o kwefuru mu íkè.” Ono iphe Ojejoje ekfu ndono.
18 Ọ kwa umere ngu yẹle iphe i gude ẹka ngu meta bẹ lọtaru iphe-a kobe ngu. Ọwaa bụkwa iphe bẹ eechi ngu. Oomeshikwa ẹhuka ike; ọolo ẹka lẹ meji!
Okfu-ẹhu ndu Júda eru Jeremáya l'ẹhu
19 Ẹpho mu-o! Ẹpho mu-o!
Ọolokwa mu ẹka lẹ meji.
Meji akụkwa mu phẹephee.
Mu ta dụkwa ike odobe ọnu ndoo;
kẹle mu nụwaru ụpyoku;
nụwa mkpu, eechi l'ifu ọgu.
20 Ọ-la-l'iyi tsopyaberu ọ-la-l'iyi.
Alị ono l'ọha bụakwa ikpọzu.
T'a kwaa jịa ẹnya;
b'a tụkowa ụlo-ẹ́kwà mu
l'ọ ha mebyishia;
tụko ụlo mu mebyishia
lẹ gbatabuta.
21 ?Bụ jeye teke ole;
bẹ mu a-nọdu ele ọgu ẹnya; yọo da;
l'anụ ọda ụpyoku k'ọgu?
22 “Ndibe mu bụkwa ndu eswe;
kẹ l'ẹphe ta madu onye mu bụ.
Ẹphe bụ ụnwegirima,
ẹ te nwedu egomunggo;
ọphu iphe 'edojedu ẹphe ẹnya.
Iphe ẹphe maru ẹnya iya
bụ ome ẹjo iphe;
ẹphe ta ma ome iphe dụ mma.”
23 Mu abya elee ẹnya
l'eliphe mgburumgburu;
ọphu o nwedu ụgbugba;
ọphu ọ dụdu iphe nọ iya nụ.
Mu abya elee ẹnya l'imigwe;
to nwe iphoro, nọ iya nụ.
24 Mu abya elee ẹnya l'eli ugvu ugvu;
ẹphe atụko anmagbaa jijiji;
ugvu ugvu atụko angagbaa anganga.
25 Mu abya elee ẹnya;
to nwe madzụ, mu phụru.
Iphe bụ ụnwenu,
ephe l'eli atụkowaa pheshihu.
26 Mu abya ejeshia ole ẹnya;
alị, shi emehuje iphe abụwaru echi-ẹgu.
Iphe bụ mkpụkpu, nọkota
iya nụ l'ọ ha abụkotawaru ikpọzu
l'ifu Ojejoje; mbụ l'ifu
o-re-phuphuphu,
bụ oke ẹhu-eghughu iya ono.
27 Ọwaa iphe Ojejoje ekfu
ndọ-ọ:
“Alị ono l'ọ ha a-bụkwaru ikpọzu.
Ọle ya te emebyishibebedu iya l'ọ ha.
28 Ọo ya bụ l'eliphe a-gụ aphụ.
Imigwe, nọ l'ephekerephe
agbahu ọchi;
kẹle ya kfuakwaru iphe ya kfuru;
ọphu ya alakwa azụ.
Ya kfuakwaru ẹge ọo-dụ;
ọphu ya a-ghakwa ẹnya l'azụ.
29 Igidi ndu chị ịnya mẹ akfụ l'abya ọgu bẹ bụ:
iphe bụ ndu edukfu,
nụru iya nụ; ẹphe agbalaa;
je edomishia onwẹphe l'ẹgbudu;
ndu awụba l'ọgba,
nọ l'ugvu je edomishia onwẹphe.
Ẹphe atụko mkpụkpu
ẹphe l'ọ haa; gbalashia.
Ẹ tọ dụhedu ọphu
madzụ eburu.
30 ?Bụkwanu ngụnu;
bẹ iime nggụbe alị ono,
daburu ochobo ono?
?Nanụ ẹge eegude;
nggu eyee uwe, l'eke meemee;
yee ịyagba, e meru
lẹ mkpọla-ododo?
?Nanụ ẹge eegude;
nggu egude iphe techishia ẹnya?
Ngwa, ị kwaru onwongu
bụkwa kẹ mmanu.
Ndu nggu l'ẹphe eshi
ọnya b'ị dụakwa ashị.
Ẹphe gbe achọokwa nụ ndzụ ngu.
31 Ya nụakwaru ẹkwa,
dụ l'ọ bụ kẹ nwanyi, ime eme;
mbụ l'ude, ọotsu dụ l'ọ bụ
kẹ nwanyi ime ọdungu iya l'eme.
Olu ono bụkwa kẹ
Záyọnu eme t'ọ tụa ume;
bya amachịa ẹka iya; sụ:
‘L'ike gvụakwaru iya.
E wookwaru iya nụ
ndu e-gbu iya nụ.’ ”