55
Eeku ndu mini agụ
1 “Unu gebekwa!
T'iphe bụ onye mini agụ
byakwa bya angụta mini!
T'onye ẹ-te nwedu okpoga
byakwa bya azụta nri; ria!
T'ọ byakwa bya agata mẹe;
zụta mini ẹra eswi,
ẹ te gudedu okpoga azụ;
to nwe ụgwo, aakfụ.
2 ?Bụ ngụnu kparu iphe
unu akpaphu okpoga
l'iphe ẹ-ta bụdu nri;
l'ese ẹza iphe te ejidu ẹpho?
Tẹ nchị rua unu alị l'iphe ya ekfu;
k'ọphu unu e-ri ọkpobe nri.
3 Unu ngabẹ nchị; kpịrita iya ntse!
Unu ngbabe nchị l'iphe ya ekfu;
k'ọphu ndzụ e-dzu unu.
Unu l'iya a-gba ndzụ,
a-bụ 'agvụ agvụ;
Ya agọoru unu ọnu-ọma;
bụ ụkwa, ya kweru Dévidi.
4 Lekwa; ya meekwaru iya
ishi; mee ya onye a-nọdu
eleta iphe bụ mbakeshi;
bụru onye a-nọdu
agbaru iya ekebe l'ẹke ẹphe nọ.
5 Lekwa; iphe bụ mbakeshi
ndu, ẹ tị madu;
ẹphe ta ma ngu; bẹ ii-ku oku;
ẹphe egude ọso l'agba abya;
kẹ l'ọo yẹbedua bụ Ojejoje;
mbụ onye nsọ kẹ Ízurẹlu;
kẹ l'o mewaru ngu; nggu adụ biribiri.”
6 Lee ẹnya Ojejoje teke ịi-phụ iya!
Raku iya teke ọ nọkwadu ntse!
7 T'onye, bụ ẹjo madzụ;
hakwaa ụzo, ootso.
Onye eme ẹji ahaa ẹjo ọriri iya.
T'onye ono lakfutachia Ojejoje;
phụ l'ọo-phụru iya-a imiko;
mbụ t'ọ lakfuta Nchileke;
phụ l'ọo gụru iya nvụ;
gụa ya kẹ etsutsu iya.
8 “Ọriri nke mu ta bụkwa nke ngu;
umere mu ta bụ umere unu.”
Ono iphe Ojejoje ekfu ndono.
9 “Ọ kwa ẹge igwe nọ-beru
ote-ẹnya l'alị;
bụ ẹge ụzo mu nọ-beru
ote-ẹnya l'ụzo nke ngu.
Ọ kwaphu ẹge ono;
bẹ ọriri mu nọ-be ote-ẹnya l'ọriri nke ngu.
10 Ọ kwa ẹge mini;
yẹle aka-mini eshije l'igwe achị;
tọo la azụ l'ẹke, o shi;
'abụdu l'o ruru alị;
mee iphe, e meberu emebe
t'o fushia; mịtaru ndu akọ iphe; iphe;
ndu eri eriri enweru iphe ẹphe eriri;
11 bụ ẹge okfu,
shi mu l'ọnu dụ.
Ẹ tọo gbakwa ẹka
alaphutaru mu azụ.
Oo-mefutaje iphe mu tụberu;
mekota iya ẹge mu sụru t'o mee ya.
12 Unu e-gude ẹhu-ọtso-ẹna
wụfu; e dufu unu lẹ
domangu rimangu.
Iphe bụ ugvu l'ugvu ha
a-wata ọgu egvu l'ifu unu.
Iphe bụ oshi, nọ l'ẹgu akụru unu ẹka;
13 oshi payịnu a-wata efufu
l'ọzori ọgarama-mbo;
o shi mịtulu awata efufu
l'ọzori ogvu uke.
Onanu abụru iphe Ojejoje
e-gude dee ude;
kẹ l'ọo-bụru iphe-ọhubama, a-nọ gbururu jeye;
ọphu a byadụ bya emebyi iya emebyi.”