54
Obu, Ojejoje yeru Jerúsalemu
1 Gụa egvu; nggụbe nwanyi,
ẹ-ta atsụdu ime!
Mbụ nggụbe onye ẹ-ta mụbua nwa.
Byiswe egvu;
tụa okokooko;
nggụbe onye ono, ime nwa te mebua;
kẹ l'ụnwegirima nwanyi,
a kpọru ẹbo-ẹbo l'afụ a-kakwa l'igwe
karia kẹ nwanyi, nji iya nọ.
Ọ bụ iphe Ojejoje ekfu ndono.
2 Fọkaribe ụlo-ẹ́kwà ngu!
Nggu egesaa ẹkwa, e geberu
l'ọnu ụlo-ẹ́kwà ngụ egesa!
Ba alọlakwa iya azụ!
Nggu emee t'eri iya ka ogologo!
Mekwaa akpọbe iya; t'ọ kpọo abara!
3 Kẹ l'ii-jaa laa l'ẹka-ụtara;
jaa laa l'ẹka-ibyita.
Ụnwu ngu phẹ a-natakọta
iphe bụ mbakeshi alị ẹphe;
buchishikota mkpụkpu ẹphe ono,
dabugbaaru ochobo ono.
4 Ba atsụkwa egvu;
l'iphe-iphere te emekwa ngu.
Ba atsụkwa egvu;
l'ee-kfu ngu ifu lẹ ntụ;
kẹ l'ẹ te emekwa ngu
iphe-iphere.
Ii-mekocha zahaa iphere ono,
meru ngu teke ị bụ nwamgbọko ono;
ọphu ịi-nyatadu ẹhu,
a kparụ ngu
l'ọ bụ onye nji iya nwụhuru;
5 kẹ l'ọ bụ onye ono,
meru ngu nụ ono bụ nji ngu.
Ojejoje, bụ
Ọkaribe-Kakọta-Ike bụ ẹpha iya.
Ọ kwa Onye nsọ kẹ ndu
Ízurẹlu ono bụ onye dzọru ngu nụ.
Iphe eekuje iya bụ Nchileke
kẹ mgboko gbaa mgburumgburu.
6 Kẹle Ojejoje ono e-kulata ngu azụ;
l'ị -bụ nwanyi, aalụ alụlu,
a kpọ mgbereke;
obu ta dụ iya mma;
mbụ nwanyi, a lụru lẹ nwata;
nji iya aghaaru iya azụ.
Ọ bụ iphe Nchileke ngu kfuru ndono.
7 “Ya harụ ngu kpọo nwụkfu;
ọbule ya a-phụru ngu-a imiko,
ha nshinu dulata ngu azụ.
8 Ya gude iwe ghaaru ngu azụ;
kẹ nwa teke ono.
Obenu lẹ ya e-yeru ngu obu
gbururu jeye lẹ gbururu
gude phụaru ngu imiko.”
Ono iphe Ojejoje, bụ onye dzọru ngu nụ; kfuru ndono.
9 “Iphe ọwaa gbe dụkwa l'ọ bụ oge kẹ Nówa,
bụ teke ya riburu iya l'utso,
dụ l'ọ bụ k'oge Nówa ta
abyahẹdu lẹ mgboko ọdo.
Nta-a bẹ ya ribuwaru l'ẹ tịi
ghuhedu mu eghughu l'ẹnya ọdo;
ọphu ya ta 'abahẹduru ngu mba ọdo.
10 Ẹ to nwedu mẹ iphe bụ ugvu,
nmahụkotaru jijiji;
a fọshikota ụnwu ugvu
l'ẹke ọ nọtsua;
obu, ya yeru ngu
ta angadu anganga;
ọphu ndzụ ẹhu-agu ono,
nggu l'iya gbaru ono
te enwedu l'o chikahu.”
Ono iphe Ojejoje ono, aphụjeru ngu imiko; kfuru ndono.
11 “Nggụbe mkpụkpu,
eje iphe-ẹhuka;
tọ dụ onye agbaru ngu mkpu;
tọ dụ onye adụ ngu ike;
ya e-gude ngorongoro
mkpuma kpụ-kwazi ngu;
gude mkpuma sáfàyà tọo ntọ-l'alị ngu.
12 Ya e-gude mkpuma rubi
kpụa eli ụpho-mkpuma ngu;
gude mgbubu, egbu ngerengere
mee ọgu-nggamgbo ngu;
gude mkpuma, vugbaa oke
aswa kpụa ụpho-mkpuma ngu l'ọ ha.
13 Ụnwegirima ngu l'ẹphe ha;
bụ yẹbe Ojejoje e-zi ẹphe iphe.
Ẹge ono bẹ ii-buru lẹ nchị odoo.
14 Ee-shi l'ụzo k'odobe ẹka ndoo;
mee t'ị ngụru angụru.
Ẹ to nwedu onye a-nọdu
akpagbu ngu akpagbu;
iphe k'ọtsu egvu ta abya.
Iphe kẹ kpaa a-nọdu ngu ote-ẹnya;
ọphu ọobyahedu ngu ntse ọdo.
15 O -nweru onye chọru ngu
okfu; b'ẹ tọo bụdu yẹbedua b'o shi l'ẹka.
Onye chọru ngu okfu
e-mekochaa daa.
16 Tii phụdu; ọ kwa yẹbedua
meru onye ụzu, afajẹ eko
jeye yo nwuta ọku.
Yo gude iya kpụta
ngwa-ọgu, dụlephu mma k'ọgu.
Ẹge ono b'ọ bụkwaphu
yẹbedua meru onye
mmebyi t'o mebyishia iphe.
17 Iphe, bụ ngwa-ọgu,
e gude abyaru ngu ọgu te eredu.
Ẹge ono bẹ ire a-nma iya l'akpo;
mbụ iphe bụ onye atụru ngu okfu.
Ọ bụ ono bụ òkè, ndu ozi kẹ
yẹbe Ojejoje ahata.
Ọ kwaphụ ẹge ono b'ọ bụ ọdzori;
ya agbaru iya ẹphe.”
Ono iphe Ojejoje ekfu ndono.