42
Onye ozi Ojejoje
1 Ojejoje sụru:
“L'ọwaa nwozi mu,
bụ onye mu eye adudu;
mbụ onye mu fọtaru;
bya abụru onye bụ
ẹhu-ọtso-ẹna mu.
Mu wowaru ume mu yeya l'ẹhu.
Oo-koshi iphe bụ mbakeshi
iphe bụ ikpe, dụ maa.
2 Ẹ too jedu ọra ọra;
ọphu oojekwa ochi mkpu.
Ọphu o jekwa iya arara
lẹ woroworo.
3 Mbụ l'ekperema,
e yeru ọru; b'ẹ t'ọ nyajidu;
ọphu ọophunyikwa
owu iphe-ọku, enwu rẹswereswe.
Oo-gude ire-lanụ koshi
iphe bụ ikpe, dụ maa.
4 Ike ta agvụkwa iya;
ọphu ẹhu 'ejihukwa iya oyi
jeye teke ikpe, dụ maa a-bya
angụru angụru lẹ mgboko.
Yọ bụru l'ekemu iya
bẹ ndu bunyabe eze ẹnyimu
a-nọdu a-tụ ume atụ-kobe.”
5 Ọwaa iphe Nchileke, bụ Ojejoje ekfu; mbụ onye ono, bụ iya meru eligwe l'ọ ha bya eworu iya tọsa; onye bụ iya meru mgboko l'ọ ha; mẹkpowaru iphemiphe ọbule, nọ iya nụ; bya anụ ndu bu iya nụ ume, ẹphe atụ; bya eworu ndzụ; nụ ndu ejephe l'ime iya.
6 “Ọ kwa mụbe Ojejoje
eku ngu l'ọgbodo iya.
Mu e-sekputa ngu l'ẹka.
Mu e-me t'i nọdu;
bụru onye, mu lẹ ndu
mgboko e-gude gbaa ndzụ.
Nggu abụkwaruphu ndọhodo iphoro.
7 Nggu emee t'ẹnya sahụ ndu atsụ ìshì;
bya emee t'a tụfu ndu a tụru mkpọro;
mbụ mee ndu nọ
l'ẹkpuru-ọchi lẹ mkpọro t'ẹphe lụfutakota.
8 Ọ kwa mbẹdua bụ Ojejoje.
Yọ bụru ẹpha mu ndono gẹdegede!
Mu te ewokwaru ugvu,
a kwabẹ mu nụ onye ọdo;
ọphu mu te me te wota
ajaja, e gega anọdu aja mu
jalahaa ntẹkpe, bụ iphe
e gude ẹka pyịshia.
9 Lekwa-a; akahụ iphe a sụru
l'oo-me meekwaru.
Mu l'ekfuwa k'ọphungu.
Mbụ lẹ mu ekfujeodukwaru
iya phu unu tẹmanu yọ wata ememe.”
Egvu, e gude aja Ojejoje ajaja
10 Unu gụaru Ojejoje egvu ọphungu!
Unu shikpelephu l'ẹke
mgboko jeberu jaa ya ajaja;
unubẹ ndu akpa lẹ mini;
mẹ iphe bụ iphe bu lẹ mini!
Iphe bụ alị, nọnyabe
eze ẹnyimu; mẹ iphe bụ
ndu bu iya nụ; unu jaa ya ajaja!
11 Tẹ echi-ẹgu; mẹ ndu
butsua ya nụ kpọo gerugeru!
Tẹ mkpụkpu,
ndu Kéda butsua tee ẹswa!
Tẹ ndu Sela gụa egvu
ẹhu-ọtso-ẹna!
T'ẹphe nọdu lẹ ọnungonu
ugvu kpọo orube!
12 T'ẹphe kwabẹkwa
Ojejoje ugvu!
Ẹphe nọduje l'alị,
nọnyabe eze ẹnyimu jashia ya ike!
13 Ojejoje a-dzọ
garamụgaramu lụfuta
ẹge ndaji-nggara adzọje.
Oo-me t'o vu iya evuvu
ẹge ọgu evuje sọja.
Ọo-raa mkpu ọgu;
chia mkpegbe-ọgu
mekputa ndu ọhogu iya.
14 Nchileke sụru ẹge-a:
“Mu shiwa teke teru ẹnya nọduta ndo.
Mu nọkpolephu
nggujingguji; kpade onwomu.
Obenu lẹ nta-a;
bẹ mu a-wata ochi mkpu;
l'azụ pyakfụngu;
l'atụ hẹkfuhekfu l'ọ bụ nwanyi, ime eme.
15 Mu e-me tẹ iphe bụ ugvu,
nọtsua nụ bụru
kpọkpokirikpo alị.
Mu abya emee t'iphe
nọ ndzụ, fushiru iya nụ
kpọshihu nkụ.
Mu emetsua nggele
t'ọ ghọshia alị ọkponku.
Mu abya emee t'okpuru tashịhukota.
16 Mu e-duru ndu atsụ
ìshì shia ụzo, ẹphe ta mabụa.
Ọ bụ owere, ẹphe te
eshibudua bẹ mu e-duru ẹphe shia.
Mu e-me tẹ ẹke gbaru ẹphe ọchi l'ifu
gụsahu bụru ẹphe iphoro;
bya emee ụzo,
dụ kwọgoro-kwọgoro
t'ọ kwọo kwọkwo.
Iphemiphe ọbule-a;
bẹ e-mekota; mu ta ahadu ome ẹphe.
17 Obenu lẹ ndu tukoberu
ntẹkpe, a pyịtsuaru apyịpyi ishi;
mbụ ndu bụ iphe
a kpụshiru akpụkpu;
bẹ ẹphe asụje l'ọ bụ nchi ẹphe;
ndu ono bẹ ee-me
iphe-iphere; nwulaa ẹphe azụ.”
Ndu Ízurẹlu atsọ ìshì;
l'ada nkịchi
18 “Unubẹ ndu nkịchi;
unu nụa iphe lẹ nchị!
Unubẹ ndu ìshì;
unu palia ẹnya phụkpoduduaphu!
19 ?Bụ onye bụ onye ìshì ọbu,
ẹ ta bụdu nwozi mu?
?Bụ onye ada nkịchi
l'ọ bụ onye ono, mu ziru ozi ono?
?Bụ onye atsụ ìshì
l'ọ bụ onye e yeru mu l'ẹka?
Mbụ; ?bụ onye atsụ ìshì
l'ọ bụ nwozi Ojejoje.
20 Ị phụru igweligwe iphe;
ọphu ịingadu nchị.
Nchị gheru ngu ọnu;
ọphu ọ dụdu iphe ịinuje.”
21 Ojejoje bụ onye doberu
ẹka ndoo.
Ọ bụ iya kparu iphe ọ nụru
ẹphe ekemu, ere ire;
bya adụkwaphu biribiri.
22 Obenu lẹ ndu-wa bụ
ndu a lụru alụlu;
vua iphe ẹphe.
Ẹphe l'ẹphe ha nọkotawa l'iduma;
mẹ ndu ọphu a tụshiru
mkpọro; domishia.
Ẹphe bụwa ndu a lụtaru alụta;
ọphu ọ dụdu onye agbaru ẹphe mkpu.
Ẹphe bụwa ndu a nwụkoru anwụko.
Ọphu ọ dụdu onye asụ:
“Unu dulata ẹphe azụ!”
23 ?Bụ onye ole l'unu ha
a-ngabẹ nchị l'okfu-a;
m'ọ bụ nọdukpelephu
nwandoo nụa iphe l'oge, abya nụ?
24 ?Bụ onye haru ndibe Jékọpu
haa t'a kwaa ẹphe l'ọkwata;
mbụ nwuru ndu Ízurẹlu nụ
t'ẹphe bụru ndu e meru
o-me-l'iwe?
?Tọ bụdu Ojejoje tọo;
mbụ onye ono, ayi mesweru ono;
kẹ l'ẹphe te kwedu otso ụzo iya;
ọphu ẹphe ekwedu ome ekemu iya.
25 Ya ndono; yo woru oke
iphe-eghughu iya byabẹ ẹphe;
mee t'ẹjo ọgu dakfuta ẹphe.
O gude ọku tụ-buta ẹphe mgburumgburu;
ọphu ẹphe amadule-ẹ iphe eme nụ.
Yo kee ẹphe l'ọ bụ ọku;
ọ bụ l'ẹ tọ dụdu iphe ẹphe shi iya mụta.