30
Hay Hinapit Agur
1 Hiyatuy hinapit Agur an hina' Jakeh ay da Ithiel ay Ukal an inalinay,
2 “Ha"in ay atog ya nidugah ahan di amanangpah'un tagu!
Adia' umat hi udum an tagun waday nomnomna!
3 Makulug ahan an mi'id di inadal'uh aat di aton an manomnoman,
ya mi'id ahan di inila' hi aat di pangat Apo Dios an me'gonan!
4 Ti undan way timmulu ta immuy ad abuniyan ya numbangngad hitun luta?
Ya undan udot way nangamung hinan tuyup ya ginamalna?
Ya undan udot way nangiteplag hi lubungnah nan udan ad daya?
Ya hay nangipaphod hi nunlene'woh hinan pingit di luta?
Ya hay ngadana nin?
Inilayu ay ya hay ngadan goh di imbaluyna?
Makulug ay an waday umat hina ya ibaagyun ha"in hi unyu inila!
5 Kulugo' ahan an mid ah nibahhawan nan hapiton Apo Dios,
at an amin nan mamhod an mumpabaliw ay Hiya ya immannung an ipapto'na dida.
6 At adiyu udman nan Hapit Apo Dios ti atonyu ay ya ihingal da'yu,
at ma'innilan munlayah ayu.
7 He"a, Apo Dios, ya waday duwan pohdo' hi odawo' hi atom ay ha"in hi engganah unna' matoy.
8 Hay oha ya badangana' ni' ta adi' hapiton di nibahhaw an layah.
Ya hay miyadwa ya ta"on hi unna' adi ipa'adangyan mu ta adi ahan goh nunheglan ami'mi"idana'.
At hay odowo' hi idatmu ya nan mun'olog hi mahapul'u ya ammuna.
9 Ti gulat nin ta do'ol an mahawal di mahapul'u at mid mapto' ya alyo' di,
Adi' mahapul di badangmu!
Ya gulat goh ta na'agwotwota' at mid mapto' ya mangakawa',
at hiyay dumalat hi pamihulandan He"an Dios an dayawo'!
10 Da'yun i'ibba ya adiyu ihudhudol di pamahiwyuh nan tagalah aat nan apuna ti hiyay dumalat hi pangidutanan da'yu,
at miballoh an holtaponyuy inatyu.
11 Wadaday udumnah tatagun mangidut hinan ommodda,
ya adida wagahan dida.
12 Ya wadada goh di tatagun hay punnomnomanda ya maphod an amin di pangatda,
mu layahda ti un hihidya an agguy nahukatan nan nappuhin ato'atonda.
13 Ya wadada goh di udum an tatagun nidugah an mumpahpahiyada
an hay punnomnomanda ya dida ahan di ma"aphod an mi'id ah nipaddung ay didah nan udum an tatagu.
14 Ya wadada goh di udumnan tatagun hay nun'awotwot di mamaondan paligaton an amin hitun luta,
ya pilitondan polhon nan way pangngalandah ononda.
Danen umam'am ya umatdah atata'ot an animal hi bubulung an matadom di babadan umat hi tadom di hinalung.
15 Wadada han duwan nunduppel an binabain imbabaluy han belabel
an hay ngadan nan oha ya hi Idatana'! ya hay ngadan nan agina ya hi Idatana' Pay!
Ya wada pay di opat hi ibaag'un mi'id iniladan mahengla,
16 ti nan wadan di nun'atoy di oha,
ya nan babain bahig di netob,
ya nan mamagan lutan nanga' an mahapulnay udan di miyatlu,
ya hay miyapat ya nan apuy an gumelageladaw an adi mabalin an madop.
17 Nan tagun mamahal hi o'ommodna
ya awniat matoy ya nunhobatnan hamutiy matana, ya nun'a'anday lamohna.
18 Waday opat an pohpohdo' hi adalon mu naligat an adi' ma'awatan,
at mi'id olog'un manginnila.
19 Hay oha ya nan aton di agila an tumagoy,
ya hay miyadwa ya nan aton di ulog an mabuluh hinan daplah,
ya hay miyatlu ya nan aton nan pupul an manganap hi ayanah nan tu'yap di danum,
ya hay miyapat ya nan aton di lala'in mi'pohhodan hinan babai.
20 Nan munlayah an babai ya wa ay ta nalpah an inlugtapnay ahawana
ya mun'amoh an ihautnan alyonay,
Mi'id ah inat'uh nappuhi!
21 Wadaday opat hi na"appuhih ma'at hitun luta:
22 hay oha ya nan himbut an mumbalin hi ali,
ya hay miyadwa ya nan nakudang di nomnomna mu umadangyan ta hiyay way maphod di tanudna,
23 ya hay miyatlu ya nan malmaligit an babain nalhin,
ya hay miyapat ya nan tagalan babain mihukat hinan ad tagalan hiya.
24 Hitun luta ya waday opat an numbino'ob'on an ta"on unda i"itang mu nidugah di ananomnomanda:
25 hay oha ya nan ambubuli
ti ta"on hi un pa"itang di bi'ahda mu wa ay ta tiyalgaw ya hinumludan mangidadaan hi onondah nan lawang.
26 Ya hay miyadwa ya nan kunihu
ti ta"on un itang di bi'ahda ya abalinandan mangiyammah punhituwandah nan daplah.
27 Ya hay miyatlu ya nan dudun
ti ta"on hi un mi'id di apudah mangipangpangulun dida mu mun'u'unnudandan tumayap.
28 Ya hay miyapat ya nan bulbula'ot
ti ta"on hi un mabalin an piditon mu mabalin goh an wadah nan nunhituwan di alin ni'hitu.
29 Ya wadada goh di opat an numbino'ob'on hi limmun Apo Dios an maphod di tigaw nan panalanda:
30 hay oha ya nan layon an mabi'bi'ah hi an amin an a'animal,
at hiyanan mi'id ah tuma'tana,
31 ya hay miyadwa ya nan awitan,
ya hay miyatlu ya nan buta'al an gandeng,
ya hay miyapat ya nan aton nan alin mangipangpanguluh nan titindaluna.
32 Gulat ta ipabagtum di odolmu unu way ninomnommuh atom hi nappuhi ya immannung an nakudang di nomnommu,
at odolnah unmu nomnomon hi mahhun ti ini ya mabainan'a.
33 Ti immannung an wa ay ta mikiwakiwal nan maluyud an gatas at mumbalin hi mantikilya,
ya immannung goh an mahuntuk ay di olong at dumala.
At iyal'allanay un pabungton di ibba an lummuh gulu.”
Hiyah ne hinapit Agur.