29
1 Nan tagun ta"on unda gun tugunon mu gunna ipahelot di nomnomna ta gunnaat goh iyal'allan mangat hi nappuhi
ya la'tot ya ma'ubah an matoy.
2 Wa ay ta nan nahamad di pangatnay mun'ap'apuh nan ohan babluy ya umamlongda nan tataguna,
mu wa ay ta nan munlayah an nappuhiy pangatnay mun'ap'apu ya munlungdayaday tatagu.
3 Umipadenol ay amana nan imbaluynan mamhod an manomnoman,
mu manangpah nan lala'in gun mimiddum hinan puta ti upuhonay pihhuna.
4 Papaddungon ay nan aliy atonah nan ipapto'na at minaynayun an gun pumhod nan babluy an pumpapto'ana,
mu gulat ta nan ap'apu ya un hay pihhuy gamgamona at hiyay dumalat hi apa"ian nan babluy hi pumpapto'ana.
5 Nan tagun mamalbalih nan heneggona
ya paddungnay unna idadaan an manuluh odolna ta mabalbaliyan.
6 Nan tagun hay nappuhiy gunna aton ya hiyah ne dumalat hi abahbahana,
mu nan tagun nahamad di pangatna ya umamlong ya mungkankanta ti mi'id mama"in hiya.
7 Nan nahamad di pangatnan tagu ya inilanay aat di nahamad hi aton hinan nun'awotwot,
mu nan tagun nappuhiy pangatna ya mi'id di umat hinah nomnomona.
8 Nan tatagun pumihupihul hi i'ibbada ya unda guluwon an amin nan ni'babluyanda,
mu nan nun'anomnoman an tatagu ya hay pumhodan nan tatagun himpamabluy di itamuda.
9 Mi'id hulbinah un idiklamun nan nanomnoman nan adi mangngol ti nan adi mangngol ya ngumalawngaw ya un bumungot,
at mid pohodnah punhahapitanda.
10 Nan tagun nangipa'enghan pumatoy ya ma'abbohhol hinan nahamad di nomnomda
ti pohdonan patayon dida.
11 Nan nakudang di nomnomnan tagu ya adi bumain an mangipattig hi bumungtana,
mu nan nanomnoman an tagu ya ma'ma'ullay, ya adi ma'innilay bumungtana ti madpol.
12 Gulat ta nan ap'apu ya kulugonan amin nan al'alyon nan tatagunan nibahhaw
at la'tot ya ahilalayahdan amin nan u'upihyal nan puntamuona.
13 Hay ohah numpaddungan nan nawotwot an tagu ya nan umipaligat ay hiya
ya nan nangidatan Apo Dios hi matadan duwa.
14 Nan ap'apun mumpanuh hinan nun'awotwot ta mepto' di ato'atonan dida
ya madnoy di pun'ap'apuwana.
15 Hay pangihingalan hi panugunan hinan ung'ungungnga ya nan paneteldan hinan way nappuhih atonda ya ta way pumhodanda
ti nan ung'ungngan adida ihingal ta un okod hiyah nan atona at la'tot ya hiyay lummuh abainan inana.
16 Wa ay ta nan tatagun nappuhiy ato'atonday mun'ap'apu ya iyal'allanay ma'ma'at hi nappuhi,
mu awmat ya tigon nan maphod di pangatday abahbahan dane han a'ap'apu.
17 Nu waday muntugun hinan imbaluyna at immannung an mid al'alih abungda,
ya hiya goh di mangipadenol hinan ommodna.
18 Nan tatagun agguy nanginnilah nan inyuldin Apo Dios ya immannung an atonday malgom hinan pohdondan aton,
mu nan nanginnila ya mangunud hinan Tuguna ya mawagahanda ya mipa'amlongda.
19 Nan adi umunud an tagala ya immannung an adi umanay di hapitonyuh panugunyun hiya,
at mahapul an gilatonyu ti ta"on unna ma'awatan di alyonyu mu adina unudon.
20 Nan tagun un namaaggan himmaphapit an adina ahan nomnomon di hapitona
ya on'onayna ahan nan nakudang di nomnomna ya un hiya.
21 Gulat ta iyabulut nan ad baal di malgom an pohpohdon nan baalna an mete''ah a'ungana
at umangunuh ya henen tagalanay umidat hi punha'itan di nomnomna.
22 Nan tagun mabanbannungot di dumalat hi pi'hongngilana ya pi'pattayanah nan babluy an ni'hituwana.
23 Nan tagun mumpabagtu ya umangunuh at mipa'ampan dumalat henen atona,
mu nan mangipa'ampah odolna ya hiyay mipabagtu.
24 Nan tagun bumadang hinan mangakaw ya un hay odolnay inlumlumna.
Ti gulat ta nan makulug di ibaagnah nan punhumalyaan ya middum hinan mangakaw an mahumalya,
ya gulat ta ibahhawna ya ma'idutan ay Apo Dios.
25 Nan tagun tuma'ot hinan nomnomon nan udumnan taguh aatna ya mi'id di abalinana,
mu nan tagun hi Apo Dios di pangehdolana ta Hiyay manalimun ay hiya ya immannung an malenggop an mi'id di ma'at ay hiyah nappuhi.
26 Nan do'ol an tatagu ya pohdondan mumpabadang nan mun'ap'apun dida,
mu hi Apo Dios ya anggay di way nahamad hi atonan mangipanuh hinan tatagu.
27 Nan tagun nahamad di ugalina ya pahiwonay nappuhin pangat di tagu,
ya umat goh hinan nappuhiy ato'atona ti pahiwona nan nahamad di ugalina.