13
1 Nan nanomnoman an unga ya donglonay itugun amana,
mu nan mapahal an unga ya adina ahan donglon di mitugun ay hiya.
2 Nan maphod an tagun maphod di hapitona ya maphod goh di mumbangngad ay hiya,
mu nan bumalbalin tagu ya hay pohpohdona ya un hay papattoy.
3 Nan tagun mamhod an manalimun hi nitaguana ya hiyay mangane'nong hi hapitona,
mu nan tagun adi mangane'nong hi hapitona ya hiyay mama"ih nitaguana.
4 Nan napayad ya adi pa"alah nan way a'amnawanan alan,
mu nan mahmahlun muntamu ya mabalin an nalakay pangngalanah nan pohdona.
5 Nan tagun nahamad di pangatna ya boholonay layah,
mu nan tagun nappuhiy pangatnay dumalat hi abainana.
6 Nan maphod an ugaliy paddungnay tindalun mun'adug hinan tagun maphod di pangatna,
mu nan nabaholan ya paddungnay binuhul an mangubah hinan tagun nappuhiy ato'atona.
7 Bo'on hay tigaw di taguy pangipattigan hi aatna tuwali ti nan udum an tagu ya ipattignay un adangyan mu hay immannung ya mi'mi"idan,
mu nan udum an tagu ya ipattignay un nawotwot mu hiyaat goh di adangyan.
8 Wa ay ta madpap nan adangyan an tagu ya mahapul an bayadanay nitaguana ta baliwanay odolna,
mu nan nawotwot an tagu ya mi'id ah mamhod an mampap ay hiya ti ma'innila an mi'id ah pihhuna.
9 Nan tagun maphod di pangatna ya umat hinan bubumnang an dilag an adi madmaddop,
mu nan tagun nappuhiy pangatna ya paddungnay dilag an mun'ud'udimit an magadyuh madop.
10 Nan pumpahiyaan nan taguy dumalat hi do'ol an pi'hongngilana,
mu nan tagun nanomnoman ya donglonay tugun nan i'ibbana.
11 Nan pihhun nalakan ma'ala ya ag'agan ma'ubah,
mu nan pihhun malpuh nablayan ya gun ma'ud'udman.
12 Nan tagun nabaybayag di way namnamaona mu adi damdama ma'at ya hiyay munlungdaya,
mu wa ay goh ta mipa'annung nan namnamaona an mawada at nidugah di pun'am'amlongana.
13 Nan tagun mamahal hinan maphod an mitugun ay hiya ya mipaligligat,
mu nan tagun mangihamad an mangunud enen tugun ya malagbuan.
14 Nan itudtudun nan nanomnoman ya umat hinan danum an bumuhubuhu' hinan obob an waday ibadangnah itaguan,
at nan mangunud enen mitudtuduy dumalat hi abaliwanah nan atayan.
15 Nan tagun do'ol di inilana ya e'gonan nan tatagu,
mu mid mange'gon hinan munlayah an tagu, at un mipaligligat nan nitaguana.
16 Hay aton nan nanomnoman an tagu ya pa'annomnomonah mahhun nan ma'at ya unna aton,
mu nan nakudang di nomnomna ya ma"attig an mi'id ahan di nomnomna.
17 Nan munlayah an mahnag ya lummuh gulu,
mu nan mahnag an makulug di iyalina ya lummuh lenggop.
18 Hay pumbalinan nan tagun adi mumpatugun ya un hay lummuh awotwotana ya abainana,
mu nan tagun mangngol hinan mitugun ay hiyah un way nibahhawana ya hiyay ma'alih me'gonan an tagu.
19 Ma"am'amlong nan taguh un mipa'annung nan penhodnah ma'at,
mu nan tagun nakudang di nomnomna ya adina ahan idinong nan nappuhin gunna aton ti nipa'enghan hiya.
20 Nan tagun gun mitnud hinan nun'anomnoman ya la'tot ya manomnoman goh,
mu nan tagun gun mitnud hinan adi mangngol ya la'tot ya pumuhiy ma'at ay hiya.
21 Hay lagbun nan tagun mangamangat hi nappuhi ya nappuhiy ma'at ay hiya,
mu nan nahamad di pangatnan tagu ya mawagahan.
22 Nan nahamad an tagu ya wa ay ta matoy ya ipaboltanah nan a'apunay banohna,
mu nan banoh nan tagun nappuhiy pangatna ya miyewel hinan udum an tatagun nahamad di pangatda.
23 Ta"on hi un way do'ol hi ihabal nan nawotwot mu adyu'a damdama
ti polhon nan abogadun nala'eng an mangakaw.
24 Nan adi mangilat hinan imbaluyna ya immannung an mi'id ah pamhodnan hiya,
mu nan ommod an waday pamhodna ya ihamadnan manugun ta way aton nan imbaluynan matugun.
25 Nan nahamad di pangatnan tagu ya mun'olog di tanudna,
mu nan nappuhiy pangatnan tagu ya gun mahinaangan ti adi umday tanudna.