12
1 Nan tagun mamhod an ma'udman di inilana ya abulutonan mumpatugun,
mu nan tagun adi mangabulut an mumpatugun ya un nabongang an adi umday nomnomna.
2 Nan tagun maphod di pangatna ya umipa'amlong ay Apo Dios,
mu nan nangipa'enghan mangat hi nappuhi ya moltaon Apo Dios.
3 Nan tagun hay nappuhiy pangehdolana ya umat hinan ayiw an mabu'nut hi umangunuh,
mu nan tagun maphod di pangatna ya adi ahan mabu'nut.
4 Miyamlong nan lala'in ad ahawah nan babain nahamad di ugalina,
mu nan babain unna bainon hi ahawana ya umat hinan dogoh an gumbuh tungalna.
5 Nan tagun nahamad di pangatna ya mepto' di ibadangnah nan ibbanan tagu,
mu nan nappuhiy pangatnan taguh nan ibbana ya un bumalbali ya anggay.
6 Nan hapiton nan nappuhiy pangatnan tagu ya umat hinan hod'apel an pumatoy hi ibbanan tagu,
mu nan hapiton nan tagun maphod di pangatna ya bumadang an bumaliw ay hiya.
7 Nan tatagun hay nappuhiy gunda aton ya la'tot at miballoh ay dida, at mabahbah di holagdan mi'id ah ma'angang,
mu nan pamilyan nan maphod di pangatda ya minaynayun an mi'id al'alin dida.
8 Nan nanomnoman an tagu ya miyamlong an mipabagtu,
mu nan nabongang an nakutikut di nomnomna ya abohlan nan tatagu.
9 On'onaynah nan na'ampan tagun mahlun muntamu ti waday tanudna
ya un nan tagun munlayah an mangipattig hi un ay adangyan, mu nilahaw di tanudna.
10 Nan maphod di nitaguana ya gunna hahalimunan nan animalna,
mu nan tagun nappuhiy pangatna ya inganuynay animalna.
11 Nan tagun mahlun muntamuh nan lutana ya hiyay mahawal di tanudna,
mu nan tagun mi'id ah poto' di atona ya un nabongang ti mid tanudnah awni.
12 Nan mangakaw ya pohdondan alan nan hinamham nan i'ibbadan mangakaw,
mu nan maphod di pangatdan tatagu ya mumbabaddanganda.
13 Mabainan nan tagun na"appuhiy pangatna ti mipa'innilah awniy agguy immannung an hapitona,
mu adi mabainan nan tagun nahamad di pangatna ti ep'ephodnay panapitna.
14 Umipadenol nan tagun maphod di panapitna,
ya maphod ay nan tagun munhabal ya maphod goh di alanah bungan di inhabalna.
15 Nan nabongang an tagu ya hay nomnomona ya do'do"ol di inilana ya un nan udumnan tatagu,
mu nan tagun mangihamad an mangngol hinan mitugun ay hiya ya immannung an hiyay nanomnoman.
16 Nan nakudang di nomnomna ya nalakan mabanbannungot,
mu nan tagun nanomnoman ya ta"on hi unda gun bainon hiya ya ene'edpolnan adi bumungot.
17 Nan tagun nahamad di pangatna ya makulug di pangihtiguna,
mu nan adi makulug an mun'ihtigu ya langkak di hapitona.
18 Nan panapit nan tagun un nonongan himmapit ya umat hinan matadom an hinalung an humugat,
mu nan panapit nan nala'eng ya ay agah an umipa'adaog.
19 Nan immannung an malpuh nan timid ya minaynayun nan amakulugnah enggana,
mu nan layah an hapiton ya ag'agan ma'ubah.
20 Umipaligat hi punnomnoman nan tatagun bumalbalih ibbadan tagu,
mu umipadenol nan tatagun hay puntamuanda ya hay alenggopan di i'ibbada.
21 Nan tatagun nahamad di pangatda ya mi'id ah nappuhih ma'at ay dida,
mu nan tatagun na"appuhiy pangatda ya immannung an mi'id pogpog di ligat hi ma'at ay dida.
22 Hi Apo Dios ya abohlana nan tatagun ahilaylayah,
mu pohpohdona nan tatagun makulug di hapitonda.
23 Nan tagun nanomnoman ya adina iyamlong an iyal'aliy anala'engna,
mu nan tagun nakudang di nomnomna ya humapihapit an ta"on hi un hay anakudang di nomnomnay pun'ipa'innilana.
24 Nan mahlun tagu an anuhanay tamuna ti umangunuh at hiyay mangipangpanguluh nan i'ibbanan tatagu,
mu nan napayad an tagu ya udum di algaw at mumbalin hi tagalan nan udum an tatagu.
25 Nan numanomnom hinan way ma'at di dumalat hi mangubah hi amlongna,
mu nan ma"aphod an panapit di mangal'alu' hi mangipa'amlong ay hiya.
26 Nan maphod an tagu ya ihamhamadnan mamilih liligwana ta bo'on diday dumalat hi pumuhiana,
mu nan tagun nappuhiy pangatna ya malgom di gagadyumna an ta"on hi un diday dumalat hi apa"iana.
27 Nan tagun napayad ya adina ipulu' nan dotag an inanupana,
mu nan tagun mahmahlu ya ihamhamadnan ihaang ti an amin di ahapulana ya ibilangnah nabalul.
28 Nan dalanon nan tagun nahamad di aatna ya nan mipluy hinan wadan di pi'taguan hi mi'id di pogpogna,
ya immannung an henen dalan an pange'wana ya adi ahan mipluy hinan wadan di ilahhinan hi mid pogpogna.