66
Hay Panumalyaan Apo Dios an Amin hinan Tatagu
1 Ya inalin goh Apo Dios di,
“Ad abuniyan di umbuna' an mun'ap'apu,
ya hay lutay pangidah'aya' hi hu'i'.
At undan hiyadan un ayu umdan mangiyammah ihina'?
2 Ha"in di nunlumun amin hi logom,
at an amin ya bagi'.
Ha"in an Dios di nanapit ete.
Ya umamlonga' hinan mumpa'ampa
ti tuma'otdah unda adi unudon di Hapit'u.
3 Mu nan tatagun mungngohoy ay Ha"in an nan pohpohdondan pumbaholan di hiyay atonda
ya adi' abuluton nan malgom an e'nongda.
Ya wa ay ta bakay e'nongda ya paddungnay pimmatoyda
an hiyah ne nan adi ma'abulut ay Ha"in.
Ya wa ay ta kalniluy idawatda unu ma'an an nalpuh nan bento'da
ya paddungnay ahu unu babuy di ene'nongda,
at nidugah an paniaw ay Ha"in.
Ya gulat ta nan incense di gohbonda ya paddungnay unda dinayaw nan bulul,
ya hiyanay pun'amlonganda.
4 At idat'uy nidugah hi punligatanda an nan ta'tandan ma'at
ti ta"on hi un'u bagan dida ya adia' haghaggungon
ti un at goh nidugah di ngohoyda.
Ya hay pinilida ya nan pangatandah nun'appuhi
an hiyana nan adi' ahan pohdon.”
5 Ya ha"in an hi Isaiah ya inali' di,
“Ditu'un un'unnud hi Tugun Apo Dios ya donglon tu'u goh heten hinapitnan inalinay,
I'innila' an dumalat hi pangun'unudanyun Ha"in ya abohlan ya du'gon da'yuh nan udum an pamilyayu.
Ya nidugah di pangalidan da'yun alyonday,
Awni adya ta mipattig di anabagtun Apo Dios at mun'amlong ayuh pamaliwanan da'yu!
Umat hinay atondan da'yu,
mu awni ta hitun umangunuh at diday mabainan.
6 At awniat donglonyuy humelhel hinan way Timplu'
an dumalat di pummoltaa' hinan buhul'u.
7 Ad Jerusalem an babluy'u ya mipaddung hinan babain nuntungaw hi lala'i,
mu agguy dinumgoh.
8 Hiyadan un waday dengngolyu unu tinnigyuh umat hinah na'at
an un ohay algaw ya nawaday ongol an babluy?
Mu ad Zion ya adi madnoy di punholholtapandah di
ya mibangngad nan amaphod di aatda!
9 Ti Ha"in an Ap'apu ya adi mabalin an handia' di itungawana
hi un nagtud an mababluyan!
Ha"in an Dios di nanapit ete.
10 At mi'yam'amlong ayuh nan iJerusalem
an da'yun tatagun mi'nonomnom ya mi'lungdayan ten babluy.
11 Mi'yam'amlong ayu ti waday midat ay da'yuh nan inadangyan nen babluy
an umat hinan ung'ungngan mun'am'amlong hinan do'ol an danum di huhun inanah inumona.
12 At mawaday lenggop ya inadangyanyu
an umat hinan wangwang an umayu'ayuh.
Ya mipaddung ayu goh hinan ung'ungnga an halimunan inana an ipa'inuman,
ya pa'appohpohdona an iyab'abba.
13 At al'alu'o' da'yud Jerusalem
an umat hinan pangal'alu' di inah nan imbaluyna.
14 Ya awni ta tigonyuy a'atan hatu at nidugah di umamlonganyu nongkay
ti pumhod ya bumi'ah ayu.
At hiyah ne panginnilaanyu mahkay an Ha"in an Dios ya badanga' nan umunud ay Ha"in,
mu ipa'dam'uy bungot'uh nan mi'buhul ay Ha"in.
15 Nomnomonyun hi awnih umalia',
at le'wohona' hi apuy.
Ya paddungnay munlugana' hinan mabi'ah an tuyup
ta umalia' an mummoltah nan abohla'.
16 At hay pamogpog'uh nan tataguh tun luta ya nan apuy ya nan matadom,
at do'ol di mun'atoy.
17 At pogpogo' mahkay nan umuy hinan galdendan mundayaw hinan dayawon di udum an babluy, ya nan mangali goh hi unda pumhod an mangan hinan mapaniaw an ma'an an umat hinan dotag di babuy, ya bu'at, ya nan udumnan mapaniaw an ma'an ya mihda. Ha"in an Dios di nanapit ete.
18 Ya titiggo' nan gunda aton, ya i'innila' nan wah nomnom an amin di tataguh nan abablubabluy an numbino'ob'on di hapitda, at amungo' didan amin ta ma'ohhada ta tigonday anabagbagtu'.
19 Ya awniat innilaonda mahkay an Ha"in di mummoltan dida. Mu baliwa' di udum ay dida ta way honogo' hinan adadagwin lutan wadan nan tatagun agguy nangin'innilan Ha"in, unu nan agguy nannig hi anabagbagtu' ya nan anidugah di abalina'. Hay pannaga' ay dida ya hidid Tarshish, ya ad Libya, ya ad Lydia (an wadan di nun'ala'eng an pumana), ya ad Tubal, ya ad Greece, ya an amin danen abablubabluy an wah nan adadagwi ta hidiy pangibaagandah nan anabagbagtu'.
20 Ya pun'iyanamutdah tun me'gonan an duntug'un amin nan i'ibbayun malpuh nan numbino'ob'on an babluy, ta ay ihunay midat ta onong ay Ha"in an mumpuntakaydah nan kabayu, ya nan kalesa, ya nan mul, ya nan kamilu. Ya ta"on goh hi un da'yun holag Israel ya umiyali ayun mun'onong hi ma'an an nittuh nan maleneh an pangittuwan.
21 Ya un'u pilion di udum ay dida ta pumbalino' hi papadi ya nan bumadang hinan papadi. Ha"in an Dios di nanapit ete.
22 Ya dumalat hinan abalina' ya minaynayun nan balbalun ad abuniyan ya nan balbalun luta, at umat goh hinah nan holagyu ya nan abugwaan nan ngadanyu an minaynayun.
23 At nan tataguh abablubabluy ya umalidan mundayaw hinan gutud di Behtan nan Akayangan di Bulan ya hinan ngilin an Habadu. Ha"in an Dios di nanapit ete.
24 Ya hinan lumahunandah akakanda ya awniat tigonday odol di nun'atoy an din namohol ay Ha"in. Ya nan begeh an mumpangan hi lamohda ya adida ahan matmattoy, ya nan apuy an manghob ay dida ya adi ahan madmaddop. At agaga"ihawon an amin nan tatagu dida.”