65
Nan Ahumalyaan ya Abaliwan
1 Ya inalin Apo Dios di,
“Din nangipa'innilaa' an wah tu'a ta badanga' nan Hentil
an agguy nunnomnom ay Ha"in ya kimmulugda.
2 Mu da'yun tatagu' ya adi umat hina an ta"on hi unna' nidadaan an mamadang ay da'yu
ti unyuat goh innaynayun nan nun'appuhin ato'atonyu an nan pohpohdonyu.
3 An adi ayu bumain an gun mangipabungot ay Ha"in
ti e'nongyuy onongyu ya nan incense hinan way galden
an awadan di pun'onngan nan adi umunud ay Ha"in.
4 Ya gun ayu umuy hinan mahdom hinan way lubu'
ta mi'hapit ayuh nan lennawan di nun'atoy,
ya mi'ihda ayuh nan dotag di babuy,
ya mi'huyup ayuh danum di dotag an ne'nong hinan bulul.
5 Ya inaliyu goh udot hinan tataguy,
Bataanan da'mi,
ya adi da'mi dinihon ti me'gonan ami!
Mu adi' ahan ma'anuhan nan tatagun umat hina,
ya adia' goh pa"edpol hinan nidugah an bungot'un dida
an ay apuy an mundalang an adi madmaddop.
6 At nomnomonyun intudo"u tuwalin inali' di,
Adi' e'edpol ti mahapul an iballoh'u
7 an dumalat nan baholyu ya nan bahol di a'apuyu
ti ene'nongyuy incense hinan aduntuduntug,
ya gunna' inidutan.
At nan nidugah an nappuhin inatyuy pummolta' ay da'yu.”
8 Ya inalin goh Apo Dios di,
“Mi'id di tagun mangamin an mangaan hinan greyp an intanomnah un way nappuhi,
ti wada ay di maphod hi hapangna ya adina anon,
ya umat goh ay Ha"in an adi' ubahon an amin nan tatagu'
ti baliwa' nan umunud ay Ha"in.”
9 Ya inalin goh Apo Dios di,
“Wagaha' da'yun holag Israel an da'yun holag Judah
ta da'yuy mihinah nan babluy'u ti da'yuy pento"un tatagu'.
10 Ya mumbalin ad Sharon ya ad Achor hi pumpahtulanyuh
a'animalyun tatagu' an umunud ay Ha"in.
11 Mu nat'on di ma'at ay da'yun nan'ug ay Ha"in
ya nangaliw hinan me'gonan an duntug'ud Zion
ti dinayawyu nan bulul an da Fortune ay Destiny
an nan kulugonyun umidat hi maphod an gahat.
12 Ti mapatoy ayuh nan matadom an dumalat nan adiyu pangunudan hinan itudtudu'
an un at goh nan nun'appuhiy gunyu inat.
13 At dumalat hanan inatyu ya Ha"in an na'abbagbagtun Dios ya alyo' ay da'yuy,
Nan baal'u an mangun'unud ay Ha"in ya do'ol di tanudda ya inumonda,
mu da'yu ay ya mahihinaangan ayu,
ya mi'id di inumonyu.
Dida ya ma"am'amlongda,
mu da'yu ya mabainan ayu.
14 Ya awniat ikankantan goh nan mangunud ay Ha"in di umamlonganda,
mu da'yu ya kumilakila ayu an dumalat nan lungdayayu.
15 Ya pangidut nan tatagu' di ngadanyu
ti Ha"in an nabagbagtu ya ipapatoy'u da'yu.
Mu nan mangunud ay Ha"in di pangidata' hinan maphod an ngadan.
16 Mu udum hi algaw ta wa ay di mumbagah wagah ay da'yu
ya Ha"in di pangibaganyu an nahamad an Dios.
Ya gulat goh ta waday munhapata ya Ha"in di punhapataanyu an nahamad an Dios.
Ti din nalpah an nangipaligligata' ay da'yu an dimmalat di baholyu ya na'aliwan mahkay.”
Nan Balu an ad Abuniyan ya Balu an Luta
17 Ya inalin goh Apo Dios di,
“Nomnomnomonyun lumuwo' di balbalu an ad abuniyan ya balbalu an luta,
ya an amin din na'at hidin penghana ya ma'aliwan an adi gun mipanomnom.
18 At umamlong ayuh mi'id di pogpogna
ti lumuwo' di balun Jerusalem an awadan di nidugah an amlong.
19 Ya ta"on hi un Ha"in ya awniat umamlonga' hi umatan tun ad Jerusalem,
ya mundenola' goh hinan aatyun tatagu'
ti mapogpog mahkay di lumugwaan,
ya mi'id mahkay di maligatan.
20 Ya mapogpog goh di atoy hinan ung'ungungnga,
ya adi ma'agag nan nun'ala'ay ta engganay un madatngan
nan na'ali an gutud di atayanda ya unda matoy.
Ya an amin nan mataguh engganay hinggahut di tawona ya mibilang hi ungay aatna,
ya an amin nan ma'agag an adi huminggahut di tawona
ya hiyay panginnilaan an un'u minolta.
21 Ya pun'iyammayuy a'abung ta way punhituwanyu,
ya pun'itanomyuy greyp,
ya da'yu goh di mangan hinan bungana.
22 Ya adi mahkay umat hidin hopapna an wa ay di iyammayuh abung ya bo'on da'yuy munhitu
ti polhon di udum ta diday mihina,
unu adi mahkay mabalin an hay udum di mangan hinan ihabalyu.
Ya dumu'du"oy goh di pi'taguanyun tatagu' an umat ayuh nan ayiw,
ya da'yun pinili' hi tatagu' di mangitanud hi an amin hinan nablayanyu.
23 Ya maphod mahkay di ihabalyu,
ya mi'id di nappuhih ma'at hinan imbabaluyyu
ti da'yu nongkay di tatagu' an winagaha',
ya niddum goh an ni'wagah'u nan mehnod an holagyu.
24 Ya nundadaana' an mambal hi luwaluyu
an ta"on hi unyu agguy inda'puh di ibagayu.
25 Ya nan ahuh inalahan ya nan uyaw an kalnilu ya munlammung di angananda,
ya nan layon ya mabalin mahkay an ononay dagami an umat hinan baka.
Mu hay onon di ulog ya nan hupu' damdama.
At hidid Zion an mibilang hi me'gonan an duntug'u ya mi'id di ma'at hi nappuhi.
Ha"in an Dios di nanapit ete.”