3
How Come God Tell Da Israel Peopo Stay Bad
1 Eh! Lissen up, you Israel peopo! I stay talking fo God, cuz Da One In Charge stay tell dis to you guys, da whole ohana dat he wen bring hea from Egypt side.
2 He tell:
“You guys, you da ony peopo dat I wen pick,
From all da ohanas dat get all ova da world!
Az why, you da peopo dat I goin punish
Fo all da bad kine stuff you stay do.”
Da Talka Fo God
(Amos 3:3–4:3; 7:1–8:3)
Wat Kine Bad Tings Goin Happen
3 Try tink! Two guys, how dey goin make one trip togedda
If dey no make one plan? No can!
4 You tink da lion goin make da big noise inside da trees
If no mo notting dea fo him kill? Not even!
Da young lion not goin growl inside his house
If he neva find notting fo catch.
5 If no mo nobody wen put out da bait,
Da bird not goin fall down inside da net!
You tink da net goin jump up from da groun
If no mo notting dea fo catch um? No ways!
6 If somebody blow da war trumpet inside one town,
Da peopo dea goin tell, “Wassup?! Watch out!”
Weneva bad tings happen inside one town,
Az Da One In Charge da One make um happen!
7 “Cuz you know, Da One In Charge a me, he erytime tell his worka guys dat talk fo him da secret plan bout wat he goin do. Laytas, he goin do um.”
8 Wen da lion make big noise, you betta come sked!
Wen Da One In Charge a us guys dat talk fo him tell someting,
Us guys betta talk fo him!
How Da Samaria Peopo Stay Jam Up
9 Stan up on top da flat palace roof, Ashdod town,
An da flat palace roof, Egypt land,
An talk loud lidis fo da peopo inside can hear:
“Eh! Go come togedda on top da hills aroun Samaria town,
An check out all da stuff inside dat town dass all jam up,
Da way dose Israel guys all ack mean to each odda!”
10 You betta lissen! Da One In Charge, he tell dis:
“My peopo, dey donno notting how fo do da right ting!
Dey pile up dea palaces wit stuffs dey get
From peopo dey wen bus up.”
11 Dass why Da One In Charge a me tell dis too:
“Goin get one army dat go agains you guys.
Dey goin make one circle aroun dis land.
Dey no goin let you guys get outa dea.
No matta you guys strong, dey goin make you guys come notting.
Dey goin steal eryting you get from inside all yoa palace,
Dey goin clean you out!”
12 Da One In Charge, tell dis:
“Wen da lion grab da sheep,
Da sheep guy ony bring back litto bit fo show,
Maybe two leg bone, o one small piece from da ear.
Same ting goin happen wit da Israel ohana!
Da ony ting peopo goin bring back from da Samaria guys fo show,
Goin be one small piece from one bed
O one piece silk from one couch.”
God Goin Bus Up Da Bethel Peopo
13 Da God dass in charge a all da armies, Da One In Charge a me, dis wat he tell:
“Lissen up! Tell da peopo dat come from Jacob
Dey betta watch out!
14 “Dat time wen I goin punish da Israel peopo
Fo da bad tings dey wen do,
Same time, I goin bus up all da altars Bethel side!
I goin wack da horns dat stick out from da altar,
Dey goin broke an fall down on top da groun.
15 I goin wack da nice houses wea dey live winta time
An da houses wea dey live summa time.
Da houses dey build wit plenny ivory inside goin come bus up.
All ova da place, no goin get da houses dat get now.”
Dass wat me Da One In Charge tell.