2
Da Moab Peopo
1 You betta lissen! Dis wat Da One In Charge tell:
“Ova an ova, da Moab peopo wen go agains me.
Az why, no way I goin let um go an no punish dem!
Dey wen make any kine to da mahke king fo da Edom peopo,
Cuz dey wen dig up his body an burn his bones
Till ony get ash fo make mortar.
2 Dass why I goin dump fire on top da Moab land
Fo burn up da palaces dat get strong wall, Keriot town.
Da Moab peopo goin mahke,
Goin get war an peopo yelling an trumpet noise.
3 I goin wipe out da guy in charge dea,
I goin kill all dea leadas, same time.”
Dass wat Da One In Charge tell!
Da Judah Peopo
4 You Judah peopo betta lissen too! Dis wat Da One In Charge tell:
“Ova an ova, da Judah peopo wen go agains me.
Az why no way I goin let um go an no punish dem!
Cuz me, Da One In Charge, I wen give um da Rules,
But dem, dey ack jalike da Rules no matta!
Dey no like do wat I wen tell dem fo do.
Jalike dea ancesta guys,
Dey let da fake gods make um go da wrong way.
5 Dass why I goin dump fire on top da Judah peopo
Fo burn up da palaces dat get strong wall, Jerusalem town.”
Da Israel Peopo
6 You betta lissen! Dis wat Da One In Charge tell:
“Ova an ova, you Israel peopo wen go agains me.
Az why no way I goin let you guys go an no punish you guys!
You Israel peopo tell, ‘Dis guy owe me money.’
Da judge tell, ‘Nah, he no owe notting.’
But no matta wat da judge tell,
Still yet, you Israel peopo go sell da guy
Fo silva money fo make um one slave.
Da guy dat no mo notting,
You Israel peopo sell um
Jus cuz da guy owe you fo one pair new slippas.
7 Da guy dat not strong,
You Israel peopo push his face inside da dirt.
Da guys dat get presha on top dem,
You Israel peopo ack jalike dey no mo rights.
Da faddah an his boy, dey go sleep wit da same girl.
Cuz a all dat, peopo talk bad bout me,
An I da One dass good an spesho, you know!
8 You Israel peopo, you even lie down
On top da clotheses dat odda peopo wen leave dea
Nex to da altar fo make sacrifice,
Till da peopo pay wat dey owe.
Plus, you Israel peopo,
You take da money dat peopo pay fo one fine
An use um fo buy wine
Fo ony you suck um up,
Right dea inside da temple fo yoa god.
9 “Neva mind was me dat wen wipe out da Amor peopo
Fo you Israel peopo live hea.
Da Amor peopo was tall, jalike da cedar tree,
Strong, jalike da oak tree.
But I wen wipe dem out
Jalike I wipe out all dea fruits from da branches
An dea roots from undaneat da groun too.
10 But wot! Was me dat wen bring you guys
Outa da Egypt land to dis side.
Forty year, I wen show you guys wea fo go inside da boonies
Fo you guys take ova da land from da Amor peopo.
11 Was me dat wen make yoa boys come guys dat talk fo me,
Was me dat wen make yoa young guys make one promise
Fo stick wit da Nazir kine rules.
Eh, you Israel peopo! Az true, o wat?”
Dass wat Da One In Charge tell.
12 “But you guys, you wen make da Nazir guys
Broke dea rules an drink wine.
You wen tell my talka guys, ‘No talk no mo fo God!’
13 “Kay den! I goin smash you guys
Right dea wea you stay standing,
Jalike wen one wagon go huli on top you
Cuz get too much heavy stuff inside.
14 Da guy dat can run fas, no matta,
Still yet, dey goin catch um.
Da guy dat strong, no matta,
He no goin do notting.
Da army guy no goin stay alive,
No matta he know how fo fight.
15 Da guy dat shoot arrow,
He no goin stay standing.
Da guy dat run fas,
He no goin get outa dea.
Da guy dat ride horse,
He no goin stay alive.
16 Even if get da army guy dass da mostes strong inside,
Dat guy goin throw way da stuff he use fo fight, an run away
Wen da day come fo all dat fo happen.”
Dass wat Da One In Charge tell.