HSET PHILÊMÔN
1
Bàu hmàih
1 Phaulô mangai tù da Chuaq Jesus Christ, xam Timôthê, oh daq bèn achìh ka Philêmôn, mangai bua ma haten hatìa, mangai ma hadai abroq dèh mòeq qmang ti bèn,
2 hloe ka Apbi, aih mangai oh daq cadrì da bèn, Achip aih mangai bua da bèn ma hadai wiang tajêh, xam ka Tagop Hadròeh ma tagop ta hnim ìh:
3 waiq dôq ìh jah kan tabàih xam kan catèm enh Boc Plình, aih Baq da bèn, hloe xam enh nòe Chuaq Jesus Christ!
Manoh lùi xam kan loq waq da
Philêmôn
4 Au xan manè apôi yôt dèh Boc Plình, jò au hmàng trùh ìh tabàu waiq khàn,
5 majah qmang aih au hìa tàng manoh lùi xam kan ìh loq waq ka ƀài mangai hadròeh.
6 Au waiq khàn dôq ìh jah pajùm manoh lùi ti nhèn đòeq broq ka ìh jah loq tam yeo bàc hòm ƀài xôq ramot enh dalam ka Chuaq Jesus Christ.
7 Kan loq waq ìh khoe broq ka au jah lem bùi kàn xam kan alòng, majah qmang aih canòm ka ìh, manoh ƀài mangai hadròeh da Chuaq khoe jah blình hlài.
Phaulô bòch am ka Ônêsim
8 Qmang aih enh dalam ka Christ, yac ka au i cwìang thê ìh broq trong ìh ma ep broq,
9 mahaq jao kan loq waq da ìh dài au majah enh cali calo ka ìh, broq qmang aih ma yeo lem Au kô Phaulô, khoe craq, yàng manòeq kô taiq Chuaq Jesus Christ loh tam ka oe tù hòm,
10 au cali calo deh ka kon aih Ônêsim, mangai khoe wìa kon au jò au oe qne rawiang caxi datoeq;
11 enh nèh, haq ùh i lòeq cleq ka ìh, yàng manòeq kô lòeq ka ìh bàc trong lòeq hloe xam ka au: au thê haq hlài ta ìh,
12 haq tìah ka cliac clèm au diq.
13 Au enh padràng haq oe hlài tacô ti au, đòeq hu blòh ìh patìh ka au jò au qnang oe taqne rawiang caxi datoeq taiq Bàu lem.
14 Mahaq au ùh enh broq qmòe yac ka yiniq cleq jò qnhòq jah bàu ìh, dôq trong lem ìh ma broq aih ùh xài taiq kan panan, mahaq dìq loh enh manoh hnhoh jang.
15 Canau haq khoe talah đò ka ìh toq biaq đòeq ìh jah hlài haq hloe hloe,
16 pi hìaq ngan haq qmang ka hapŏng dìc hòm, mahaq ngan haq ùh hnau ka hapŏng dìc, tìah ka oh daq ma haten hatìa, ma yeo loe aih haten hatìa ka au, loq ka ìh aih kiang ma yeo hnau, enh chac hamac trùh enh dalam ka Chuaq.
17 Qmang aih tàng joq ìh ngan au tìah dèh ka bua ìh, ìh đìh yŏc haq tìah ka cla au diq.
18 Tàng joq haq i broq cleq haƀo ka ìh, i pòq dòeh ìh cleq, ìh taqmòq dŏng ka au beq.
19 Au kô Phaulô, tì kŏng cla au achìh ka ìh bàu kô: I au caqnaih da ìh da ìh hòm ìh pòq dòeh au qmòe chac cla ìh raq, mahaq ma aih ùh ràu dèh.
20 Joq ê daq, au toq tangèh jah kan lem bùi kô ajang ìh oe enh dalam ka Chuaq, enh dalam ka Christ ìh drah broq ka au jah tìah dèh ka manoh enh beq.
21 Au achìh jàiq kô ka ìh, au khoe lùi joq ìh loq iu bàu, au loq ìh broq ùh hnau ka bàu au ma anoe kô.
22 Èh tam mòeq yiniq hòm, ìh ngan padon đòeq ka au hnim padài, majah qmang aih au lùi rameh canòm ka bàu oh daq waiq khàn, au jah hlài ti oh daq.
23 Êphap-ra, aih bua oe tù ti au enh dalam ka Chuaq Jesus Christ, tanap bàu bòch hmàih ka ìh,
24 Mŏc, Aritac, Đêma xam Luca bua abroq pajùm ti au hanoh qmang aih.
25 Waiq kan tabàih dech enh Jesus Christ aih Chuaq bèn oe ti mahua yiang pì!