HSET HÊBRU
1
Jesus yeo haqnhèq ka ƀình plình
1 Calah nèh, Boc Plình khoe yŏc ƀài pajàu đòeq hu hnài ƀài boc yaq bèn bàc yàng bàc trong,
2 khoe aih trùh ta ƀài hi atìq kô, haq hnài bèn xi kon cla haq, aih Kon, haq ma khoe dèch paqnàng hujah dŏng rìm yiniq, èh hadai ajang Kon aih raq haq ma khoe broq loh Plình crŏng taneh;
3 Kon aih la kan qngah qngai da Boc Plình, aih raq radua qmù da haq, yŏc bàu i cwìang itai haq đòeq dèch paqnhrang rìm yiniq, jò Kon khoe broq hreo dŏng yiniq lui, jah haqngui enh qma Boc Plình, oe tanòe dìq jah haqnhèq,
4 qmang aih yiniq haq jah yi haqnhèq dŏng ka yiniq ƀình plình dàng leq aih èh haq jah yeo haqnhèq dŏng ka wì dàng aih diq.
5 Majah qmang aih Boc Plình alah doe ka ƀình plình leq rameh:
“Ìh kô Kon au,
Hì kô au khoe ha-uang qnoh ìh?
Alah i jò leq Haq doe:
“Kô èh au broq baq ìh,
Ìh broq kon au”?
6 Mahaq jò Boc Plình qmùt dèh Kon ramua ta crŏng taneh, aih haq doe rameh:
“Dìq dŏng ƀình plình da Boc Plình ep kùh waiq Kon”.
7 Ràu trùh ƀình plình haq doe:
“Boc Plình broq ka ƀình plình da haq tìah ka cayeo,
Broq ka hapŏng da haq tìah ka pla ùnh”.
8 Mahaq anoe trùh deh Kon, haq doe:
“Boc Plình ôi, gèq bùa da Ìh oe yôt enh qnhòng kô trùh qnhòng tau,
Cwìang diac da Ìh aih cwìang da kan taq atoq.
9 Ìh enh trong taq atoq, git trong dù;
Aih ìq, Chuaq ôi, Boc Plình da Ìh yŏc dàu lem bùi xùt ka Ìh,
Broq ka Ìh yeo qnhèq dŏng ka bua Ìh.
10 Boc Plình doe hòm:
“Chuaq ôi, adroe dìq dŏng Ìh khoe broq xèm taneh,
Trŏc hadai loh enh tì kŏng Ìh.
11 Plình crŏng taneh èh raliang lùch, mahaq Ìh oe yôt;
Plinh crŏng taneh èh kùn tìah ka ahyah eo;
12 Ìh canua haq bu dàng blah eo yôh,
Khoe aih plình crŏng taneh hi tablòq,
Mahaq Ìh dua mòeq jaq,
Ƀài hanam da Ìh ùh lùch.
13 Boc Plình alah doe ka ƀình plình leq rameh:
“Haqngui enh qma ka au,
Trùh jò au roh ƀài mangai ma tagit broq radua enh qneq ka jènh ìh?
14 Dìq ka ƀình plình aih ma ùh xài ƀài yiang patìh ka Boc Plình, khoe jah thê loh ta crŏng taneh đòeq patìh ka ƀài mangai ma padon jah kan dèch qmòh?