1 Tajao adroe nèh hadai i ƀài ranenh kùh waiq xam moeq nòe hadròeh oe ta crŏng taneh. 2 Qmang aih, mòeq toq hnim ranòh kùh waiq khoe jah broq, hagan adroe creo dèh nòe hadroèh, i jènh đen, caƀŏng xam ƀênh padon ta aih, 3 khoe aih trùh hagan enh dalam ka bai prìn, aih nòe dìq jaq hadròeh, 4 ta aih i prang kùh waiq broq xi wang, xam hom tajao, dìq jah glom xi wang. Ta hom aih i mòeq toq cabi broq xi wang ta aih tah bình mana, mòeq toq long dùi da Arôn, baiq capiac hmo tajao, 5 enh crŏng calàp hom i baiq chêrubim qngah qngai hlìa panan, qmù haq yàp dìq tanòe baxon yiniq lui. Mahaq kô aih ùh xài jò arèn taqmon ka hloh ƀài trong aih.

6 Rìm yiniq khoe jah taqmroq qmang aih, rìm hì ƀài pajàu mùt ta hagan ma adroe ta hnim kùh waiq đòeq pagêh trong ramènh kùh waiq; 7 mahaq, ta hagan baiq, aih mòeq hanam mòeq yàng, mòeq ngai cla pajàu haqnhèq raq ma jah mùt, ùh jò leq ma ùh wê mahim hu dèch ramènh ka yiniq lui cla xam yiniq lui dìq ka mangai. 8 Yiang Hadròeh yŏc ajang aih đòeq mahnu: waq toq oe raq i hnim ranòh kùh waiq ma adroe, aih èh trong mùt tanòe dìq jaq hadròeh qnhòq jah pèch. 9 Aih đòeq hu alìah ka bèn qnhòng manòeq, đòeq hu patô ƀài trong kùh waiq xam ramènh tadreo aih ùh broq ka manoh mangai kùh waiq jah geo lem. 10 Aih xài ƀài ranenh da chac hamac. Ta aih toq ƀài dahwèq acaq xam dahwèq ôq xam ƀài ranenh qnheo crài ka dabau. Gòm trùh hì broq ònh tajao maneo.

11 Mahaq jò Christ khoe trùh broq pajàu haqnhèq da ƀài kan lem ma atìq kô; Haq khoe mùt ta hnim ranòh kùh waiq ma yi kàn, ma yi geo, ùh xài broq loh enh tì kŏng kon mangai, hadai ùh xài taqnhòng kô. 12 Haq khoe mùt tanòe dìq jaq hadròeh mòeq yàng raq khoe lap am ka dìq dŏng, ùh wê mahim bubi xam mahim kon ƀo, mahaq yŏc qmòe mahim cla, đòeq hujah baxon hlài yiniq lui mòeq đòe. 13 Tàng joq mahim bubi calô, ƀo calô xam loc ƀo adrùh wì ma yŏc chùi ta chac mangai ma ùh sròeh aih xôq jah broq ka xech akia wì jah hadròeh, 14 loq ka mahim da Christ, aih Mangai ma canòm ka Yiang Hadròeh halình mòeq đòe, yŏc chac cla rađeh ma ùh i qmòe ka xìt ka habau dèch am ka Boc Plình, qnheo hreo manoh cliac bèn pi hìaq oe patìh ka kan cachìt hòm, đòeq hujah patìh ka Boc Plình ma rìh halình, aih dàng leq!

15 Ajang aih raq, Haq aih mangai taqne da tajao maneo, dôq jò haq khoe chìuq cachìt haq jah baxon ƀài yiniq lui ma khoe broq jò oe enh qneq ka tajao ma dùnh, aih èh mangai ma jah creo jah trùh yŏc kùng hang mòeq đòe ma khoe tèu am ka rađeh. 16 Majah qmang aih jò khoe achìh jàiq tanap, aih èh ep gòm mangai ma tanap cachìt hòeq. 17 Jàiq tanap aih i cwìang atìq ka jò mangai tanap cachìt, majah qmang aih waq toq mangai tanap oe rìh, jàiq aih ùh i cwìang cleq. 18 Qmang aih tajao ma adroe hadai yŏc mahim hu broq. 19 Jò Môise khoe anoe dìq dŏng ƀài bàu ranenh thê am dìq ka mangai tamàng, haq i yŏc mahim kon ƀo xam mahim bubi calô, pajùm xam diac, haq yŏc caxy capaih gòh xam hamenh cachiq xônh da arat ta hset xam dìq dŏng ka mangai, 20 haq doe: Kô mahim tajao Boc Plình ma khoe thê pì wèq tiaq. 21 Khoe aih haq yŏc mahim aih da arat ta hnim ramòh kùh waiq xam rìm yiniq oe ta aih. 22 Tiaq ranenh: rìm yiniq dìq canòm ka mahim men jah hadròeh, ùh ta-ùc mahim ùh i kan paclaih yiniq lui.

23 Qmang aih, tàng joq rìm radua qmù đòeq patìah ka ƀài yiniq ma oe ta plình ep qmang aih men jah basroèh, aih èh chac ƀài yiniq ma oe ta plình kiang ma ep canòm ka ramènh ma yeo lem men jah hadròeh. 24 Majah qmang aih Christ ùh mùt tanòe hadròeh loh enh tì kŏng kon mangai ma broq tiaq dua da nòe hadròeh joq qnàng, mahaq mùt qmòe ta plình, đòeq manòeq kô haq yòng am ka bèn enh ngèa Boc Plình. 25 Aih ùh xài haq mùt ta aih đòeq dèch rađeh broq ramènh tadreo bàc yàng tìah ka ƀài pajàu haqnhèq mòeq hanam mòeq yàng mùt tanòe dìq jaq hadròeh đòeq hu dèch mahim mahaq ùh xài mahim cla; 26 tàng ùh qmang aih, enh jò baxèm broq plình crŏng taneh trùh manòeq, haq khoe ep xalep bàc yàng. Mahaq manòeq kô ta qnhòng ma atìq lùch, haq khoe loh qmòeq yàng raq, yŏc cla rađeh broq ramènh tadreo đòeq hu paclaih dŏng ƀài yiniq lui. 27 Tìah ka ma khoe pajaq, kon mangai ep cachìt mòeq yàng, khoe aih ep chìuq kan hadrah, 28 hanoh qmang aih, Christ khoe dèch rađeh broq ramènh tadreo mòeq yàng raq đoèq dèch yiniq lui da bàc ngai; Haq hadai trùh hòm yàng baiq, ùh xài đòeq dèch yiniq lui hòm, mahaq đòeq am kan dèch paclaih ka mangai ma gòm haq.