8
Pajàu haqnhèq da tajao neo
1 Ƀài yiniq nhèn maneo anoe kô, ma palênh aih rameh: Bèn i mòeq ngai Pajàu haqnhèq, haqngui enh qma gèq Bùa Haqnhèq ta diac plình,
2 qnang broq Mangai patìh tanòe hadròeh xam ta hnim ranòh joq qnàng, broq loh enh tì kŏng Chuaq ùh xài loh enh tì kŏng kon mangai.
3 Rìm ngai ma khoe jah dèch tŏc broq pajàu haqnhèq aih đòeq dèch ramènh xam ngè tadreo, qmang aih haq kô ep dèch ramènh cleq.
4 Tàng haq oe raq ta crŏng taneh, aih haq ùh xài pajàu haqnhèq, majah qmang aih ta crŏng taneh i bàc ngai pajàu dèch ramènh tadreo tiaq bàu ranenh thê,
5 wì patìh ta hnim kùh waiq, mahaq hnim kùh waiq aih broq dua qmù da ƀài yiniq oe ta plình, tìah ka jò Môise padon broq hnim ranòh, Boc Plình i pariaq haq: “Rabiaq oq, broq rìm yiniq troq tiaq dua au khoe patô ka ìh ta bui wang”.
6 Yàng manòeq kô, yiniq broq da Chuaq Jesus khoe yeo haqnhèq ka da wì qnoeq, majah qmang aih haq aih mangai taqne da tajao ma yeo lem, tajao aih loh enh bàu tèu am ma yeo lem.
7 Majah qmang aih, tàng joq tajao ma adroe ùh hìaq thìuq qmòe cleq, aih ma i ka nòe hu broq tajao ma atìq.
8 Mahaq Boc Plình cwò ka mangai Jiuđa, haq doe:
“Chuaq doe, taƀài hì ma padon trùh kô èh,
Aih jò au pagêh tajao maneo ka hnim Isorali xam hnim Jiuđa,
9 Ùh tìah ka tajao au ma broq ti bŏc yaq wì haq,
Aih hì au ma cadop kŏng wì haq, ajèn wì loh enh diac Êdip.
Pàng wì haq ùh cajap manoh wèq tajao da au,
Dài au majah ùh blèch ngan wì, aih bàu Chuaq doe”.
10 Chuaq doe hòm:
“Kô bàu tajao au am ka hnim Isorali,
Atìq ka hì aih:
Au đòeq ranenh da au ta gàu wì;
Achìh qmùt ta cliac wì haq,
Au broq Boc Plình wì,
Wì haq jah broq mangai da au.
11 Taqne wì haq, pi i ka cabô oe ep hnài dèh mangai haten hatìa,
Xam oh daq da cla rameh: Drah canau loq ka Chuaq;
Majah qmang aih dìq dŏng ka wì haq;
Enh mangai ma dìq jaq hamoq trùh mangai ma dìq jaq kàn dìq jah loq
ka au,
12 Majah qmang aih, au caqnaih dŏng kan dù wì haq,
Pi hmàng trùh yiniq lui wì haq hòm”.
13 Creo ka ma kô aih “tajao maneo”, qmang aih haq khoe broq ka tajao ma adroe khoe wìa ma dùnh, qmang aih yiniq cleq ma khoe dùnh, khoe tagôi, aih èh hi padon hnhung lùch đeh.