3
Canòm ka manoh lùi loq canòm ka broq tiaq Ranenh men jah taq atoq
1 Wùih! mangai Galati ma blùng tau, cabô khoe tah ka pì canàih, ƀài mangai adroe kô nèh loq ka Jeus Christ khoe tiang đình talong pagat tìah gleq hnoq qmòe ajang mat?
2 Au bòch pì moèq bàu qmang kô: Aih ìq canòm ka broq tiaq trong ranenh thê, loq canòm ka anòe tàng èh lùi oh daq ma khoe jah Yiang Hadròeh?
3 Gleq oh daq majah blùng hrìn qmang aih? Adroe aih khoe canòm ka Yiang Hadròeh hagleq manòeq kô aih ma hi loh ka canòm ka xech akia đòeq hu pagêh?
4 Oh daq chìuq bàc xalep qmang aih đòeq hu dech do qmòh? Tàng qmang aih joq hi qngwan!
5 Boc Plình am Yiang Hadròeh rai broq bàc kan halac qne oh daq, aih tiaq trong ranenh thê loq taiq oh daq lùi bàu oh daq ma khoe tàng?
6 Tìah ka Apraham lùi Boc Plình, aih hi jah creo ka haq mangai taq atoq.
7 Qmang aih oh daq khòh loq rameh: Ƀài mangai leq i manoh lùi, aih ma joq kon xau joq qnàng da Apraham.
8 Hset Hadròeh khoe loq adroe Boc Plình hanoh creo ka mangai diac qnoeq jah kan taq atoq tiaq manoh lùi, dài haq majah chônh doe ka Apraham Bàu lem kô: “Rìm taneh diac dìq canòm ka ìh hujah xôq ramot”.
9 Qmang aih, waq toq cabô lùi, haq hi wiang jah xôq ramot ti Apraham aih mangai i manoh lùi.
10 Majah qmang aih, rìm ngai ma canòm ka bìac broq da ranenh, aih dìq oe enh qneq ka kan hamaiq, majah qmang aih i bàu achìh rameh: “Joq ra-òh hamaiq qnàng ka ƀài mangai ma ùh cajap manoh ta rìm yiniq khoe achìh ta hset ranenh đòeq broq tiaq ƀài yiniq aih”.
11 Joq qnàng ùh i ka cabô broq tiaq ranenh mahaq jah kan taq atoq enh ngèa Boc Plình, trong aih joq wop, majah qmang aih mangai taq atoq rìh tiaq manoh lùi.
12 Ranenh ùh pajùm ti manoh lùi, mahaq ranenh achìh rameh: “Mangai leq iu tiaq ranenh hi rìh canòm tiaq dèh aih raq”.
13 Christ khoe baxon ahlài bèn claih enh kan hamaiq da ranenh, majah qmang aih Haq khoe wìa kan ra-òh hamaiq am ka bèn majah qmang aih i bàu achìh: “Joq ra-òh hamaiq qnàng ka mangai wì ma atua tŏc talong.”
14 Dôq xôq ramot ma am ka Apraham canòm ka Chuaq Jesus Christ jah ta ùc jàp jìa ka mangai diac qnoeq, qnah hòm đòeq bèn canòm ka manoh lùi hujah yŏc Yiang Hadròeh, ma khoe tèu am.
Bàu Boc Plình tèu am khoe i adroe ka ranenh
15 Yôiq oh daq, au capoch tiaq bàu kon mangai ma loq doe: Jò wì khoe gêh ka jàiq tajao, pi i bô oe jah raliang, oe jah tah tam cleq ta aih hòm.
16 Manòeq kô, ƀài bàu tèu am khoe jah am ka Apraham xam nang noe haq. Hset Hadròeh ùh xài doe: “am ka ƀài nang noe kon mangai”; tìah am ka bàc mangai, mahaq doe: “am ka nang noe da ìh”, qmang ka anoe trùh mòeq ngai raq, aih Chuaq Jesus Christ.
17 Qmang aih au doe aih rameh: Pôn hrinh piq jàt hanam atìq men i hset ranenh, dài ma ùh jah raliang đac Bàu tajao Boc Plình broq khoe gêh deh adroe ka aih, ranenh hadai ùh broq ka bàu tèu am loh đac ka qngwan qngwaiq.
18 Majah qmang aih, tàng joq tiaq ranenh bèn jah kùng hang, aih pi oe tiaq bàu ma tèu am. Mahaq Boc Plình am ka Apraham kùng hang tiaq bàu Haq khoe tèu deh adroe.
19 Tàng qmang aih ranenh đòeq broq cleq hòm? Ranenh neo qnoh ònh atìq, taiq kon mangai broq toq yiniq lui, gòm jò Kon da nang noe jah trùh, aih Mangai ma khoe i bàu tèu deh adroe, ranenh khoe jah qnoh am enh ƀài bình plình èh jah anoe hlài xi moèq ngai oe taqne.
20 Mangai taqne aih ùh xài taqne ka mòeq apah raq, mahaq Boc Plình aih i mòeq raq.
Ranenh ajèn aràng trùh ta Christ
21 Tàng qmang aih, ranenh pagau hlài ka bàu Boc Plình ma tèu am qmòh? Ùh lòm qmang aih! Tàng joq khoe qnoh am ranenh hlàt dèch kon mangai jah kan rìh, aih èh kan taq atoq hadai loh enh ranenh.
22 Mahaq Hset Hadròeh khoe clêh rìm yiniq oe enh qneq ka yiniq lui, dôq bàu ma khoe tèu, enh dalam ka Christ jah am ka mangai lùi.
23 Jò kan lùi qnhòq trùh, bèn dìq oe enh qneq ka ranenh, hu gòm kan lùi jah paqnoh.
24 Qmang aih ranenh tìah ka mangai hnài đòeq hu ajèn aràng bèn trùh ta Christ, đòeq canòm ka manoh lùi bèn jah wìa kan taq atoq.
25 Qmang aih jò manoh lùi khoe trùh, bèn pi ep oe enh qneq ka cwìang da mangai hnài aih hòm.
26 Aih ìq, enh dalam ka Chuaq Jesus Christ, bèn dìq jah broq kon Boc Plình.
27 Oh daq dìq khoe jah ƀaptem enh dalam ka Christ, dìq khoe jah caxùnh yŏc Chuaq Jesus Christ.
28 Qmang aih, pi i ka mangai Juđa, pi i ka mangai Gorec hòm, pi i mangai broq dìc, pi i mangai broq dèh cla hòm, pi i gucalô gucadrì hòm, majah qmang aih enh dalam Christ oh daq wìa mòeq raq.
29 Tàng joq oh daq joq qnàng mangai da Christ, oh daq aih nang noe da Apraham, aih ƀài mangai wiang jah hang tiaq bàu ma khoe tèu am.