2
Tagop Hadròeh ta Jerusalem carùp tì ka Phaulô
1 Khoe aih, moèq jàt pôn hanam, au tŏc hòm ta Jerusalem ti Ƀanaba, i qnong Tit lam tiaq ma.
2 Au iu tiaq bàu mahnu, tŏc ta aih đòeq taqmon hlài Bàu Lem au khoe hnài ka mangai diac wì dôq oh daq jah loq, mahaq au taqmon hlài toq ka wì ma broq gàu Tagop Hadròeh, majah qmang aih au waq ka jah panhìn đòeq bìac cadàu da au enh nèh trùh mamòeq ùh hìaq ngwan.
3 Yac kaTit, mangai ma lam tiaq au aih mangai Gorec, mahaq dua ùh hìaq ep broq ramènh kat akia.
4 Nhèn majah broq qmang aih, taiq i biaq ngai patìah đeh hanoh broq oh daq, mùt taqne nhèn hu ti achop rinh ngan cwìang da nhèn jah enh dalam ka Chuaq Jesus Christ, đòeq rùp nhèn broq dìc broq hapŏng.
5 Nhèn ùh talùi ka wì haq yac ka toq xit hnha, blinh qmòe nhèn ùh oe enh qneq ka cwìang da wì haq, đoèq kan joq qnàng da Bàu lem jah hagau taqne oh daq.
6 Anoe trùh mangai ma i bang tìang ma haqnhèq wì ma iu camaih dèh raya (yac ka enh nèh wì haq mangai qmang leq, aih dua ùh ep cleq ka au, Boc Plình ùh i yi loq waq ka cabô) wì aih hanoh ùh tam mòeq nà bàu cleq ta bàu hnài da au.
7 Majoq qnàng aih, wì haq hnoq bìac hnài Bàu lem ka mangai ùh broq ramènh kat akia Chuaq khoe thê au, tìah ka bìac hnài Bàu Lem ka mangai broq ramènh kat akia ma khoe thê Phiero diq
8 Majah qmang aih, Boc Plình ma khoe broq ta manoh cliac Phiero, đòeq thê haq broq mangai tiaq cla am ka mangai kat akia hadai broq ta manoh cliac đòeq thê au broq mangai tiaq cla am ka mangai diac wì
9 jò Jaco, Sêpha, Jon, aih ƀài mangai wì ma ngan tìah dèh ka long jrang kàn, wì canau kan tabàih dech khoe jah am ka au, wì hnhu kŏng pah qma hu carùp tì ka ma Ƀanaba, đòeq ma lam trùh ta mangai diac wì, wì haq aih lam trùh ta mangai khoe broq ramènh kat akia.
10 Wì aih toq tanap ka au ep hmàng trùh mangai pa, trong aih au hadai khoe nhet ka broq haraya.
Phaulô tagàih ka Phiero
11 Mahaq jò Sêpha trùh ta Antiôt, au i tagàih enh ngèa ka haq, majah qmang aih haq broq joq khoe ùh troq.
12 Jò mangai Jaco thê lam qnhòq i trùh, aih haq acaq pajùm ti mangai diac wì, yàng jò wì bu trùh haq padinh yòng lah đeh oe crài, majah qmang aih haq yùq ka ƀài mangai khoe broq ramènh kat akia.
13 Ƀài mangai Juđa qnoeq hadai top dua ùh wìa qmang aih, jaq Ƀanaba hadai loh qmòe ka broq tiaq kan ùh wìa da ƀài aih.
14 Mahaq jò au hnoq wì haq lam ùh jang tiaq kan joq qnàng da Bàu lem, enh ngèa bàc ngai, au doe ka Sêpha: “Tàng ìh kô mangai Juđa, mahaq acaq oe hadai hatìah ka mangai diac wì, ùh tiaq ranenh da mangai Juđa, aih hagleq ìh majah thê mangai diac wì tiaq ranenh da mangai Juđa?
15 Nhèn kô jò ha-uang loh aih khoe mangai Juđa, ùh xài mangai i yiniq lui loh enh mangai diac wì.
16 Yac ka qmang aih, bèn loq kon mangai jah kan taq atoq, ùh xài canòm ka broq tiaq trong ranenh thê, mahaq canòm ka manoh lùi enh dalam ka Christ, dài haq nhèn majah khoe lùi Chuaq Jesus Christ, đòeq hujah wìa mangai taq atoq tiaq manoh lùi enh dalam Christ, ùh xài canòm ka broq tiaq trong ranenh thê, majah qmang aih ùh i cabô broq tiaq trong ranenh thê ma jah kan taq atoq.
17 Mahaq, tàng joq nhèn qnang chaq broq qmang leq hujah kan taq atoq enh dalam ka Christ, yàng wì doe nhèn mangai i yiniq lui, tàng qmang aih Christ aih ma hapŏng da yiniq lui qmòh? Ùh lòm qmang aih!
18 Joq, tàng au dèch paqnàng hlài yiniq au ma khoe raliang đac, aih ajoq cla au raq doe đeh kô khoe ùh troq ka ranenh.
19 Majah qmang aih, tiaq ranenh, au khoe cachìt am ka ranenh, đòeq hu rìh ka Boc Plình.
20 Au khoe tiang đình pajùm ti Christ ta long pagat, manòeq kô au rìh, aih pi xài au rìh hòm, mahaq Christ rìh oe enh dalam ka au, manòeq au rìh ta xech akia kô, aih au rìh ta mannoh lùi kon Boc Plình, haq ma loq waq ka au, chìuq cađac rađeh hu cachìt am ka au.
21 Au ùh enh dôq kan tabàih dech da Boc Plình loh đac ka qngwan, tàng broq tiaq ranenh men jah kan taq atoq, qmang aih Christ cachìt hi qngwan qngwaiq.