6
1 Manòeq, nhèn kô mangai abroq pajùm ti Chuaq, dài nhèn àu anoe ka oh daq ma khoe jah kan tabàih enh Boc Plình apaq dôq haq loh đac ka qngwan.
2 Majah qmang aih haq doe:
“Au khoe tamàng bàu pì jò troq dèh jò,
Au khoe wiang ka pì oe ta hì dech paclaih.
Au doe ka pì manòeq kô raq jò troq dèh jò, manòeq kô raq hì dèch paclaih!”
3 Nhèn ùh broq kan catoeh ka cabô, dôq ùh hìaq i mòeq nà bàu leq capoch qmèq trong nhèn ma patìh.
4 Mahaq rìm trong nhèn broq ka rađeh jah tajì ka mangai hapŏng Boc Plình: Nhèn chìuq àt jaq cajoq: ta kan nan tùng, kan pangot hrah, kan xalep;
5 jò wì jêh, jò wì clêh, jò loh ka manhài, jò tagah lep, qngah ka mang ùh jah kùi, cliac pangot;
6 ta kan hliang lem, kan qnì loq, ta kan loq àt, ta kan loq hanò, ta Yiang Hadròeh, ta kan loq waq joq qnàng.
7 Ta manoh hnhoh jang, ta cwìang itai da Boc Plình, oe ta tì kŏng pah qma pah qngeo, nhèn cadop wê ranac da kan taq atoq.
8 Yac ka jah nhòm, yac ka pòq bàu qmèq, yac ka jah bàu lem,
9 hnoq tìah gleq ùh cabô loq mahaq bàc ngai loq, hnoq tìah gleq ten cachìt mahaq oe rìh trùh manòeq, hnoq tìah ka mangai wì baxa mahaq ùh hìaq jêh đac;
10 hnoq tìah gleq mangò mahaq jah yôt kan lem bùi, hnoq tìah gleq pa mahaq broq ka bàc ngai jah padrŏng, tìah gleq ùh i qmòe cleq mahaq i rìm yiniq.
11 Yôiq yôiq mangai Côrintô, hacùng bàu nhèn anoe jang, manoh nhèn pèch rùng ka oh daq.
12 Ùh xài nhèn canit ka pì mahaq cliac manoh cla pì khoe broq ka rađeh loh ka canit.
13 Drah i chau manoh ka nhèn qmang aih diq, aih nhèn anoe ka pì tìah ka kon cla mhèn.
Christ xam Bêlian
14 Apaq pajùm long ech ti mangai ùh lùi. Majah qmang aih, kan taq atoq xam kan dù i jah pajùm ti dabau? Kan qngah xam kan clam wìa ka jah taqmùt ka dabau?
15 Christ xam Bêlian wa i pajùm cleq ka dabau, mangai lùi i wiang jah cleq ti mangai ùh lùi?
16 Hnim kùh waiq Boc Plình awìa ka pajùm ti radua qmù kan kiac? Majah qmang aih bèn kô raq hnim kùh waiq da Boc Plình rìh halình, qmang ka Boc Plình doe:
“Au oe ti wì haq,
lam hlài taqne wì haq.
Au broq Boc Plình wì haq,
wì haq broq mangai da au”.
17 Dài aih, Boc Plình majah doe:
“Drah loh ma khoe enh wì haq beq, rai lah đeh crài ka wì haq,
Apaq poh ta dahwèq ùh sròeh,
Aih èh au hi đìh yŏc pì”:
18 Khoe èh,
Au broq Baq pì,
Pì jah broq kon calô, kon cadrì da au,
Chuaq i cwìang itai rìm trong doe qmang aih”.