5
Hnim oe ta Plình
1 Majah qmang aih bèn loq, tàng joq hnim bèn oe đò ta crŏng taneh kô haq loh ka bùc raliang, aih èh bèn i hnim mòeq đòe oe ta plình, Boc Plình ma broq, ùh xài broq loh enh tì kŏng kon mngai.
2 Manòeq kô joq bèn qnang hràng ta hnim oe đò kô, bèn dìq jaq ngèh ka jah caxùnh yŏc hnim da bèn oe ta plình,
3 majah qmang aih jò bèn khoe jah caxùnh pi hìaq oe hnoq bèn rahòng.
4 Jò bèn oe ta hnim oe đò kô, bèn hràng enh qneq ka kan trap da haq, bèn ùh ngèh loh ka ralênh, mahaq bèn ngèh ka jah caxùnh yŏc hlài hnim oe ta plình, đòeq ƀài yiniq maloq cachìt ta chac bèn jah kan rìh lonh đac.
5 Manòeq kô, Mangai ma padon palauq ka bèn jah ƀài yiniq kô aih la Boc Plình, khoe am ka bèn Yiang Hadròeh đòeq hu broq hang pacap ajang aih.
6 Aih ìq raq, yac ka jò leq dua bèn lùi rai canòm, majah qmang aih bèn loq jò bèn qnang oe ta chac kô aih bèn hangai ka Chuaq,
7 majah qmang aih bèn cadiang lam xi manoh lùi, ùh xài bèn cadiang lam xi mat hnoq.
8 Bèn bình manoh lùi qmang aih dài au majah doe: loh khoe ka chac kô đòeq hujah oe pajùm ti Chuaq, ma aih ma yeo enh.
9 Qmang aih, dài bèn yac ka oe, yac ka bèn loh enh chac kô, dua bèn àu dìq ka padren waq ka jah lem manoh Chuaq.
10 Majah qmang aih, kô èh bèn rìm ngai dìq ep yòng enh ngèa gèq hadrah da Chirst, đòeq rìm ngai jah waq deh hra tiaq trong lem trong qmèq bèn ma khoe broq jò bèn oe raq ta xech akia kô.
11 Pang aih, nhèn i manoh loq iu yùq ka Chuaq, nhèn àu ti chaq trong đòeq hu broq ka mangai qnoeq dìq lùi, Boc Plình loq ka nhèn, nhèn hadai ngèh ta manoh cliac oh daq loq ka nhèn.
12 Nhèn ùh capoch manè rađeh enh ngèa oh daq hòm, mahaq nhèn enh am ka pì oh daq jah nen hu capoch manè nhèn, đòeq oh daq jah hatèu ka ƀài mangai ma ti catèh bìac lem toq enh gùng, mahaq enh dalam aih dech do.
13 Tàng joq nhèn loh ka ranhùa (qmang ka bàu qnah ngai ma doe), aih nhèn ranhùa ka Boc Plình, tàng nhèn clang, aih clang ka oh daq.
14 Majah qmang aih kan loq waq da Christ tamèt ta manoh nhèn, nhèn hèm haiq tàng joq i mòeq ngai cachìt am ka rìm ngai, aih èh rìm ngai hanoh cachìt.
15 Chuaq khoe cachìt am rìm ngai, dôq mangai ma oe rìh pi xài rìh toq ka rađeh hòm mahaq rìh am ka Mangai khoe cachìt èh khoe rìh hlài ka rađeh.
16 Qmang aih, pang kô ta èh, nhèn pi top dua crŏng taneh kô đòeq hu canau loq ka cabô hòm, yac ka adroe kô nèh nhèn hmaq tiaq dua crŏng taneh đòeq hu canau ka Christ, manòeq kô nhèn pi ngan haq qmang aih hòm.
17 Qmang aih, tàng cabô oe enh dalam ka Christ, haq aih mangai khoe jah paneo hlài, ƀài yiniq ma dùnh khoe dìq, manòeq rìm yiniq dìq jah paneo.
18 Rìm yiniq aih dìq loh enh Boc Plình, haq khoe broq ka bèn jah canòm ka Christ đoèq hujah hatroq hlài ti haq, èh haq khoe am nhèn wìa mangai anoe hnài trong ta hatroq aih.
19 Majah qmang aih, enh dalam ka Chirst, Boc Plình khoe broq ka kon mangai jah hatroq hlài ti cla haq, pi taqmòq yiniq lui ka wì hòm, haq khoe thê nhèn anoe hnài trong hatroq aih.
20 Nhèn kô mangai da Christ thê, tìah ka Boc Plình hadai ajang nhèn hu bahmàng oh daq. Nhèn canòm yiniq da Christ đòeq pariaq oh daq: Drah hatroq ka Boc Plình.
21 Taiq bèn, Boc Plình majah khoe broq ka Mangai ùh lòm i qmòe yiniq lui, loh ka pòq dŏng yiniq lui, dôq bèn canòm ka haq aih, đòeq hujah kan taq atoq da Boc Plình.